Ezekiel 40 — Guarani 2015 (Ñanderuete Ñe’ẽ Porã 2015)

1Roiko rire 25 áño jepokuapýpe, pe áño pyahu oñepyrũ vove, pe ára 10-hápe, ha 14 áño haguépe Jerusalen ho’a rire ambue tetã poguýpe, upe ára upévape ou cheári Ñanderuete po, ha chegueraha (kepeguáicha) Jerusalénpe.

2Payetépe Ñanderuete chegueraha Israel retãme, ha chemoĩ peteĩ cérro ijyvateitereíva ári, ha hi’ári oĩ umi óga ojoguaitereíva peteĩ tavaguasúpe, ha opytáva sur gotýo.

3Chegueraha upépe, ha péina peteĩ ángel, hete ojoguáva bronceguiguávape; ha ipópe oguereko peteĩ sã ha peteĩ yvyra po’i ojeporúva métro ramoguaicha oñeha’ã (omedi) hag̃ua; ha ha’e oñembo’y Ñanderuete róga rokẽguasúpe.

4Ha ha’e oñe’ẽ chéve, ha he’i: Kuimba’e ra’y, ema’ẽ porã nde resa rupi, ha ejapysaka porã nde apysa rupi, ha eñongatu nde py’apýpe opaite mba’e ahechaukátava guive ndéve, upévagui rejegueru ko’ápe, ahechauka hag̃ua ndéve umi mba’e; nde rembohasa hag̃ua ne retãyguakuérape, opaite mba’e ojehechaukáva guive ndéve.

5Ha ahecha peteĩ korapyjere yvate ojeréva okáguio Ñanderuete rogaguasu rehe ha pe yvyra po’i ñeha’ãha (métro) pe ángel oguerekóva ipópe ipuku 3,07 métro; ha ko métro reheve ningo oha’ã pe korapy yvatekue 3,07 métro ha ipykue 3,07 métro.

6Upéi ou pe kuarahyresẽha rokẽme, ha ojupi upe jupiha (escaléra) rupi, ha oha’ã pe okẽ pyenda ha ojohu 3,07 métro ha ambue okẽ pyenda ipy avei 3,07 métro.

7Ha pe koty’i ipuku ha ipy 3,07 métro; ha umi koty’i opyta ojuehegui 2,55 métro; ha umi okẽ pyenda hyepy gotýo ojeikehápe oha’ã avei 3,07 métro.

8Ha pe ángel oha’ã pe ogaguy oĩva pe okẽ ryepy gotýo, ha ipuku 3,07 métro.

9Uperire oha’ã pe okẽguasu ojeikeha, ha ipuku 4,08 métro ha umi horcon ipoguasu 1,02 métro ha pe ogaguy opyta hyepy gotýo.

10Ha pe okẽguasu oĩva kuarahyresẽ gotýo oguereko mbohapy koty’i ijakatúa gotýo ha mbohapy ijasu gotýo, ituichakue peteĩcha meme ha horconguéra oĩva ijykekuéra peteĩcha meme avei.

11Ha upéi oha’ã pe okẽ ojeikeha, ha ipekue oha’ã 5,10 métro ha ijyvatekue 6,63 métro.

12Ha umi koty’i renondépe oĩ peteĩ kora’i oha’ãva 0,51 métro, peteĩteĩ ijyképe, ha umi koty peteĩteĩ ipuku 3,07 métro ha ipe 3,07 métro.

13Uperire oha’ã pe okẽguasu pykue peteĩ koty’i ape guive ambue koty’i ape peve, ha oguereko 12,75 métro.

14Ha oha’ã umi horcon korapy pegua ha ipukukue oha’ã 30,60 métro ha umi koty’i oĩ ijerekuévo.

15Ha pe okẽ renonde pegua ojeikeha guive pe okẽ ojeikeha hyepy gotyogua peve, ohupity 25,50 métro.

16Ha hyepýguio oĩ ovetã po’i umi koty’ípe, umi horcon gotýo, pe ogaguy hyepýguio oĩ avei ovetã po’i ijerekuévo ha umi horcon rehe oĩ mbokaja ra’ãnga.

17Upéi chegueraha pe korapy hyepy gotyoguápe, ha ijerekuévo ojejapo peteĩ tape itaguiguáva ojeguata hag̃ua umi 30 koty peve, oĩva upépe.

18Ha pe korapy píso tape itaguiguáva ojepyso umi okẽguasu ykére, peteĩcha ipekue ha ipukukue.

19Upéi oha’ã pe korapy pykue pe okẽ guasu yvy gotyogua renonde guive ambue okẽguasu hyepy pegua peve, ha ohupity 51 métro.

20Ha upéi oho pe okẽguasu oĩva pe korapy hyepy gotyogua nórtepe, ha oha’ã ipukukue ha ipykue.

21Ha oĩ mbohapy ikoty’i peteĩ yke gotýo, ha upéicha avei ambue yke gotýo; ha umi horcon ha umi ogaguy tuichakue ojoguaite pe okẽguasu tenonde peguávape, ipukukue oha’ã 25,50 métro ha ipykue 12,75 métro.

22Hovetãnguéra ha umi ogaguy ha imbokaja ra’ãngakuéra ituicha peteĩcha umi okẽguasu kuarahyresẽ gotyoguaichaite; ha ojejupi 7 py pyrũha rupi, ha hyepývo opyta pe ogaguy.

23Ha oĩ ambue okẽguasu pe korapy ryepy gotyoguápe ha opyta pe okẽguasu nórte pegua ha kuarahyresẽ megua rovái, ha ha’e oha’ã peteĩ okẽguasu guive ambue okẽguasu peve 51 métro.

24Upéi ha’e chegueraha sur gotýo, ha péina upépe oĩ ambue okẽguasu ha ha’e oha’ã umi koty’i, umi horcon ha pe ogaguy ha ituichakue ambuekuéraichante avei.

25Oĩ ovetãnguéra, ambue ovetãnguéraicha, pe ogaguy jerekuévo; ipukukue ohupity 25,50 métro ha ipykue 12,75 métro.

26Ijejupiha (escaléra) oguereko 7 py pyrũha, ha pe ogaguy oĩ henondepekuéra; ha peteĩ yke gotýo oguereko mbokaja ra’ãnga, ha péicha avei ambue yke gotýo.

27Ha pe korapy hyepy gotyogua sur gotýo oĩ avei peteĩ okẽguasu; ha oha’ã 51 métro peteĩ okẽgui ambue okẽ sur gotyogua peve.

28Upéi ha’e chegueraha upe korapy hyepy gotyoguápe ha ahasa pe okẽguasu rupi oĩva sur gotýo, ha oha’ã upe okẽ sur gotyogua ha ojoguaite ambuekuérape.

29Ha peichaite avei ikoty’i, horconguéra ha pe ogaguy, ha oguereko ovetãnguéra ijerekuévo rehe ambue oguereko háicha; ipuku 25,50 métro ha ipy 12,75 métro.

30Ha pe ogaguy ipuku 12,75 métro ha ipy 2,55 métro.

31Ha pe ogaguy opyta pe korapy oka gotýo, ha umi horcon rehe oĩ mbokaja ra’ãnga; ha ijejupiha (escaléra) oguereko 8 py pyrũha.

32Uperire chegueraha pe korapy ryepy gotyoguápe kuarahyresẽ gotýo, ha oha’ã pe okẽ ha ojoguaite ambuekuérape avei.

33Ha umi ikoty’i horconguéra ha ogaguy peteĩcha oñeha’ãmba ambuekuéraicha, pe ogaguy jerekuévo oĩ avei hovetãnguéra; ipuku 25,50 métro, ha ipy 12,75 métro.

34Ha pe ogaguy opyta korapy oka pegua gotýo, ha umi horcon rehe oñemoĩ mbokaja ra’ãnga mokõive yke gotýo; ha ijejupiha oguereko avei 8 py pyrũha.

35Upéi chegueraha pe okẽguasu nórte gotyoguápe, ha oha’ãvo ojohu ambuekueraichanteha avei;

36Ikoty’ikuéra, horconguéra, pe ogaguy ha hovetãnguéra oñemoĩ ijerekuévo, ipukukue oha’ã 25,50 métro ha ipy 12,75 métro.

37Pe ogaguy oĩva pe korapy oka pegua gotýo, ha umi horcon rehe oĩ mbokaja ra’ãnga mokõivéva ykére; ha ijejupiha oguereko avei 8 py pyrũha.

38Ha oĩ upépe peteĩ koty, ha hokẽ opyta pe okẽguasu horcon rehe; upépe ojejohéi umi kuave’ẽmbyrã.

39Ha pe ogaguýpe, pe okẽguasu oĩháme, ahecha mokõi mesa peteĩ yke gotýo, ha mokõi mesa ambue yke gotýo, ojuka hag̃ua hi’ári hymbakuéra oikuave’ẽ hag̃ua kuave’ẽmby ojehapypáva ramo, kuave’ẽmby hembiapo vai reheguáva ha kuave’ẽmby heko ky’a reheguáva.

40Ijyke oka pegua gotýo, pe okẽguasu yvateoyguápe ojeikehápe oĩ mokõi mesa; ha ambue okẽguasu yképe pe ogaguy oĩháme ahecha avei mokõi mesa.

41Péicha irundy mesa peteĩ yke gotýo, ha irundy mesa ambue yke gotýo, pe okẽguasu ypýpe; oñondive oĩ 8 mesa, ha hi’arikuéra ojuka hymbakuéra oñekuave’ẽtava.

42Ha oĩve irundy mesa itaguasúgui ojejapova’ekue umi kuave’ẽmby ojehapypava’erãvape g̃uarã, hi’ári oñemoĩ umi kuave’ẽmby rembiporu ojeporúva ojejuka hag̃ua umi tymba, ko’ã mesa ipuku 76,5 centímetro, ipy 76,5 centímetro ha ijyvate 51 centímetro.

43Umi mesa jerekuévo oñemboja peteĩ alfajía (liston), ipekue 7,6 centímetro, ha ko’ã mesa ári oñemoĩ tymba ro’o oñekuave’ẽtava.

44Upéi pe ángel chegueraha pe okẽguasúgui ha roike pe korapy ryepýpe, opytáva pe okẽguasu yvateoygua ypýpe, upépe oĩ mokõi koty, peteĩ koty opyta pe okẽguasu yvateoygua ykére, ha oma’ẽva sur gotýo, ha pe ambue koty opyta pe okẽguasu kuarahyresẽ gotyogua ykére ha oma’ẽva nórte gotýo.

45Ha pe ángel chererahava’ekue he’i chéve: Ko koty oma’ẽva sur gotýo opyta pa’ikuérape g̃uarã, oñangarekóva Ñanderuete rogaguasu rehe.

46Ha pe koty oma’ẽva nórte gotýo opyta umi pa’ípe g̃uarã oñangarekóva kuave’ẽmby renda rehe; ko’ãva Sadoc ra’yre, umía oñehenói Levi ra’yrekuéra apytégui, omba’apo hag̃ua Ñanderuetépe g̃uarã.

47Ha’e oha’ã pe korapy pukukue 51 métro ha ipekue 51 métro; peteĩcha irundyve ijyke; ha pe kuave’ẽmby renda opyta Ñanderuete rogaguasu renondépe.

48Upéi ha’e chegueraha pe Ñanderuete rogaguasu rokẽme, ha oha’ã umi 2 horcon guasuetéva, ha peteĩteĩva ipoguasu 2,55 métro; ha pe okẽguasu ipekue oha’ã 1,53 métro.

49Ha pe ogaguy ipuku 10,20 métro, ha ipy 6,12 métro, ha upépe oĩ peteĩ escaléra ojupi hag̃ua; ha oĩ avei mokõi horcon guasu ambue horconguéra ypýpe, peteĩ ijakatúape ha ambue ijasúpe.