Mark 14

Dogri (डोगरी नवां नियम)

1फसह ते खमीर रुट्टी दे त्यार लेई सेर्फ दो देन रेई गेदे हे, प्रधान याजकें ते शास्त्री एस गल्ल दी टूंढ च हे के उसी कियां छल कन्ने पकड़ीऐ मारी ओड़चै;

2लेकन ओ बोलदे हे, “के त्यार दे देन नेई, कुदै ऐसा नी ऊऐ के लोकें च पंगा पेई जा।”

3जदूं बैतनिय्याह शैर च शमौन जिसी कोढ़ हा ते चंगा ओई गेदा हा यीशु ओदे कर च रुट्टी खाणे गी बैठे दे हे, ते उत्थें एक जनांनी संगमरमर दे शीशी च जटामासी दा मैंगा शोद्ध इत्र लेईयै आई; ते ओनें शीशी तोड़ीयै इत्र गी ओदे सिर च पाया।

4लेकन केछ लोग गुस्सै ओईयै अपने मन च बोलन लगे, “एस इत्र दा कि सत्यनाश कित्ता गीया?

5किके ए इत्र ते त्रै सौ दीनार (त्रै सौ देन दी कमाई) कोलां मैंगा बेचियै गरीबें गी बंडी सकदे हे।”

6यीशु ने आखया, “उसी छुड़ी ओड़ो, ते कि सतानदे ओ? ओनें ते मेरे कन्ने पलाई कित्ती ऐ।

7किके गरीब ते थुआड़े कन्ने मेशा रोंदे न, ते तोस जदू चाओ ओसलै गै उन्दे कन्ने पलाई करी सकदे ओ; लेकन मैं थुआड़े कन्ने मेशा नेई रौना ऐ।

8“जे केश ओ करी सकदी ही, ओनें कित्ता, ओनें मेरे गाड़े जाने दे लेई पैलैं गै मेरी दे उपर इत्र डोलया ऐ।

9“आऊँ थुआड़े कन्ने सच आखना ऐ के सारी दुनिया च जिथें बी शोभ समाचार दा प्रचार कित्ता जाग, उत्थें ओदे कम दी चर्चा बी याद कित्ती जाग।”

10ओस बेलै यहूदा इस्करियोती ने जेड़ा बारें चेलें चा एक हा, प्रधान याजकें दे कोल गीया के उसी उन्दे अथ्थ पडकाई ओड़े।

11ओ ए सुनीयै खोश ओए, ते उसी पैसे देना उनै मनी लेत्ता; ते ओ मौका तुपन लगा के उसी केस चाली पडका।

12खमीर रुट्टी दे त्यार दे पैले देन, जेलै फसह दे लेले दी अवन बलि कित्ती जन्दी ही ते ओदे चेलें उसी पूछया, “तू कुत्थें चांना ऐ के अस जाईयै तेरे लेई फसह खाणे दी त्यारी करचै?”

13ओनें अपने चेलें बिचा दों गी ए बोलिऐ पेजया, “शैर च जाओ, ते एक मनुक्ख पानी दा कड़ा चुके दा तुसेंगी मिलग, ओदे पिछें चली जायो;

14ते ओ जेस कर च जाग, ओस कर दे मालके गी बोलेयो, गुरु बोलदा ऐ के मेरी मेजबानी जिदे च आऊँ अपने चेलें कन्ने फसह खां ओ कुत्थें ऐ?

15“ओ तुसेंगी एक सजी सजाई, ते तयार कित्ती दी बड़ी अटारी दसी ओड़ग, ते उत्थें साड़े लेई तयारी करयो।”

16चेलें निकलियै शैर च आए, ते जियां ओनें उनेंगी गलाया हा, उनै उयांगै ओ लबा; ते फसह दा खाणा तयार कित्ता।

17जेलै शाम ओई, तां ओ बारें चेलें दे कन्ने आया।

18जेलै ओ बेईयै पोजन करा दे हे, ते यीशु ने आखया, “आऊँ तुसेंगी सच आखना ऐं के थुआड़े बिचा एक, जेड़ा मेरे कन्ने रुट्टी खा करदा ऐ, ओ मिगी पड़काई ओड़ग।”

19उन्दे बेच दुआसी छाई गेई ते ओ एक-एक करियै उसी पूछन लगे, “के ओ आऊँ ऐं।”

20ओनें उनेंगी आखया, “ओ बारें बिचा एक ऐ, जेड़ा मेरे कन्ने थाली च अथ्थ पांदा ऐ।

21किके आऊँ मनुक्ख दा पुत्तर, जियां ओदे बारै च लिखे दा ऐ, जनदा गै; लेकन बसोस ओस मनुक्ख उपर जेदे दवारा आऊँ मनुक्ख दा पुत्तर पड़काया जन्दा ऐ! जे ओस मनुक्ख दा जन्म गै नेई ओंदा, ते ओसदा पला ओंदा।”

