1 Peter 5

Guarani 2015 (Ñanderuete Ñe’ẽ Porã 2015)

← Chapter 4 Jump to:

1Che poavisase peẽ karai ancianokuérape, (pemyakãva pe iglésia rembiapo), che voi peteĩ pende reheguáva, che ningo peteĩ techahare ohechava’ekue Hesu Crísto ohasa asy hague, ha oñeme’ẽta chéve che rendag̃ua Ha’e ou vove heko jajaipa reheve.

2Peñangareko porãke Ñanderuete ovecha aty rehe, ani pejopy ichupekuéra, py’aporã reheve uvei, ha vy’apópe peneñe’ẽrendu Ñanderuete rembipotápe. Ani peiko ijovecha rerekua ramo pirapire rehehápe.

3Anítei peiko ovecha aty jára ramo, peiko uvei mba’e rechaukaha (ejémplo) porã ramo.

4Ha Hesu Crísto ningo pe ovecha rerekuaguasu, ojehechaukaha árape oñeme’ẽta peẽme peteĩ akã jeguaka (coróna) heko jajaipa reheguáva oñembyai’ỹva máramo.

5Upéicha avei peẽ mitãrusu ha kuñataĩkuéra peñemoĩ karai ancianokuéra poguýpe. Peñemomirĩke, Ñanderuete voi oñemoĩgui umi oñembotuicháva rehe; upe oñemomirĩvape katu Ha’e ohechauka ipy’aporãha.

6Upévare peñemomirĩkena Ñanderuete po mbarete poguýpe, Ha’e penemopu’ã hag̃ua hi’árape.

7Opaite pende jepy’apykuéra peity hi’ári, Ha’e ningo oñangarekohína penderehe.

8Peñemoakãguapy ha peñeñangarekóke, pe mba’epochy (Satana) penerãirõséva oikógui pende jerekuévo, leõ okororõvaicha, ha oheka mavapépa ho’úta.

9Peñemoĩ hese, pejejoko hatãvo pende jerovia rehe, peikuaa porãvo koichagua jehasa asy oñemoĩtaha avei pene hermanokuéra rekovépe, oikóva guive ko yvy apére.

10Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.

11Ichupe g̃uarã oñeme’ẽma pu’aka ára atyguasukuérape g̃uarã, amen.

12Silváno rupi, ñane hermáno hekoite peguáva, chéverõ g̃uarã, ahaiuka ko kuatiañe’ẽ mbykymi pomokyre’ỹ hag̃ua ha pepyta hatã hag̃ua Ñanderuete mborayhu añeteguáva ha ipu’aka poguýpe.

13Umi iglesiayguakuéra oikóva Babilóniape, Ñanderuete oiporavomava’ekue avei, penemomaiteiuka ha avei che ra’y Márcos.

14Peñomomaitei mborayhu ñehetũ reheve. Tapendepy’aguapy opaite peẽ pejeroviáva guive Hesu Crísto rehe.

← Chapter 4 Jump to: