2 Corinthians 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Che, Páblo, ajerure asy peẽme ñañemomirĩ ha jaiko hag̃ua Hesu Crísto py’aporãme, oĩ ramojepe he’íva cherehe añembotuichaha ha chepy’aguasuha aime ramo mombyry pendehegui, ha pende apytépe katu che añemomirĩ gua’u ha chepy’amandyjuha.

2Ajerure katu peẽme aime ramo pende apytépe ani hag̃ua peẽ chejopy, añe’ẽ pohýi hag̃ua umi he’ívape, aikoha che yvyarigua rete rembipota vai poguýpe.

3Ore roiko ramojepe gueteri ore retepype, ore rete rembipota noisãmbyhýi ore ñorãirõ Pytu Porãmba reheguávape.

4Umi ñorãirõ rembiporu roiporúva (ndaha’éi kyse, ni mboka), roiporu uvei Hesu Crísto reko ha Pytu Porãmbáva pu’aka roity hag̃ua orerehe ija’e’ỹvape, oñemombarete ramojepe hikuái ijerekuévo peteĩ tápia ijyvateitéva reheve,

5upéicha ore roity yvýre ijyvy arigua arandu ha ipensamiénto vai oñemoĩva Ñanderuete arandu ha iñe’ẽ rehe ha rojapyhy ichupekuéra oñemomirĩ hag̃ua avei Hesu Crísto renondépe ha iñe’ẽrendu hag̃ua Ñanderuetépe.

6Upévare ore roñembosako’íma rohavira hag̃ua oimeraẽvape oñemoĩva’ekue Hesu Crísto rehe, peẽ peneñe’ẽrendupa jevy rire oréve.

7Pema’ẽ porã umi mba’e rehe oĩva pene renondépe. Oimérõ pende apytépe upe ojeroviáva ijehe ha’e Hesu Crísto mba’eha, tohechauka porã hekove rupi, ha’e Hesu Crísto mba’eha.

8Che añembotuicha ramojepe Hesu Crísto cherenói haguére hemimondo ramo (ijapóstol ramo) che natĩmo’ãi, Ha’e katu chemondo aporomopu’ã hag̃ua, ndaha’éi ambyai hag̃ua.

9Ko kuatia ñe’ẽ rupi che ha’e peẽme ani hag̃ua peimo’ã che pomongyhyjesenteha.

10Umi oñemoĩva cherehe katu he’i voi: Ikuatiañe’ẽ rupi ha’e oñe’ẽ pohýi ha ipy’aguasuha oimégui mombyry, ha oĩ ramo Hesu Crísto reheguáva apytépe ipy’amirĩ ha oñe’ẽporã kuaa’ỹvaicha.

11Ha umi péicha he’íva toikuaa porã, ore rohai haguéicha ore kuatiañe’ẽme ore roñe’ẽ jevyva’erã pende apytépe.

12Ore noroñembojojaséi umi ojupénte oñembotuicháva rehe, ni ndoroikoséi ha’ekuéra oiko háicha, ko’ãva oñeha’ã ojuehe ha oñembojoja avei ojuehe ha péicha ohechauka naiñakã porãiha.

13Ore noroñembotuichaséi, Ha’e voi orerenóigui romba’apo hag̃ua hembiapópe ha péicha ore rog̃uahẽ avei pene rendápe.

14Ore ndorojúi hekope’ỹ pene rendápe, roju katu Ñanderuete orembou haguére pene rendápe, Ñanderuete ñe’ẽ porãite reheve.

15Ore noroñembotuichái romba’apo haguére kokue ambuépe ore rembiapórõguáicha, roha’ãrõnte okakuaa porãve hag̃ua pende jerovia ikatu hag̃uáicha peẽ pehechakuaa avei ore rembiapo pende apytépe,

16ha roñeha’ã romyasãi hag̃ua Ñanderuete ñe’ẽ porãite ambue tavakuérape oĩva guive pende ypýpe térã mombyry oñemyasãi’ỹ haguépe gueteri Hesu Crístope, ore noroñembotuicháigui ambue tembiapo rupi.

17Upe oñemomba’eguasuséva, tomomba’eguasu Ñanderuetépe.

18Ndopyta porãi upe oñemoĩ porãséva ojupe, ojererohoryva’erã upe Ñanderuete omomorãvape uvei.

← Chapter 9 Jump to: Chapter 11 →