Luke 16

Dagbani Bible (Naawuni Kundi Kasi)

← Chapter 15 Jump to: Chapter 17 →

1Yisa daa yɛl’ o nyaandoliba, “Bundaan’ so n-daa mali tumtumdi’ kpɛma, ka bɛ ti nyih’ o ni o tumtumdi’ kpɛm’ maa bahir’ o buni maa yoli.

2Ka o daa bol’ o na ti bɔh’ o, ‘Bɔ n-niŋ ka a chɛ ka n go n-wumd’ a yɛla shɛm ŋɔ? Malimi m binshɛɣukam din be a sani laasabu n-zaŋ ti ma, dama a ku lan niŋ n tumtumdi’ kpɛma.’

3Di saha ka tumtumdi’ kpɛm’ maa daa yɛli o suhu ni, ‘N dana yi yihi ma o tuma ŋɔ ni, wula ka n yɛn niŋ? N lan ka yaa din ni tooi tum tuun’ kpɛma, ka mi zɔri vi ni m mali bara.

4Hal o yi kari ma o tuma maa ni pumpɔŋɔ, m mi n ni yɛn niŋ shɛm ka m mini niriba be.’

5Ka bol’ o dan’ maa sandiriba zaa yinoyino na ti bɔhi ŋun daŋ tooni, ‘N dana samli ala n-lee dol’ a?’

6Ka o yɛl’ o, ‘Kpa’ ŋmaŋ’ kɔbiga.’ Ka tumtumdi’ kpɛm’ maa yɛl’ o, ‘Zaŋm’ a gbaŋ yomyom ʒini n-taɣi sab’ pihinu.’

7Ka lan bɔhi so mi yaha, ‘N dana samli ala n-lee dol’ a?’ Ka o yɛl’ o, ‘Za ŋmaŋ’ kɔbiga.’ Ka o yɛl’ o, ‘Zaŋm’ a gbaŋ taɣi sab’ pihinii.’

8Ka tumtumdi’ kpeem’ bilikɔɣino ŋɔ dan’ maa daa paɣ’ o pam o dahin’ shɛli tɛha maa zuɣu, dama bɛn doli zibisim soli dunia ŋɔ ni mali yɛmbimbiɛri bɛ tuma ni gari bɛn doli neesim soli.

9Dinzuɣu n yɛri ya mi, zaŋmiya yi dunia ŋɔ laɣ’ yoya ŋɔ bo simdi, ka di yi ti naai, yi ni tooi kpe nyɛvili din ka bahigu shee.

10Ŋun pal’ alikauli ni bin’ din pɔra ni lan pal’ alikauli ni bin’ din galisi. Ŋun mi bi pal’ alikauli ni bin’ din pɔra ku pal’ alikauli ni bin’ din galisi.

11Dama yi yi bi pal’ alikauli zaŋ chaŋ laɣ’ yoya ŋɔ polo, ŋuni n-lee ni saɣi zaŋ azichi maŋli niŋ yi nuu ni?

12Ka yi yi bi pal’ alikauli ni so bini, ŋuni n-lee ni zaŋ yimaŋmaŋ’ dini ni nyɛ shɛli tin ya?

13Yisa daa lan yɛli yaha, “Yiŋbi’ yino ku tooi jɛm duumanima ayi. O kul ni zaɣisila yino ka yuri ŋun’ la bee n-tibigi yino jɛm o ka ʒiɛm ŋun’ la. Yi ku tooi jɛm Naawuni mini liɣiri.”

14Farisiinim’ bɛn yuri liɣiri pam la ni daa wum Yisa ni yɛli shɛm maa ka bɛ maan’ o ansarisi.

15Ka o yɛli ba, “Yinima n-nyɛ bɛn tiri yimaŋ’ yɛlimaŋli niriba san’ la, amaa Naawuni mi din be yi suhuri ni. Ninsalinim’ ni tibigiri binshɛli pam nyɛla Naawuni ni chihiri shɛli.

