1 Thessalonians 5

Galacian 1989 (Biblia SEPT)

← Chapter 4 Jump to:

1Tocante ó tempo preciso, irmáns, tampouco non precisades que vos escriba,

2que vós mesmos sabedes á perfección que o "Día do Señor" chegará coma o ladrón pola noite.

3Cando anden dicindo: "paz e seguridade", daquela caerá de súpeto sobre eles a desfeita, do mesmo xeito que lle veñen as dores á muller embarazada; e, de certo, non han de escapar.

4Pero vós, irmáns, non estades nas tebras, para que ese día vos sorprenda coma o ladrón,

5xa que todos vós sodes fillos da luz, fillos do día: non somos da noite nin das tebras.

6Polo tanto, non adormezamos coma os demais; máis ben, esteamos vixiantes e manteñamos o propio control.

7Pois os que dormen, dormen pola noite, e os que se emborrachan, emborráchanse pola noite.

8Pero nós, que somos do día, manteñamos o propio control, revestidos coa coiraza da fe e da caridade e co casco da esperanza da salvación.

9Pois non nos destinou Deus á ira, senón á consecución da salvación polo noso Señor Xesús Cristo,

10que morreu por nós para que, vivos ou mortos, pasemos a vivir con el.

11Polo tanto, aconselládevos e confortádevos uns a outros, como xa o facedes.

12Rogámosvos, irmáns, que sexades considerados cos que traballan entre vós, presidíndovos no Señor e catequizándovos.

13Tédeos no máis grande aprecio e amor polos seus traballos; e que entre vós haxa paz.

14Exhortámosvos tamén, irmáns, a que fagades entrar en razón ós inconstantes, que lles deades azos ós abatidos, que coidedes dos febles e que teñades paciencia con todos.

15Mirade que ninguén lle devolva a ninguén mal por mal; polo contrario, procurádevos sempre o ben uns ós outros, e a todos.

16Estade sempre alegres.

17Orade constantemente.

18Dade grazas en todas as ocasións: que isto é o que Deus quere de vós coma cristiáns.

19Non apaguedes o Espírito;

20non desprecedes as palabras inspiradas.

21Examinádeo todo e agarrádevos ó que é bo.

22Arredade de toda especie de mal.

23Que o Deus da paz vos santifique totalmente: que todo o voso ser espírito, alma e corpo se conserve indemne na Parusía do noso Señor Xesús Cristo.

24Pois o que vos chama é fiel, e hao facer.

25Irmáns, rogade tamén por nós.

26Dádelles o saúdo a todos os irmáns co ósculo santo.

27Esconxúrovos polo Señor a que se lles lea esta carta a todos os irmáns.

28Que a graza do noso Señor Xesús Cristo vos acompañe.

← Chapter 4 Jump to: