bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Dagbani
/
Dagbani Bible (Naawuni Kundi Kasi)
/
Luke 19
Luke 19
Dagbani Bible (Naawuni Kundi Kasi)
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 20 →
1
Yisa daa ti chaŋ Jɛriko nti tim di tiŋ’ puuni garita,
2
ka Farigudeeriba kpeen’ so ŋun yuli daa booni Zakius ka o nyɛ bundana daa be nimaani.
3
Ka o daa bɔri ni o baŋ Yisa, amaa ka salo zoosim zuɣu daa chɛ ka o kɔŋ o nyabu, dama ŋun’ Zakius daa nyɛla ninvuɣ’ jia.
4
Dinzuɣu ka o daa zo n-daŋ bɛ tooni nti du sinsabiga ni o nya o, dama Yisa daa yɛn dolila ni gari.
5
Ka Yisa daa ti paai sinsabiga maa gbin’ na n-kpalim zani lihi di zuɣu ka yɛli, “Zakius, siɣimina yomyom, dama di kpala talahi ni n kpe a yiŋ’ zuŋɔ.”
6
Ka o dii siɣina ti puh’ o, ka deeg’ o ni suhupiɛlli.
7
Ka salo maa daa nya Yisa ni chaŋ ti kpe Zakius yiŋ’ maa ka ŋumdi bɛ kparima ni yɛra, “O chaŋ ti kpe alahichilan’ la yiŋa!”
8
Ka Zakius daa ti yiɣisi zani n-yɛli ti Duuma Yisa, “N Duuma, n ni zaŋ n nɛma pirigili ti nandaamba, ka n yi daa dila so bini zalinsi, n ni lan labisi dilan’ bini lala siɣimsiɣim bunahi zuɣu ti o.”
9
Ka Yisa yɛl’ o, “Zuŋɔ dabisili ŋɔ ka tiliginsim paag’ a yili ŋɔ na, dama a gba yila Ibrahimma zuliya ni na.
10
Daadam Bia mi kamina ni o ti bo n-nya bɛn bɔrigi la n-tiligi ba.”
11
Yisa daa ŋahi ninvuɣ’ shɛb’ bɛn daa wum o wuhibu maa ŋahili, dama bɛ daa mirila Jɛrusalɛm ka niriba maa tɛhiri ni o dii yɛn chɛmi ka Naawuni nam piligi.
12
O daa yɛliya, “Bilichin’ tital’ so n-daa yɛn go n-chaŋ tinshee katiŋ’ ha nti di nam labina;
13
ka daa bol’ o yiŋbihi pia na nti ti bɛ zaa pɔŋlipɔŋli, ka yɛli ba ni bɛ mal’ li gom’ kɔhigu hal ka o ti labina.
14
Amaa ka o yanim’ daa je o, ka tim tuumba nti yɛli ŋun daa yɛn leeg’ o nam maa ni bɛ je ni doo maa niŋ bɛ naa.
15
Amaa ka doo maa daa ti bahi di nam maa labina, ka daa ti yɛli ni bɛ bolim’ o ni daa zaŋ liɣiri ti o yiŋbi’ shɛb’ ka chaŋ la na ka o ti nya bɛ ni go kɔhigu maa nya nyɔri shɛm tariga.
16
Ka ŋun daa daŋ tooni ka o sanna ti yɛl’ o, “N dana, a pɔŋli la dɔɣila pɔŋ pia.”
17
Ka o yɛl’ o, “Mbo mfaaŋa, bi’ suŋ! A pal’ alikauli ni bin’ din pɔra, dinzuɣu n ni zaŋ tinsi pia fukumsi niŋ a nuu ni.”
18
Ka ŋun pa o zuɣu kana ti yɛl’ o, “N dana, a pɔŋli la dɔɣila pɔŋa anu.”
19
Ka o yɛl’ o, “A mi ni su tins’ anu fukumsi.”
20
Ka ŋun pah’ ata mi kana nti yɛl’ o, “N dana, n-nyɛ a pɔŋli la. N daa zaŋ li gbinila binchɛra ni sɔɣi.
21
A halli zuɣu ka n daa zo a dabiɛm, dama a bɔri ni a nya binshɛɣukam yoli, ka chɛri a ni bi biri binshɛli.”
22
Ka o yɛl’ o, “Nyin’ bi’ biɛɣu ŋɔ, amaŋmaŋ’ nol’ ni yɛtɔɣa ka n yɛn zaŋ kar’ a saria! A mi ni m mali halli, ka bɔri ni n nya binshɛɣukam yoli, ka chɛri n ni bi biri binshɛli bebɔ?
23
Ka bɔ n-daa lee niŋ ka a bi zaŋ n liɣiri maa ti sɔŋ banki ni? N ni di kuli ŋɔ na, n naan ku nya nyɔri pahi n laɣidaya maa zuɣu?”
