Colossians 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Peikove jevy ramo (penace jevy ramo) Hesu Crísto ndive, peheka umi mba’e yvateguáva, Hesu Crísto oguapyhápe Ñanderuete akatúape.

2Peheka umi mba’e yvága peguáva, ani yvy ariguáva.

3Pemanova’ekue, ko’ág̃a katu pende rekove oñemihína Hesu Crísto ndive Ñanderuetepype.

4Hesu Crísto ningo ñande rekove, ha Ha’e ouha ára pejupáta avei hendive Hesu Crísto rekojajaipa rendápe.

5Upévare, pejukákena pende rete rembipota vai, ojejokosévante ko yvy arigua mba’e rehe, ha anítei peiko oñondive pemenda’ỹre, pejuka pende reko raku ha pene remiandu vai ha’enteséva, péva ningo jára gua’u ñemomba’eguasu.

6Ko’ã mba’evai rupi Ñanderuete ipochy umi iñe’ẽrendu’ỹva ndive.

7Ha opaite ko’ã mba’e pejapómi avei, peiko ramoguare gueteri pende rekove tujápe.

8Ko’ág̃a katu pepoi pehóvo avei opaite ko’ã mba’evaígui: Pochy, ñeko’õi, ñaña, maldicion ha ñe’ẽ tie’ỹ anítei osẽ pende jurúgui.

9Anítei pendejapu ojupekuéra, pepoi (pemboi) haguére pendejehegui pe yvyarigua reko tujakue hembiapo vaikue reheve,

10pemonde haguére pe tekove pyahu, kóva ningo oñembopyahuve ohóvo ha oñembojojave ohóvo ñande apohare reko rehe ha peikuaa porãve pehóvo ichupe, peikove hag̃ua avei Hesu Crísto rekópe.

11Oĩháme ko tekove reko pyahu ndojuavýi ojuehegui Greciaygua ha Judaygua, ipire’i oñekytĩ’óva (oñecircuncidáva) ha noñekytĩ’óiva, tetã ambueygua ha ka’aguygua (escítas), tembiguái ha jára; Hesu Crísto oĩ hag̃ua opaite mba’épe ha opavave rekovépe.

12Ñanderuete pendeporavo, penemboheko potĩ ha penderayhúgui peñemonde jeporiahuvereko mborayhu reheve, py’a porã, ñemomirĩ, pochykuaa’ỹ, paciéncia.

13Pejogueropu’aka ha peñoperdona, oime ramo oñemohembiapo vaíva; Hesu Crísto peneperdona haguéicha upéicha peperdona avei pende rapichápe.

14Opaite ko’ã mba’e ári pemonde mborayhu, péva ningo ombojoaju porã añetetehápe.

15Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

16Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive.

17Ha opaite mba’e pejapóva guive pene ñe’ẽ térã pene rembiapo rupi, pejapo Ñandejára Hesu Crísto rérape ichuperõguáicha ha peagradece Ñandejára Ñanderuetépe Hesu Crísto rupi.

18Pe tembireko iñe’ẽrenduva’erã iménape, ija háicha Hesu Crísto reheguávape.

19Peẽ ména pehayhu añetehápe pene rembirekópe, ha anítei pembopy’aro ichupekuéra.

20Peẽ mitãkuéra peneñe’ẽrendu pende ru ha pende sýpe, upéva ningo ombovy’a Ñanderuetépe.

21Peẽ tuvakuéra anítei pemoñeko’õi pende ra’y ha pende rajykuérape, ani hag̃ua naikyre’ỹvéi.

22Peẽ tembiguaikuéra (esclávo) peneñe’ẽrendu opaite mba’épe pende jára yvy ariguápe (patrónpe), anítei pemba’apo porãnte pende jára yvy arigua resa renondépente, pembovy’a hag̃ua ichupe, tapiákena pemba’apo porã uvei pende py’aite guive, pekyhyjégui Ñanderuetégui.

23Opaite pejapóva guive, pejapo pende py’aite guive pejapórõ guáicha Ñanderuetépe g̃uarã, ha ani yvyariguápente.

24Peikuaa porã voi Ñanderuete ome’ẽtaha peẽme pe yvága remime’ẽ (tekove opa’ỹva) pene rembiapo porã repykue ramo, upévare pemba’apo tembiguái porãva ramo Ñanderuetépe g̃uarã.

25Upe hembiapo vaívape ningo oñeme’ẽta hembiapo vai repy, Ñanderuete ombojovakégui hekoitépe, ha jaikuaa Ha’e noporombojuavyiha yvyariguakuéra apytégui.

← Chapter 2 Jump to: Chapter 4 →