1 Corinthians 13

Dagbani Bible (Naawuni Kundi Kasi)

← Chapter 12 Jump to: Chapter 14 →

1N yi tɔɣisiri ninsalinim’ yɛligu balibu kam, hal zaŋ tabili malaikanim’ yɛligu, ka ka yurilim, dindina m bemi kaman dawule bee gbiŋgbarinlun’ shɛŋa bɛ ni mali ŋmɛri taba ka di yɔri vuri yiriŋ la.

2Ka n yi mal’ anabitali yɛtɔɣa tɔɣisibu pini, ka tooi baŋdi yɛlisɔɣira, ka mali baŋsim zaa, hal n yi mali yɛda din ni chɛ ka n tooi vuui zoya di dooshɛhi, ka ka yurilim, dindina m pala shɛli.

3Ka n yi pirigi n ni mali shɛlikam zaa zaŋ tari, hal ka zaŋ n niŋgbuŋ ti ni bɛ nyo li buɣim, ka ka yurilim, dindina di ku ku ma buchi.

4Yurilim diri suɣilo, ka niŋdi nirilim; yurilim bi zabiri nyuli, di bi nyuri bara, di mi bi duhiri dimaŋa.

5Yurilim bi mali dimaŋ’ kuuna bee n-ʒiɛmdi so. Yurilim bi zabiri dimaŋ’ yubu zuɣu; di bi mali suhuyiɣisili; di mi bi zaŋdi yɛla niŋdi suhu ni.

6Yurilim bi mali suhupiɛlli taali tumbu ni, amaa di naɣ’ mali suhupiɛlli la yɛlimaŋli ni.

7Yurilim diri suɣilo binshɛɣukam zaa ni, ka niŋdi yɛda binshɛɣukam zaa ni, ka mali tahima binshɛɣukam zaa ni, ka lan niŋdi ania binshɛɣukam zaa ni.

8Yurilim bi naara; amaa di yi nyɛla anabitali yɛtɔɣa tɔɣisibu, di nyɛla din garita; ka di yi nyɛla tinzun yɛligu balibu kam yɛtɔɣa tɔɣisibu Naawuni Shia Kasi yiko ni, di nyɛla din garita; ka di yi nyɛla baŋsim yɛtɔɣa yɛla, di gba nyɛla din garita.

9Dama ti bi mali baŋsim yɛtɔɣa zaa, ti mi bi mal’ anabitali yɛtɔɣa tɔɣisibu zaa;

10amaa milinsi din pali la yi ti kana, milinsi din bi pali zaa ŋɔ ni vuui.

11N ni daa nyɛ bia, n daa tɔɣisirila bilim yɛtɔɣa, ka mali bia tɛha, ka buɣisiri yɛla bilim buɣisibu; amaa n ni daa ti bi doo, ka n chɛ bilim soya zaa.

12Dama pumpɔŋɔ ti nyari binyara mi kaman diɣi liti ni ka ti lihira; amaa saha yi ti paai, ti nini yipa ni nya binshɛɣukam zaa viɛnyɛliŋga. Pumpɔŋɔ m bi mi binshɛɣukam zaa, amaa saha kanna ka n ni ti mi zaa kaman Naawuni ni mi ma zaa shɛm la.

13Dinzuɣu bin’ ata ŋɔ m-beni, dina n-nyɛ: Yɛda mini tahima ni yurilim, ka din gari di zaa nyɛla yurilim.

← Chapter 12 Jump to: Chapter 14 →