Ezra 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Ojejapopa rire ko’ã mba’e, umi Júda pegua karai anciáno, ou che rendápe, ha he’i: Israel retãygua, umi pa’i ha Leviguakuéra noñemboykéi ambue tetãnguéragui oikóva avei ko tetãme: Umi Canaanguágui, Hetguágui, Ferezguágui, Jebusguágui, Amonguágui, Moabguágui, Egiptoyguágui ha Amorguágui, oiko vai uvei hikuái.

2Omomendágui ita’yrakuéra tetã ambueygua rajykuérare, ha upéicha oñembojehe’apa ko’ã tetãygua ñemoñarenguéra rehe, ko yvy oikóvape, ha mburuvicha ha sãmbyhyharakuéra voi oñemotenonde ko tembiapo vai kóvape.

3Ahendúvo ko’ã mba’e, amondoro che ao ha che póncho, ahekýi avei che akã rague ha che rendyva rague, ha aguapy ajepy’apyete apytávo.

4Ha oñembyaty chendive umi okyhyjéva guive Israel Jára ñe’ẽgui, umi jepokuaha peguáre hembiapo vaietereígui; ha che apyta ajepy’apyetereihápe pe kuave’ẽmby ka’arugua hóra peve,

5ha pe ka’arugua kuave’ẽmby hóra og̃uahẽvo apu’ã che jepy’apyhágui, che ao ha póncho mondoropyre reheve, añesũ ha añembo’e che Ruete, che Járape.

6Ha ha’e: Che Jára, che py’a tarova ha atĩeterei amopu’ã hag̃ua Che Jára renondépe ko che rova, ko’ã ore rembiapo vaiete oñemboheta hetavégui ore akã ári, ha ore rembiapo vaikue (angaipa) okakuaáma yvága peve.

7Ore rukuéra ára guive ko ára kóva peve roiko angaipa poguýpe, ore ha ore retã ruvichakuéra ha ore pa’ikuéra rembiapo vai rehe, Nde, ore Ruete, oremoĩ tetã ambueygua poguýpe, kyse puku poguýpe, jepokuahápe, ñemondápe ha ñemotĩme oñu’ã ore rova ojehu háicha avei ko’ág̃a.

8Ha ko’ág̃a Nde, ore Ruete, oreporiahuvereko rehejávo peteĩ aty hembýva gueteri pe jepokuahágui, oñeme’ẽ hag̃ua oréve Ñanderuete rogaguasu rendag̃uami ha nde resape oremombaretemi jevy ha roiko jevy hag̃ua ore Jára poguýpe.

9Ore ningo tembiguaikuéra, ha roiko ramojepe tembiguái ramo, ore Ruete naoremotyre’ỹi, oñohẽ uvei ore ári iporiahuvereko, Pérsia retã ruvichakuéra rupi oremoingove hag̃ua, romopu’ã hag̃ua Ñanderuete rogaguasu ha romyatyrõ jevy hag̃ua hóga itaperepáva, ha Ha’e oñangareko jevy hag̃ua orerehe Judéa ha Jerusalénpe.

10Ha ko’ág̃a, mba’e piko ro’éta ko’ã mba’e rire ore Ruetépe, ore voi ningo ropoiva’ekue ne rembiapoukapýgui,

11Nde voi ereva’ekue oréve ne rembiguái profeta kuéra rupi: Pe yvy mamo peikehápe peñemomba’e hag̃ua hese; umi tetã oikova’ekue ko yvy kóvape oñemongy’apa, omyenyhẽ ko yvy kóvape heko vaietereígui nórte guive sur peve.

12Ha ág̃a napeme’ẽveiva’erã pende rajykuéra ita’yrakuérape, ni ndapegueruiva’erã itajyrakuérape pende ra’ykuérape g̃uarã, ha araka’eve ndapehekaiva’erã ipy’aguapy ni iñemopu’ã; peñemombarete uvei peẽ voi ha pe’u ko’ã yvy koga’a, ha pembohasa pende ra’ykuérape tembieja ramo opaite árape.

13Ha ág̃a opaite mba’evaieterei ha ore rembiapo vaieterei ramojepe, Nde, ore Jaratee, ndaorehaviravéima ore ñaña reko hekoitépe, reheja uvei ko aty kóvagui hemby hag̃ua.

14Ropyrũ jevýtapa ne rembiapoukapy rehe, ha romendátapa ko’ã tetãygua oñemboheko vaietereíva. Nandepy’aromo’ãi piko orendive orembokusuguepa peve, opytave’ỹre avave okañykuaáva ndehegui.

15Ore Ruete, Israel Jára, Nde ningo rejapo porã rehejávo peteĩ aty hemby hag̃ua gueteri. Péina ápe ropyta ne renondépe ore rembiapo vaikue reheve; ndaikatúi ningo ojeiko nde ypýpe ko’ã mba’evai reheve.

← Chapter 8 Jump to: Chapter 10 →