Ecclesiastes 12

Guarani 2015 (Ñanderuete Ñe’ẽ Porã 2015)

← Chapter 11 Jump to:

1Nemandu’ákena nde apohare rehe ne mitãrusu árape, og̃uahẽ mboyve umi ára naiporãiva, nanembovy’áiva ha ereva’erãme: Ndavy’aiete ningo;

2katuete pe kuarahy, pe ára sakã, pe jasy ha mbyjakuéra, oñemoypytũ ou vove umi arai hũetéva amaguasu reheve,

3ha oryryipa ramo umi óga ñangarekohára, ha ikarapãmbáma ramo umi kuimba’e imbaretéva, ha nomba’apovéi ramo umi mba’e ra’ỹi mongu’ihára, ha umi tesa iñypytũ ramo umi ovetã guive oma’ẽva;

4ha oñemboty ramo umi okẽ oka gotyoygua, ndahyapu’atãvéigui umi mba’e ra’ỹingue mongu’iha (molíno); ha avei umi guyra ñe’ẽ; ha umi tajýra purahéi jepeve noñehenduvéima;

5upéramo ha’e okyhyjeva’erã ojupi hag̃ua pe cérro, ha okyhyjeva’erã oguejy jevy hag̃ua; pe alméndro máta ipotyva’erã, ha pe tuku guata imbegueteva’erã ha pe tembi’u mboheha oñembyaíma pe tapicha péva ohóguima hendag̃ua apyre’ỹme, ha umi ojahe’óva ojere jereva’erã umi tape vai rupi.

6Pe tekove sã (inimbo óro morotĩguiguáva) osóma, ojekáma pe ña’ẽmbe oroguiguáva (tekove), ha pe kambuchi (tekove) ojekáma ho’águi pe ruéda dágua oguenohẽva pe y;

7ha pe yvy timbo (tetekue) oguejýma yvýpe ou haguégui, ha pe pytu porã ohóma Ñanderuete rendápe, Ha’e voígui ijapohare.

8Nde karia’y ejepy’amongeta porã opaite ko’ã mba’e rehe, he’i pe ñemoñe’ẽhára, opaite ko’ã mba’e ohasa pya’eiterei ha heko nandi voi ningo.

9Ha pe ñemoñe’ẽhára Salomon iñaranduve ohóvo, ko’yteve ombo’e arandu hetãyguakuérape; ha’e oñeha’ãmba oikuaa ha oitypeka hag̃ua heta mba’e. Uperire oñembyaty ha ojehai Salomon ñe’ẽ arandukuéra ko kuatiañe’ẽ kóvape.

10Pe ñemoñe’ẽhára oñeha’ãmbaite ojapo hag̃ua ikatúva guive, ha ojohu hag̃ua ñe’ẽ oporombopy’a rorýva, ha ohai hag̃ua hekoitépe ko’ã ñe’ẽ añeteguáva rehe.

11Umi iñarandúva ñe’ẽ ojoguaite ñuatĩ ha clávope; ko ñemoñe’ẽhára ñe’ẽ katu ojogua avei umi yvyra akuápe (poste’ípe), ovecha rerekua omoingéva yvýpe ojoko hag̃ua hóga rymba pirekueguiguáva.

12Che ra’y, ko’ã mba’e rupi che roavisase. Pe kuatiañe’ẽ apo ndaijapýrai; ha upe oestudia hetáva omokane’õ hetépe.

13Pe ñemoñe’ẽ paha oñehenduva’ekue ningo kóa: Ekyhyje Ñanderuetégui, ha ejapo hembiapoukapykuéra; péva hína pe iporãvéva kuimba’e ha kuñakuérape g̃uarã.

14Ñanderuete ombojovakéta opaichagua yvyarigua rembiapo, ta’iporã térã ta’ivai, ñemiháme ramojepe ojejaporaka’e ko’ã mba’e.

← Chapter 11 Jump to: