Ezekiel 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Ou che rendápe mbovymi umi karai anciáno, ha oguapy che renondépe.

2Ha Ñanderuete ñe’ẽ ou chéve, ha he’i:

3Kuimba’e ra’y, ko’ã kuimba’e ko’ãva ome’ẽma ipy’apy (iñe’ã) ambue járape ha omomba’eguasu ñemiháme ichupekuéra, upévagui Che nambohovaimo’ãvéima ichupekuéra.

4Ere ichupekuéra: Péicha he’i pende Ruete, oimeraẽ kuimba’e Israel retãgui ome’ẽva’ekue ipy’apy ambue járape omomba’eguasu hag̃ua ñemiháme ichupe ha ou ramo pe proféta rendápe, Che voi, pende Ruete, añe’ẽta upévape, hembiapo vaikue ojerure háicha.

5Che amombáyta Israel retãygua py’apy, oñemboykégui chehegui omomba’eguasu hag̃ua jára gua’úpe.

6Upévare, ere Israel retãme: Péicha he’i pende Ruete, pepoi pene rembiapo vaígui ha peheja pende jára gua’úpe ha pemboyke pende resa opaichagua tembiapo ky’águi.

7Ha oimeraẽ kuimba’e Israel retãme ha opaite tetã ambueygua oikóva Israel retãme, oñemboykéva guive che rapykuérigui, ha ome’ẽmava’ekue iñe’ã omomba’eguasu hag̃ua ambue járape, ha upéi ha’ekuéra ou ramo che proféta rendápe omba’eporandu hag̃ua chéve, Che, pende Ruete, añe’ẽta ichupe chejehegui hembiapo vaikue ojerure háicha hesekuéra.

8Ha amoĩta che rova upe kuimba’e upévarehe, Che amoĩta ichupe techaukaha ha jehavira ramo, ha ahundíta ichupe che retã apytégui, peikuaa hag̃ua Che ha’eha pende Ruete.

9Ha pe proféta ombohasa ramo peteĩ ñe’ẽ añetegua’ỹva, he’ívo Che voi, pende Ruete, amoĩ hague ko ñe’ẽ kóva ipy’apýpe, upepete Che aipysóta che po hese, ha ahundíta ichupe che retã Israel apytégui.

10Ha mokõivéva ojehaviráta oñemohembiapo vai haguére; upe omba’eporandúva ha upe proféta japu.

11Anivéma hag̃ua Israel retãygua ojei che rapykuérigui, ha anivéma hag̃ua oñemongy’a hembiapo vai rupi; oiko hag̃ua uvei che retãtee ramo, ha Che aiko hag̃ua ichupekuéra Ijaratee ramo, he’i pende Ruete.

12Ñanderuete ñe’ẽ ou chéve, ha he’i:

13Kuimba’e ra’y, peteĩ tetã oñemohembiapo vai ramo ha oñemoĩ ramo cherehe iñaña reko rupi, Che avei amopu’ãta che po hi’ári, amopokãta hi’upyrã ha amboúta ñembyahýi ajukauka hag̃ua yvyarigua ha hymbakuéra ijapytekuéragui,

14ha oĩ ramojepe ijapytepekuéra, Noe, Daniel ha Job, ha’ekuéra ijupénte osalva hekovekuéra oiko porã haguére, he’i pende Ruete.

15Ha amondo ramo peteĩ tetãme mymba saite iñarõva amonandi hag̃ua hetãyguakuéragui, avave ndohasasemo’ãvéi upérupi umi mymba saite ñarõnguéra apyte rupi,

16ha ko’ã mbohapy kuimba’e ko’ãva oiko ramo pe tetã mbytépe, che rekove rehe, he’i pende Ruete, ita’yrakuéra ha itajyrakuéra jepeve ndojesalvamo’ãi; ha’ekuéra añoiténte ojesalvava’erã, hetãyguakuéra katu omanombáta.

17Ha agueru ramo kyse puku pe tetãme, ha Che ha’e ramo: Pe kyse puku ohasava’erã pe tetãpy rupi ojuka hag̃ua hetãyguakuérape ha hymbakuérape,

18ha ko’ã mbohapy kuimba’e ko’ãva oiko ramo pe tetãpýpe, che rekove rehe, he’i pende Ruete, ndosalvamo’ãi ita’yrakuéra ni itajyrakuérape, ha’ekuéra añoiténte ojesalváta.

19Térã ambou ramo mba’asy iñasãiva pe tetãpýre ha añohẽ ramo che pochy hi’arikuéra amáicha osyry hag̃ua huguy ajukauka jave hetãygua ha hymbakuérape,

20ha oiko ramo upe tetãpýpe Noe, Daniel ha Job, che rekove rehe, he’i pende Ruete, ha’ekuéra ndosalvamo’ãi ita’ýra ni itajyrakuérape; ha’ekuéra osalváta hekovénte, oiko porã rupi.

21Upévare péicha he’i pende Ruete: Che ambou ramojepe Jerusalen ári irundy che jehavira ivaietéva: Kyse puku, ñembyahýi, mymba ñarõita ha mba’asy iñasãiva, ajuka hag̃ua hetãygua ha hymbakuérape,

22upeichavéramo jepe hembýta ijapytégui umi oguerútava ita’ýra ha itajýrape pene rendápe, ha pehecha ramo hape porã ha hembiapo porã, pendepy’a pytu’úta umi mba’evaieta ambouva’ekuére Jerusalen ári.

23Pene ánga opytu’úta pehecha vove hape ha hembiapo porã, ha pehecháta ndareiriha ajapo hague hesekuéra umi mba’e ajapomava’ekue, he’i pende Ruete.

← Chapter 13 Jump to: Chapter 15 →