22जेलै ओ रुट्टी खा दे गै हे, यीशु ने रुट्टी लेई ते शीर्वाद मंगीयै तोड़ी ते उनेंगी देईयै आखया, “इसी लेयो; ए मेरी देह ऐ।”

23पी ओनें प्याला लेता शुक्र करियै उनेंगी दिता ते उनै सारे ओदे चा पीता।

24पी ओनें उनेंगी आखया, “ए बायदे दा मेरा ओ खून ऐ जेड़ा मतें दे लेई बगया जन्दा ऐ।

25आऊँ थुआड़े कन्ने सच आखना ऐं, आऊँ दाख दा रस ओस देन तकर कदें बी नेई पीगा, जदू तकर परमेसर दे राज च नमां नेई पीगा।”

26पी ओ पजन गाइयै बार जैतून दे पाड़ उपर गै।

27पी यीशु ने उनेंगी आखया, “तोस सारे ठोकर खागे, किके लिखे दा ऐ; आऊँ गुआल गी मारगा, ते पिड्डां तितर-बितर ओई जागन।

28लेकन आऊँ अपने जिन्दे ओनें दे बाद थुआड़े थमां पैलैं गलील जिले गी जागा।”

29पतरस ने उसी आखया, “जेकर सारे ठोकर खांन तां खांन, लेकन आऊँ ठोकर नेई खागा।”

30यीशु ने ओस कन्ने आखया, “आऊँ तेरे कन्ने सच आखना के अज्ज गै रातीं दो बार कुकड बांग देने थमां पैलैं, तू त्रै बारी मेरे लेई मुकरी जागा।”

31पर ओनें ओर बी जोर देईयै आखया, “जेकर मिगी तेरे कन्ने मरना बी पौग, तां बी आऊँ तेरा एनकार कदें बी नेई करगा।”

32पी यीशु ते चेलें गतसमनी नां दे एक जगह च आए, ते ओनें अपने चेलें गी आखया, “इत्थैं बैठी रवो, जदू तकर आऊँ प्रार्थना करा।”

33ते ओ पतरस ते याकूब ते यूहन्ना गी अपने कन्ने लेई गीया; ते बड़ा गै परेशान ओन लगा,

34ते ओनें आखया, “मेरा मन बड़ा दूआस ऐ, इत्थैं तकर के आऊँ मरने उपर आं; तोस इत्थैं ठैरो ते बिजे दे रवो।”

35पी ओ थोड़ा अगें गीया ते तरती च पेयिये प्रार्थना करन लगा के जेकर ओई सके ते ए कड़ी मेरे उपरा टली जा।

36ते आखया, “ए अब्बा, ए प्यो, तेरे लेई सब केछ ओई सकदा ऐ; एस दुख दे कटोरे गी मेरे कोलां चुकी लै; तां बी जियां आऊँ चांना इयां नेई, लेकन जेड़ा तू चानां ऐ उवै होवे।”

37पी ओ आया ते ओनें उनेंगी सुत्तें दे दिखयै ते पतरस गी आखया, “शमौन, तू सवे करना ऐ? के तू एक कड़ी बी नेई बीजी सकदा?

38बिजे दे ते प्रार्थना करदे रवो के तोस परिख्या च नेई प्यो। आत्मा ते तयार ऐ, पर जिंद कमजोर ऐ।”

39ते पी ओ चली गै ते उच्ची बाज च प्रार्थना कित्ती।

40पी आईयै उनेंगी सुते दें दिखया, किके उंदी अख्खीं िनंदर कन्ने परोची दीहां; ते नेई जांनदे हे के, के जबाब देचै।

41पी ओनें त्री बार आईयै उनेंगी आखया, “के तोस सुते दे, ते बसां करो, बस ओ घड़ी आई पूजी ऐ। दिखो, मनुक्ख दा पुत्तर पापियें दे अथ्थ पड़काया जा दा ऐ।

42उठो, चलो! दिखो, मेरा पडकाने आला कोल आई पूजया ऐ!”

43ओ आखादा गै हा, इन्नें तकर यहूदा इस्करियोती, जेहड़ा बारै बिचा एक हा, अपने कन्ने प्रधान याजकें ते शास्त्रियें ते प्राचीन थमां पेजे दे पीड, तलवारां ते डंडे लेईयै तौलै आई पूजे,

44ओदे पड़काने आले ने उनेंगी ए पता दिते दा हां कि जिसी आऊँ चूमगा उवै ऐ; उसी पकड़ीयै ओशयारी कन्ने लेई जाए ओ।

45ओ आया, ते एकदम ओदे कोल जाईयै आखया, “हे गुरु!” ते उसी बड़ा गै चूमया।

46पी उनै ओदे उपर अथ्थ पाईयै उसी पकड़ी लिया।

47उन्देचा जेड़े कोल खडोते दे हे, एक ने तलवार खिचीये महायाजक दे दास उपर चालाई, ते ओदा कन बड़ी दिता।

48यीशु ने उनेंगी आखया, “के तोस डाकू समझीयै मिगी पकड़ने लेई तलवारां ते लाठियाँ लेईयै निकले ओ?

49आऊँ ते अर देन मंदर च थुआड़े कन्ने रेईयै शिखया दिंदा हा, ते ओसलै तुसें मिगी नेई पकड़या; लेकन ए एसकरी ओया ऐ के पवित्र शास्त्र दियां गल्लां पूरीयां ओन।”

50एस गल्ल उपर उसी सारे चेलें छुड़ीयै नसी गै।

51एक जवान ओदे पिछें चला दा हा। ओनें अपने नंगी जिंद उपर सेर्फ मलमल दी चादर ओढ़ी दी ही। ते लोकें उसी पकड़या,

52पर ओ मलमल दी चादर छुड़ीयै नंगा गै नसी गीया।

53पी ओ यीशु गी महायाजक दे कोल लेई गै; ते सारे प्रधान याजकें, प्राचीन ते शास्त्री किट्ठे ओई गै।

54पतरस दूरे दा गै महायाजक दे बेड़े तकर ओदे पिछें-पिछें चली गीया हा। ओ पैरेदार कन्ने बैठीयै उत्थें अग्ग सेकन लगा।

55प्रधान याजकें ते सारी महासभा यीशु गी मारी ओड़ने बासतै ओदे विरोध च गवाही दी खोज च हे, लेकन नेई मिली।

56किके मते गै ओदे खलाफ च चुठी गवाही देआ करदे हे, लेकन उन्दी गवाही इकै जेई नेई ही।

57ओलै केछ लोकें उठीयै ओदे खलाफ ए चुठी गवाही दिती,

58“असैं इसी ए आखदे सुनया ऐ, ‘आऊँ एस अथ्थ दे बनाए दे मंदर गी टाई ओड़गा, ते त्रै धयाडें च दूसरा बनाई ओड़गा, जेड़ा अथ्थ कन्ने नेई बना ओग।’”

59एदे उपर बी उन्दे गवाही इकै जेई नेई निकली।

60पी महायाजक ने बिच खड़े ओईयै यीशु गी पूछया, “तू कोई जबाब कि नेई दिता? ए लोक तेरे खलाफ च के गवाही दिंदे न?”

61लेकन ओ चुप रिया ते ओनें कोई जबाब नेई दिता। महायाजक ने उसी पी पूछया, “के तू ओस परमप्रधान दा पुत्तर मसीह ऐ?”

62यीशु ने आखया, “हां आऊँ ऐं; ते तोस मनुक्ख दे पुत्तर गी समर्थमान दे सजे पासे बैठे दे, ते अम्बर दे बादलें दे कन्ने आंदे दिखगे।”

63पी महायाजक ने अपने चोगा फाड़ियै आखया, “हुन असेंगी गुआईयें दी के लोड़

64तोस ए निंदया सुनी चुके ओ। हुन इंदे उपर थुआड़ी के राय ऐ?” ते उनै सारें उसी प्राण-दण्ड दे योग कसुरबार आखया।

65पी केछ लोक ओदे उपर थूकन लगे, ते ओदी अखीयाँ उपर पट्टी बनियै मुके मारन लगे ते उसी आखन लगे, “औने आली गल्लां सना!” ते पैरेदार पकड़ीऐ ओदे मुंह उपर चंढा मारीयां।

66जेलै पतरस थल्लै बेड़े च हा, ते महायाजक दी दासी बिचा एक उत्थें आई,

67ते पतरस गी अग्ग सेकदे दिखया ते कुरियै उसी दिखियै आखया, “तू बी तां ओस यीशु नासरी दे कन्ने हा।”

68लेकन ओनें मुक्रदे आखया, “आऊँ नां ते जानदा ते नां गै समझदा के तू के बोला दी ऐं पी कुकडै त्री बांग दिती।”

69उसी दिखियै ते कोल खडोईयै लोकें गी ओ दासी पी आखन लगी, “ए तां उन्दे चेलें चा एक ए!”

70लेकन ओ पी मुकरी गीया। थुड़े चेर बाद जेड़े कोल खड़ोते दे हे उनै पी पतरस गी आखया, “पक्का तुं उन्देचा एक ओना ऐ; किके तू गलीली बी ऐं।”

71ओस बेलै ओ अपने आप गी कोसना ते कसमां खाणा लगया; “कि आऊँ ओस मनुक्ख गी जेदी तोस चर्चा करा दे ओ नेई जानना!”

72ते तौलै गै कुकडै दुई बार बांग दिती। पी पतरस गी ओ गल्ल जेड़ी यीशु ने उसी बोली ही, याद आई गेई, “कुकडै दी दो बार बांग देने थमां पैलैं तू त्रै बार मेरा एनकार करगा।” ते ओ फूटी-फूटी रौन लगा।

← Chapter 13 Jump to: Chapter 15 →