24
Ka o daa ŋmaligi yɛli bɛn ʒe nimaani maa, “Deemiya pɔŋli maa o sani n-zaŋ pahi ŋun mali pɔŋ’ pia la.”
25
Ka bɛ yɛl’ o, “N dana, pɔŋ’ pia la pun be o sani!”
26
Ka o yɛli ba, “N yɛri ya mi ni ŋunkam mali ni lan nya m-pahi; ka ŋun mi ka ni ti bahi kɔŋ o ni mali biɛla shɛl’ la.
27
Amaa n dimnim’ bɛn daa bi bɔri ni n su ba la, zaŋmiya ba na nti ku ba n nini ŋɔ ni.”
28
Yisa ni daa yɛli ŋ-ŋɔ maa naai ka o yiɣisi n-zaŋ kpa Jɛrusalɛm polo.
29
O ni daa ti miri Bɛtifɛji mini Bɛtani zo’ shɛli bɛ ni booni Olivi Tihi zol’ la gbini ka o tim o nyaandoliba ayi
30
n-yɛli ba, “Chamiya tiŋkpan’ shɛli din be yi tooni ŋɔ ha; yi yi ti paai ni, yi ni nya bun’ so bɛ ni na ʒi m-ba ka o loya ka yi lɔrig’ o na.
31
Ka so yi bɔhi ya ni bɔzuɣu ka yi lɔrigir’ o, yin’ yɛlimiy’ o ni yi Duuma m-bɔr’ o.”
32
Ka o ni daa tim shɛb’ maa chaŋ ti shiri nya o ni yɛli ba shɛm maa.
33
Bɛ ni daa lɔrigiri buŋ’ maa ka bɛn su o bɔhi ba, “Bɔzuɣu ka yi lɔrigir’ o?”
34
Ka bɛ garigi yɛli ba, “Ti Duuma m-bɔr’ o.”
35
Ka bɛ daa zaŋ o tahi Yisa sanna nti zaŋ bɛ binyɛra pa o yaaŋa zuɣu, ka gbaai mal’ o ka o ba.
36
O ni daa ba n-chana, ka bɛ zaŋ bɛ binyɛra teeri sɔŋdi sol’ ni.
37
Ka o daa ti miriti Jɛrusalɛm n-siɣiri Olivi Tihi zolɔŋni ha, ka salo bɛn nyɛ o nyaandoliba suhuri paligi pam, ka bɛ kuhiri yɛri pampam m-paɣiri Naawuni bɛ ni daa nya alahiziba tuun’ kar’ shɛŋa la zuɣu
38
ka yɛra, “Na’ so ŋun mali ti Duuma yuli kanna ŋɔ mal’ alibarika! Suhudoo be alizanda ni! Paɣimiya Zallakudura Naa!”
39
Ka Farisiinim’ shɛb’ bɛn daa be salo maa ni yɛli Yisa, “Karimba, kpahim’ a nyaandoliba maa zuɣu ni ka bɛ fo.”
40
Ka o garigi yɛli ba, “N yɛri ya mi, bɛ yi fo, kuɣa ni deei kuhi yɛli.”
41
Yisa ni daa ti miri Jɛrusalɛm n-nya li o dii gbaala kuhigu ka fabindi di zuɣu
42
yɛra, “Mbaye Jɛrusalɛmnima, zuŋɔ yi yi di baŋ din di naan tin ya suhudoo di di so; amaa pumpɔŋɔ yi bela zibisim ni zaŋ chaŋ di polo.
43
Dama saha kanna ka yi dimnim’ ni ti kana nti teei gili ya, ka lan me bimbin’ kara tabili yi gooni,
44
ka ti daai yi dikiya luhi n-dahimdahim li pa yi mini yi bihi zuɣu; hal ka tandaɣ’ yini gba ti ku lan pa di kpee zuɣu, yi ni bi baŋ saha shɛli Naawuni ni daa kana ni o ti tiligi ya la zuɣu.”
45
Ka Yisa daa chaŋ ti kpe Naawuni jɛmbu duu n-kariti bɛn kɔhiri nɛma yihiri
46
ka yɛri ba, “Di sabiya, ‘Man’ Naawuni duu nyɛla wunsuhigu duu.’ Amaa yinim’ zaŋ li leela ‘ŋmɛnditoya duu!’ ”
47
Ka Yisa daa gbaai niriba wuhibu biɛɣukam Naawuni jɛmbu duu maa ni. Ka maligumaaniba kpamba mini Naawuni zaligubaŋdiba ni tiŋ’ maa ni kpamba daa bɔri so’ shɛli bɛ ni yɛn doli ku o;
48
amaa ka daa bi mi bɛ ni yɛn niŋ shɛm, dama sokam zaa zaɣa daa kul bela o wuhibu maa ni.
← Chapter 18
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 20 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24