16Naawuni zaligunim’ min’ anabinim’ yɛligu daa pun benimi hal ka Jɔn Baptaizira ti kana; di saha maa zaŋ kana zuŋɔ, bɛ kul mooni Naawuni nam lahibal’ suŋ, ka ŋunkam suhu ye di zuɣu kul zaŋdila kpiɔŋ ni o ti kpe di ni.

17Amaa zuɣusaa mini dunia ŋɔ yiɣisibu be asama gari Naawuni fukumsi zaligunim’ ŋɔ ni sabbu bachibil’ fifinyiiŋa gba yiɣisibu.”

18O daa lan yɛli, “Ŋunkam yih’ o paɣa ka kpuɣi paɣ’ so tum zina; ka ŋunkam mi kpuɣi paɣiyihiŋ maa gba tum zina.”

19Yisa daa lan yɛli, “Bundaan’ so n-daa be n-yɛri ago kpariti mini binyɛr’ suma, ka dir’ o suhu yubu sahakam.

20Ka nandaan’ so ŋun yuli daa booni Lazarɔs daa yi chani ti dooni bundan’ maa yiŋ’ dunol’ ni, ka yuma kul nyaɣim o niŋgbuŋ zaa.

21O daa bɔrimi ni o diri bundan’ maa bindir’ burisa din luri tiŋa; ka bahi daa kanna ti leen’ o yuma maa.

22Ka nandan’ maa daa ti kpi, ka malaikanim’ kpuɣ’ o tahi ti yab’ Ibrahimma sani. Ka bundan’ maa gba daa ti kpi ka bɛ sɔɣ’ o;

23ka ŋun’ chaŋ ti bela kpiimba biɛhigu shee nyari azaaba, ka daa ti kpuɣ’ o zuɣu lihi nya ti yab’ Ibrahimma katiŋ’ ha, ka Lazarɔs be o sani.

24Ka o kuhi yɛli, ‘N yab’ Ibrahimma, zom’ ma nambɔɣu n-tim Lazarɔs na ka o ti zaŋ o nubil’ tim kom ni n-tɔɣisi pa n zilinli zuɣu ka di maai, dama n nyari azaaba pam buɣim ŋɔ ni.’

25Ka Ibrahimma yɛl’ o, ‘N yaaŋa, teemi ni a ni daa be a nyɛvil’ ni la, a daa nyar’ a suhu yubu, ka Lazarɔs mi daa nyari wahala, amaa pumpɔŋɔ o suhu maaya, ka a mi be azaaba ni.

26Ka din pahi dimbɔŋɔ zuɣu nyɛla, bɔɣilɔ’ titali n-do ti mini ya sunsuuni, ka so ku tooi yi ti sani m-baai yaɣ’ li ka yi sanna; ka so mi ku tooi yi yi sani ka ti sanna.”

27Di saha ka bundan’ maa lan yɛli, ‘N yaba, n suhir’ a mi ni a tim Lazarɔs m ba yiŋa dunia ni,

28dama m mabih’ anu na beni, ka o chaŋ ti lee saɣisi bɛna, ka bɛn’ ti ku kana ti kpe azaaba shɛl’ ni n ni be ŋɔ.’

29Ka Ibrahimma yɛl’ o, ‘Anabi Musa min’ anabinim’ litaafinim’ be bɛ sani, dinzuɣu chɛ ka bɛ wum di yɛligu ka saɣisi bɛmaŋa.’

30Ka bundan’ maa lan yɛli, ‘N yab’ Ibrahimma, pa lala n-nyɛ li. So n-yi di neei kum ni chaŋ bɛ sani nti yɛli ba, bɛ naan niŋ tuuba.’

31Ka o yɛl’ o, ‘Bɛ yi ku niŋ Anabi Musa min’ anabinim’ yɛligu yɛda, hal so yi neei kum ni chaŋ ti yɛli ba, bɛ ku niŋ o gba yɛligu yɛda.’ ”

← Chapter 15 Jump to: Chapter 17 →