2 Corinthians 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Che ajererovuveva’erãmante, naiporãi ramojepe, amombe’uségui umi ta’ãnga ha umi mba’e Hesu Crísto ohechaukava’ekue chéve chepayetépe (visiónpe).

2Aikuaa ningo peteĩ kuimba’épe ojeroviáva Hesu Crísto rehe, ojapóma 14 áño, ojehupiva’ekue yvága mbohapyha peve, ndaikuaaiete katu hete reheve, térã hete’ỹ rehevépa.

3Ha pe kuimba’e, hetépe térã hete’ỹre, che ndaikuaái, Ñanderuete katu oikuaa porã,

4ojehupiva’ekue paraísope, ha upépe ohendu ñe’ẽ ikatu’ỹva oje’e ha ndaikatúiva oñembohasa yvyariguakuérape.

5Upévare ajererovuse, chejehénte katu ndajererovúi, che kangykue rehénte uvei ajererovuse.

6Ha che ajererovuse ramojepe, che ndachetarovái, che ha’égui pe añetegua. Che ajejoko katu, ani hag̃ua avave oimo’ã che mba’eguasuha, ohechávare cherehe térã ohendúva rehe chehegui.

7Ha ani hag̃ua che añembotuichaiterei pe ojehechaukava’ekue rehe chéve, oñemoĩ che retépe peteĩ ñuatĩ hakua chekutúva, peteĩ Satana ángel cherovapeteva’erã, ani hag̃ua che añembotuichaiterei.

8Mbohapy jevy che ajerure asy Ñanderuetépe oipe’a hag̃ua ko mba’e kóva chehegui.

9Ha’e katu ombohovái chéve: Iporãntema (ovaléma) ndéve che poriahuvereko pu’aka. Che pu’aka ojehechauka porãmbáre ikangývape g̃uarã. Upévare che py’aite guive añembotuichase che kangykue rehe uvei, omba’apo porãve hag̃ua chepype Hesu Crísto pu’aka.

10Upévare avy’a chekangykue rehe, jeja’ópe, temikotevẽme, jehasa asýpe, persecuciónpe, jejopy vaípe, ahasava’ekue Hesu Crísto rehehápe; péicha ningo ojehu, chekangy ramo, chembarete.

11Che añembotarováma añembotuicha haguére, peẽ katu chemuña muña kóvape g̃uarã. Peẽ cherechakuaa porãva’erãmo’ã, mba’evépe che nachemichĩvéi umi apóstol oñembotuichávagui, che ndaha’éi ramojepe mba’eve.

12Opáichavo umi mba’e ojehuva’ekue rupi pende apytépe ohechauka che, apóstol añeteguaha: Paciéncia, techaukaha (señáles) ha pu’aka rembiapo (milágro, techapyrã) rupive.

13Mba’épepa peẽ penemichĩve ambue Hesu Crísto iglésiagui, ndaikói haguérente peẽme g̃uarã peteĩ cárga pohýi ramo (ndaipotáigui pende contribucion), peperdonami ko che jejavy kóva.

14Peikuaa porãke añembosako’íma aha hag̃uáicha pene rendápe mbohapyha jevýma ha ndachepohyiséigui peẽme, ndahekáigui pende pirapire, peẽmente poheka; ndaijái ta’yrakuérape oñongatu heta mba’erepy ituvakuérape g̃uarã, tuvakuéra ita’yrakuérape g̃uarãnte uvei.

15Che katu, py’aporãme, aiporúta arekóva guive peẽme g̃uarã, ha che rekove jepe ame’ẽse pene ánga rayhupápe, peichaite che pohayhu, mba’éguipa upémaramo peẽ chemboyke ha ndacherayhu porãséi.

16Chete voi ndachepohýiri ramojepe peẽme, oĩ umi oimo’ãva che pombotavy hague ha peẽ peike hague che ñuhãme.

17Añete piko che pombotavýra’e che remimondo ohova’ekue rupi pene rendápe.

18Añetehápe che amondo Títope pene rendápe peteĩ ñane hermáno ndive, ha’ekuéra piko penembotavýra’e. Ndoroikóipara’e ore peteĩ Pytu Porãmbáva poguýpe. Ndoroikói piko ra’e hekópe oñondivepa pende apytépe.

19Are guivéma ningo peimo’ã ore roñemoĩ porãseha pene renondépe. Ñanderuete ha Hesu Crísto renondépe katu ore roñe’ẽ opaite ko’ã mba’e ko’ãva, peẽ che rayhuhára pekakuaa porã hag̃ua pende jeroviápe.

20Akyhyje ningo ag̃uahẽvo pene rendápe ndapojohúirõ che aipota háicha, ha peẽ chejohúrõ avei ndapeipotái háicha. Akyhyje oĩ ramog̃uarã pende apytépe: Ñorãirõ, ha’éntese, pochy, juavy, jererovu, sarambi.

21Che akyhyje aha jevýrõ pene rendápe Ñanderuete chemomirĩ ramog̃uarã pene renondépe, ha che añembyasyetéta heta oñemohembiapo vai haguére ha ndojevy porãmbái gueteri Ñanderuete rape potĩme, ndopoipáigui hembiapo vaígui, ni hekomeg̃uágui, ni heko ky’águi.

← Chapter 11 Jump to: Chapter 13 →