Ecclesiastes 11

Guarani 2015 (Ñanderuete Ñe’ẽ Porã 2015)

← Chapter 10 Jump to: Chapter 12 →

1Emyasãi ne rembi’u (pirapire) umi yguasu apére; heta áño rire ou jevyva’erã.

2Emboja’o katu 7 térã 8 pehẽnguépe; ndereikuaáigui mba’eichagua mba’evaípa oukuaa ne renonderãme ko yvy apére.

3Umi arai henyhẽte ramo ýgui, oñehẽmbava’erã yvy apére, ha peteĩ yvyra ho’a ramo sur gotýo térã nórte gotýo, opytáta ho’a haguépe.

4Upe oikóva oma’ẽ yvytu rehe, noñemitỹmo’ãi; ha upe oma’ẽva arai rehe, noikytĩmo’ãi iñemitỹnguéra.

5Nde ndereikuaái háicha pe yvytu rape, ni mba’éichapa pe mitã kangue okakuaahína pe kuña hyeguasúva ryépe, peichaite ndereikuaái avei Ñanderuete rembiapo, Ha’e ojapopavahína.

6Pyhareveitépe eñotỹ ne mba’e ra’ỹingue, ha ka’aru ani remombytu’u nde po; ndereikuaáigui mba’épa rehupitýta ko’ã mokõi mba’e apytégui, kóa térã amóa.

7Añetehápe pe ára sakã peteĩ mba’e kyrỹi asy, ha pe kuarahy resape ombovy’aite ñande resakuéra,

8upévare yvyariguakuéra oikovéva heta áño tovy’aite oikove aja, ha’e ta’imandu’a katu avei umi ára naiporãivare, katuete og̃uahẽva’erãha avei. Opaite mba’e ojehutavahína heko nandiha.

9Evy’áke nde, mitãrusu, nemitãrusu aja, ha tanderoryete ndekaria’y aja, ejapo nde py’apýpe reñandúva ha nde resa oipotáva; eikuaa porã katu Ñanderuete ombojovaketaha hekópe opaite ne rembiapokue taha’e iporãva taha’e ivaíva.

10Emosẽ ne ñeko’õi nde py’apýgui, ha emboyke nde ro’ógui (rekógui) pe mba’evai; pe karia’y arakuéra pya’e ohasáta ha ne akã rague hũ veráva oñemomorotĩmbáta avei.

← Chapter 10 Jump to: Chapter 12 →