Ecclesiastes 11

Dagbani Bible (Naawuni Kundi Kasi)

← Chapter 10 Jump to: Chapter 12 →

1Zaŋm’ a bindirigu bahi kom ni, dama di yi niŋ daba ayi, di ni lan lab’ a sanna yaha.

2Pirigim’ a ni mali shɛlikam ʒii buyopɔin bee bunii zuɣu, dama a ku tooi baŋ barina shɛli din yɛn niŋ dunia ŋɔ ni.

3Sagbana yi ti pali kom, saa lurimina, ka tia yi lu n-kpala nudirigu polo bee nuzaa polo, di ni lu luɣ’ shɛli maa, nimaani ka di yɛn doya.

4Ŋunkam ʒiya kpahindi pɔhim ku biri binshɛli, ka ŋunkam mi ʒiya lihiri sagbana ku kpuɣi puu atam.

5A ni bi mi vuhim ni kpɛri bia kɔba ni o ma puuni shɛm, lala ka a ku tooi baŋ Naawuni ŋun nam binshɛɣukam zaa ŋɔ tuma ni nyɛ shɛm.

6Birim’ a bimbira asiba ni zaawuni, dama a ku tooi baŋ din ti yɛn niŋ, dimbɔŋɔ bee din’ la bee di zaa nti yɛn niŋ.

7Neesim viɛla, ka nina yi nya wuntaŋa, di viɛla.

8Hal ninvuɣ’ shɛb’ bɛn yuui pam, di simdi ni bɛ mali suhupiɛlli di yuma zaa puuni, amaa di simdi ni bɛ teei ni zibisim saha dabisa ni ti galisi pam. Dinkam zaa niŋdi nyɛla din ka buchi.

9Bipolli, mali suhupiɛlli a bipolitali saha. Chɛ ka a suhu piɛl’ a bipolitali saha. Dol’ a suhu ni bɔri shɛm, ka niŋm’ a ni bɔri shɛm. Amaa lee baŋmi ni Naawuni ni ti kar’ a saria di zaa maa zuɣu.

10Di chɛ ka shɛli yɛla niŋ a nandahima bee n-chɛ ka shɛli ti a biɛrim a niŋgbuna ni. Dama bipolitali mini biɛhigu piligu nyɛla din ka buchi.

← Chapter 10 Jump to: Chapter 12 →