1 Peter 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Hesu Crísto ohasa asýgui hetépe, peñembosako’íke peẽ avei pehasa asy hag̃ua. Upe ohasa asyva’ekue hetépe opoi hembiapo vaígui.

2Ani peikove umi ára hembýva gueteri peẽme, yvyarigua rete rembipota vaípe, peiko uvei Ñanderuete rembipota porã poguýpe.

3Heta ára peikova’ekue voi yvyarigua rete rembipota vaípe, ku ojerovia’ỹvaicha Ñanderuete rehe, umíva ningo: Teko vai, mba’epota vai, ka’u, karuguasu, ka’u atyguasúpe ha ñemomba’eguasu avei jára gua’úpe.

4Ha’ekuéra ipochy penendive, peẽ napemoirũvéimagui ichupekuéra ijyvyarigua rete rembipota vaípe ha upévare oñe’ẽ vaiete penderehe.

5Og̃uahẽva’erã pe ára ha’ekuéra oñemombe’u hag̃ua pe mbojovakehára oñembosako’íva renondépe, Ha’e ombojovakeva’erã umi omanova’ekuépe ha umi oikovévape.

6Oñemyasãi ramojepe pe s alvacion rape umi omanova’ekuépe, oñembojovake hag̃ua hetépe yvyarigua oikovévaicha, ojohu hag̃ua ipytu porãme tekove Ñanderuete rupi.

7Opaite mba’e, opapotaite upévare peñeñangarekóke peñembo’e hag̃ua hekoitépe.

8Opaite mba’e ári toĩ pende apytépe pe mborayhu añeteguáva. Pe mborayhu añetegua omo’ã tembiapo vaikueita jepe, (Tiágo 5,20).

9Peñombohupa peñeko’õi’ỹre.

10Peñopytyvõ pe Pytu Porãmbáva me’ẽmby rupi, Ñanderuete ome’ẽ haguéicha peteĩteĩme umi hemime’ẽmby juavymbyréva apytégui. Peiporu hekópe umi me’ẽmby peteĩ capataz iporãvaicha ambuekuérape g̃uarã.

11Oimérõ peteĩ ojeroviáva oñe’ẽ, toñe’ẽ Ñanderuete oñe’ẽrõ guáicha ha’érupi; oimérõ peteĩ ojeroviáva oporopytyvõ, toipytyvõ hapichápe Ñanderuete pu’aka rupi; opaite me’ẽmby rupi toñemomba’eguasúnte Ñanderuetépe, Hesu Crísto rupi. Imba’e ningo pe teko jajaipa ha pu’aka, ára atyguasukuéra rupi, taupéicha (amen).

12Che rayhupára ani pejepy’apy pejepy’ara’ã ramo, pehasárõ guáicha tata rendy rupi; koichagua jepy’ara’ã ojehuva’erã voi pe ojeroviáva rekovépe.

13Pevy’a uvei peimeháre avei Hesu Crísto jehasa asýpe, péichamante pevy’aiteva’erã avei Hesu Crísto ojehechaukaha ára peẽme, Ha’e ou jevývo arai apytépe.

14Pevy’a ambuekuéra pendeja’o ramo Hesu Crísto réra rehehápe, Ñanderuete Pytu Porãite jajái oĩgui pende’ári.

15Ani avave pende apytégui ohasa asy ojuka haguére, térã omonda haguére, térã mba’evai ojapo haguére térã ijurumy’ỹi haguére.

16Oime ramo ohasa asy Hesu Crísto reheguáva ramo, anítei otĩ; ha’e tomomba’eguasu uvei Ñanderuetépe, oñembohéra haguére ichupe Hesu Crísto reheguáva ramo.

17Og̃uahẽma ningo pe ára oñepyrũ hag̃ua pe ñembojovake Ñanderuete rogayguakuérape g̃uarã. Ha ñandéve raẽ oñepyrũ ramo, mba’épa oikóne amo ipahápe umi ojerovia’ỹva’ekue Ñanderuete ñe’ẽ porãite rehe.

18Hasy ramo pe heko potĩva ojesalva hag̃ua, mba’épa oikóne umi hembiapo vaívagui ha umi omboykéva Ñanderuetépe.

19Upévare ningo umi ohasa asýva Ñanderuete oipotágui, tomoĩ hi’ánga Ñanderuete pópe ha oñemomirĩvo tojapo mba’eporã.

← Chapter 3 Jump to: Chapter 5 →