Jonah 4

Dagbani Bible (Naawuni Kundi Kasi)

← Chapter 3 Jump to:

1Amaa ka Jona suhu daa miligi pam, ka o suhu yiɣisi.

2Ka o daa suhi Yawɛ yɛli, “Yawɛ, n suhir’ a, n ni daa na be n ya la, pa ŋ-ŋɔ ka n daa pun yɛli? Dina n-chɛ ka n daa niŋ yomyom ni n zo n-chaŋ Speen. Dama m mi ni a nyɛla yurilimlana mini nambɔzɔra ni suɣilolana; ka a nirilim niŋbu galisi pam; ka a lan nyɛ ŋun taɣir’ a tɛha zaŋ chaŋ a ni lo ni a niŋ yɛl’ biɛ’ shɛli polo.

3Dinzuɣu Yawɛ, n suhir’ a, deemi n nyɛvili, dama n kum so m bebu.”

4Ka Yawɛ bɔh’ o, “Di simdi ni a chɛ ka a suhu yiɣisi?”

5Ka Jona daa yi tiŋ’ maa tariga wulimpuhili polo ti ʒini. O daa sa la gara n-kpe n-ʒi di mahim guhiri ni o nya din yɛn niŋ Ninive.

6Di saha ka Yawɛ ŋun nyɛ Naawuni ŋɔ daa chɛ ka yɔɣili bili gara maa gbini n-zooi du nti pani gara maa zuɣusaa n-niŋ mahim ni Jona ʒi di lɔŋni ka o ni maha. Ka yɔɣili maa ni daa du m-pa Jona zuɣusaa shɛm maa niŋ o nyaɣisim pam.

7Amaa ka dindali maa biɛɣu daa ti neerina, ka Naawuni chɛ ka zunzuli lu yɔɣili maa zuɣu ŋ-ŋub’ li ka di kpi.

8Ka wuntaŋ’ daa ti bii na, ka Naawuni chɛ ka pɔhim tulli yi wulimpuhili polo ʒiɛna, n-chɛ ka wuntaŋ’ kpe Jona hal ka o ti yɛn pabigi. Ka Jona daa bɔri ni o kpi, ka yɛli, “N kum so o bebu.”

9Amaa ka Naawuni daa bɔh’ o, “Di simdi ni a chɛ ka a suhu yiɣisi yɔɣili maa zuɣu?” Ka Jona garigi yɛli, “Di simdi ni n suhu yiɣisi, hal ka m bi zaɣisi ni n kpi gba!”

10Ka Yawɛ yɛl’ o, “Yuŋ ka yɔɣili maa daa zani bili zooi n-neei biɛɣu niŋ dahin yini ka lan ŋmaligi kpi yuŋ. A bi niŋ li shɛli; pa nyin’ mi n-chɛ ka di zooi, amaa ka a zɔri li nambɔɣu.

11Ka di bi simdi ni man’ gba zo Ninive din nyɛ tin’ titali ŋɔ nambɔɣu gari lala? Dama ninvuɣ’ shɛb’ bɛn be di ni kalinli gari tuhi’ kɔbiga ni pisi, ka nyɛ bɛn ʒi bɛ tooni ni bɛ nyaaŋa m-pahi biŋkɔbiri pam zuɣu.”

← Chapter 3 Jump to: