Colossians 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Che, Páblo, Hesu Crísto remimondo (apóstol), Ñanderuete rembipota rupi, ha che hermáno Timotéo roguerahauka ko kuatiañe’ẽ kóva,

2ore hermanokuérape, ojeroviáva guive Hesu Crísto rehe; Ñandejára Ñanderuete jopói iporãmba jepéva (grácia) ha ipy’aguapy toĩ penendive.

3Ore roagradece Ñandejára Hesu Crísto Rúpe ore roñembo’e jave penderehe,

4rohendu guive peẽ pejerovia porãha Hesu Crísto rehe ha pehayhuhapeína opaite Hesu Crísto reheguávape.

5Ha roagradece pe esperánza peẽ peguerekóva ha oñeñongatúva peẽme g̃uarã yvágape, péva pehendumava’ekue oñemombe’úvo peẽme Ñanderuete salvacion añeteguáva.

6Péva og̃uahẽma avei peẽme og̃uahẽ haguéicha ko yvy tuichakuépe. Ko Ñanderuete salvacion ñe’ẽ hi’a ha okakuaa porã opárupi ha péicha avei pende apytépe pe ára pehendu ha pejerovia guive añetehápe Ñanderuete perdon rehe.

7Upéicha penembo’eva’ekue avei Epáfras, ore irũ rohayhuetéva, ha’e ningo peteĩ Hesu Crísto rembiguái heko peguáva peẽme g̃uarã.

8Ha’e avei omombe’u oréve pe mborayhu pe Pytu Porãmbáva omoingova’ekue pendepype.

9Upévare ningo ore avei rohenduha ára guive, noroñembo’e poíri penderehe ha rojerure penerenyhẽ hag̃ua hembipotágui ha opaite arandu ha kuaapy Pytu Porãmbáva reheguágui.

10Peẽ peiko hag̃ua hekópe ija háicha Hesu Crísto reheguávape, pembovy’a hag̃ua ichupe tapende’a opaite tembiapo porãme ha pekakuaa pehóvo Ñanderuete kuaapy arandúpe.

11Tapeñemombarete opaite Ñanderuete reko jajái pu’akápe, peropu’akapa hag̃ua paciéncia ha vy’a reheve.

12Peagradece Ñanderuetépe penembokatupyrýgui pehupity hag̃ua avei Ñanderuete resape peteĩ jopói ramo.

13Ñanderuete ñaneguenohẽ Satana rembiapo ypytũ vai poguýgui ha ñandeguerova Ita’ýra ohayhuetéva retãguasúpe.

14Ipype ningo Ha’e ñandesalva ha ñanemopotĩ ñane rembiapo vaígui.

15Hesu Crísto, Ñanderuete ndojehecháiva ra’ãnga, Ha’e ningo Ñanderuete rembiapo ypykue, Ha’e omoingova’ekue ichupe ñepyrũmbýpe.

16Ñanderuete ojapopa Hesu Crísto rupi oĩva guive yvagakuérape, térã yvy ári, umi mba’e ojehecháva ha umi ndojehecháiva, taha’e guapyhaguasukuéra, taha’e jarakuéra, taha’e mburuvichaguasukuéra, taha’e pu’akakuéra. Opaite mba’e ojejapo Ha’érupi (Hebreoyguakuérape 1,2).

17Ha’e ningo oikóma opaite mba’e mboyve, ha Ha’érupi ha ichupe g̃uarã oñemoingo opaite mba’e.

18Hesu Crísto ningo pe tete akã, he’iséva ijiglésia akã. Ha’e ningo pe ñepyrũ, pe oñemoingove jevymava’ekue omanova’ekue apytégui; opaite mba’épe, Ha’e ningo pe tenondeguáva.

19Ñanderuete oipota Hesu Cristopype oĩmba Ñanderuete reko.

20Hesu Crísto rupínte oĩ perdon opaite tetãyguakuérape g̃uarã, Ha’e oguerúgui pe py’aguapy yvága pegua huguy rupínte, oñeñohẽva’ekue ikurusúre.

21Ha peẽ avei peñemomombyry ha peñemoĩva’ekue Ñanderuete rehe pende py’apýpe pene rembiapo vai rupi.

22Ko’ág̃a katu Hesu penemoingo porã jevy, hete omanógui peẽ peiko Ñanderuete renondépe heko potĩva ha heko ky’a’ỹva ramo ani hag̃ua oñe’ẽvai hikuái penderehe,

23upévare pepyta hatãkena pende jeroviápe, peñemongu’e’ỹre akatúa ni asu gotýo, ha aníke peñemomombyry ichugui, ha ani pepoi Ñanderuete ñe’ẽ porãgui, ni pe esperánza Ha’e oguerumava’ekuégui peẽme. Ko evangélio pehendumava’ekue ha oñemyasãiva opaite yvy apére, che, Páblo, aiko ko evangélio rembiguái ramo, ha aipytyvõ oñemyasãive hag̃ua ohóvo.

24Ko’ág̃a ningo avy’a che ahasa asyháre penderehehápe ha che amyenyhẽve ahávo che retépe pe jehasa asy (sufrimiénto) oñemoĩmba hag̃ua umi jehasa asy Hesu Crísto retépe, Hesu Crísto rete ningo hína pe iglésia (Apostolkuéra rembiapo 9, 16; Filipoyguakuérape 1,29; 1 Pédro 2, 20; 2. Timotéope 3, 12).

25Ha che aiko ko iglésia rembiguái ramo Ñanderuete cherenóigui amyasãi hag̃ua opaite iñe’ẽ,

26ha imba’e ñemi (secréto) ojaho’íva ára atyguasukuéra guive ha ore ypykuéra ymaite guive, ko’ág̃a katu ojekuaauka heko potĩvape.

27Ichupekuéra Ñanderuete oikuaaukase mba’épa ko mba’e ñemi he’ise: Heko jajaipa ituicha ha iporãitéva ningo Hesu Crísto voi tetãnguérape g̃uarã, ha Ha’e pende esperánza pehupity hag̃ua avei heko jajaipa.

28Ore romombe’u Ñanderuete mba’e ñemi, péva ningo Hesu Crísto, roavisa ha rombo’e opaite tetãyguakuérape, opaite arandúpe, peteĩteĩ oñembohekove hag̃ua avei Hesu Crísto rekopype,

29upevarã che voi añeha’ãmba, ha añeha’ãmbaite ipu’aka rupi.

Jump to: Chapter 2 →