Ecclesiastes 8

Dagbani Bible (Naawuni Kundi Kasi)

← Chapter 7 Jump to: Chapter 9 →

1Ŋuni n-lee be kaman yɛndana? Ka ŋuni n-lee baŋdi yɛla gbinni ni nyɛ shɛm? Yɛm chɛmi ka nir’ ninni ne zaa, ka chɛ ka o ninni lihibu biɛhigu taɣi.

2Doli naa zaligu, a ni po pɔri din nyɛ kasi la zuɣu.

3Di zɔri dabiɛm. Naa ni tooi niŋ o ni bɔr’ shɛm, dinzuɣu o tooni zanibu yi ti mali barina, nyin’ zom’ yomyom.

4Dama naa yɛtɔɣa mali kpiɔŋ pam, ka so ku tooi ŋme o naŋgbankpeeni.

5Ŋunkam doli zaligu, zaɣ’ biɛɣu ku paag’ o, ka yɛndana mi o ni yɛn niŋ lala saha shɛli.

6Ninsal’ yɛlli kam ʒila o zuɣu, amaa yɛlli kam malila di soli ni di saha.

7Yɛlimaŋli, bɛ bi mi din ti yɛn niŋ, dama ŋuni n-lee ni tooi yɛli ba di ni ti yɛn nyɛ shɛm.

8So ka pɔhim yiko din ni tooi gooi li, so mi ka kum dabisili yiko. So ku tooi lɔrigi kpara sɔŋ tɔbu tuhibu saha. Lala ka ninvuɣ’ biɛtali tuma gba ku tooi tiligi ŋun tumdi li.

9N lan nya dimbɔŋɔ zaa saha shɛli n ni daa tɛhiri binshɛɣukam din niŋdi dunia ŋɔ ni yɛla. Ninvuɣ’ so ŋun mali yaa mi n-zaŋ o yaa maa n-nahind’ o taba.

10N lan nya ka bɛ mi n-sɔɣi ninvuɣ’ biɛri ka bɛ nyɛla bɛn daa kpɛri luɣ’ kasi shee ka yira; amaa ka niriba paɣiri ba tin shɛl’ ni bɛ ni daa tum tuun’ shɛŋa maa zuɣu. Dimbɔŋɔ gba nyɛla din ka buchi.

11Bɛ ni bi darigi bɛn tumdi tuumbiɛri tibili yomyom zuɣu chɛ ka niriba kul lo bɛ suhuri ni ni bɛ tumla tuumbiɛri.

12Alahichilana yi tum alahichi bukɔbiga, ka kul be o nyɛvil’ ni yuui, m mi ni ninvuɣ’ shɛb’ bɛn zɔri Naawuni yɛla ni so, bɛ ni zɔr’ o maa zuɣu.

13Amaa ninvuɣ’ biɛri ni bi zɔri Naawuni maa zuɣu, bɛ yɛla ku so, ka bɛ nyɛviya gba ku wɔɣa.

14Binshɛli din ka buchi lan niŋdi dunia ŋɔ ni, dina n-nyɛ: bɛ zaŋdila bɛ ni yɛn zaŋ shɛli niŋ ninvuɣ’ biɛri n-niŋdi ninvuɣ’ suma, ka zaŋdi bɛ ni yɛn zaŋ shɛli niŋ ninvuɣ’ suma n-niŋdi ninvuɣ’ biɛri. N yɛliya ni dimbɔŋɔ gba ka buchi.

15Dinzuɣu man’ kpahimbu puuni, di ni simdi ni ninsalinim’ niŋ shɛm dunia ŋɔ ni nyɛla bɛ kul diri ka nyura, ka mali suhupiɛlli, dama suhupiɛlli mini bɛ tuma n-kul yɛn doli taba Naawuni ni ti ba nyɛvili shɛli dunia ŋɔ ni ŋɔ puuni.

16Saha shɛlikam n yi ti lo ni m bɔhim nya yɛm, ka nya niriba ni gaani gom yuŋ’ ni wuntaŋ’ ni n-tumdi tuun’ shɛŋa dunia ni,

17di saha n nyarila Naawuni tuma zaa, ka baŋ ni so ku tooi baŋ din niŋdi dunia ŋɔ ni. Bɛ yi bɔra, bɛn’ kpaŋm’ bɛmaŋ kabo, bɛ ku tooi baŋ li. Hal yɛnnim’ ni wuhiri ni bɛ mi li la, bɛ kul ku tooi baŋ li.

← Chapter 7 Jump to: Chapter 9 →