Habakkuk 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Che ahase che táva ñangarekohára (guárdia) rendápe, oĩva pe táva kora ári ha upépe apytáta aha’ãrõ hag̃ua mba’épa Ñanderuete ombohováita che ñe’ẽ aporanduva’ekuére.

2Ha Ñanderuete ombohovái chéve ha he’i: Ehai peteĩ kuatiápe umi mba’e ahechaukátava ndéve payetépe (visiónpe).

3Umi mba’e nde rehechátava katuete ojehúta hi’araitépe, oñembopya’e pya’e ojehu hag̃ua, ha ndaijapumo’ãi, hi’aréta ramojepe ojehu hag̃ua, eha’ãrõ, katuete oúta, ndahi’areitereivéima oiko hag̃ua ko’ã mba’e ko’ãva.

4Eikuaa porãke, heko potĩ’ỹva oñembotuicháta ipy’apýpe, pe heko potĩva katu ijerovia rupínte oikoveva’erã.

5Pe víno oporombotavy, ha umi kuimba’e ha kuñakuéra oñembotuicháva ndoiko aremo’ãi, ha’ekuéra tapia ombohetaveseve ohóvo hembipota vai, ku ñemanóicha nahyg̃uatãmo’ãi, ombyatypa peve ijupe g̃uarã umi tríbu ha mayma tetãnguérape.

6Ko’ãva nomopu’ãichénepa ñe’ẽnga ha ñe’ẽ ñembohory heseguáva. Ha he’i hikuái: Angái, angái upe omboheta hetaveva’ekue imba’e’ỹva. Araka’e pevépa oikóta upe ombyaty mbyatýva imba’e’ỹva.

7Noñemoĩchénepa nderehe ha reha’ãrõ’ỹre ndopayichénepa umi rejopy ha rembotyryryva’ekue ha nde re’a rire ipópe ha’ekuéra oipe’apa jevýta remondava’ekue ichuguikuéra.

8Nde remonda haguéicha heta tetãme, upéicha umi tetã hembýva omondapa jevýta reguerekóva guive, rejopy etereígui heta nde rapichakuéra ha reñohẽ haguére heta tetãygua ruguy.

9Cháke, nde rembyatýva nde róga yvatépe umi mba’e remondava’ekue, rekañy hag̃ua pe ára vairãgui.

10Nde rembyaty nde rógape g̃uarã ñemotĩguasu, nde rehundíma heta tetãme, ha ne rembiapo vai rupi nde voi reñehundíta avei.

11Nde róga itakuéra oĩva nde tápia yvatépe ha umi víga osapukáita oñemoĩvo nderehe.

12Cháke, nde remopu’ãva tuguy rupi pe táva ha ñembotavy rupi pe óga yvate.

13Peikuaa porãke, ko’ã mba’e ou voihína ángel atykuéra Járagui. Umi tetã omba’apo ha oñemokane’õ rei tatápe g̃uarã.

14Ko yvy apére ojekuaapaitéta Ñanderuete reko jajaipa, pe y oñu’ãmba háicha yguasu.

15Cháke upe omonga’úva pohã vai reheve hapichápe, ha upéi ohechávo ha’e ijopivoha opuka ha oñembohory hese, ko kuimba’e kóva ombopochy Ñanderuetépe.

16Ne rerakuã iporã rãngue reñemohyg̃uatã ñemotĩgui, ko’ág̃a ndeháma, nde reka’u jave reñembo’opivóta avei, Ñanderuete váso (pochy) og̃uahẽta avei ne rendápe ha reñemotĩetéta.

17Umi mba’evaiete rejapova’ekuégui Líbano rehe ho’a jevyva’erã ndeári, hymbakuéra rehundi reiva’ekue ha upéicha avei hetãyguakuéra ruguy reñohẽ reiva’ekue ko yvy apére, ipahápe nde voi reñembyaíta avei ñemotĩ tuicha reheve.

18Ma’erãpa iporã pe ta’ãnga yvyrágui ojejapova’ekue. Ma’erãpa iporã pe ta’ãnga bróncegui ojejapova’ekue, japúnte ombo’éva, ha pe ta’ãnga apohára ojeroviánepa hembiapokue iñe’ẽngúva rehe.

19Cháke, nde eréva pe jára ojejapova’ekuépe yvyrágui: Epáy; ha nde eréva pe jára gua’úpe ojejapova’ekue itágui: Epu’ã. Ikatúnepa umía oporohekombo’e, óro ha pláta reheve oñeñu’ãmba ramo jepe, ndaipytu porãi.

20Ñanderuete katu oĩ hogaguasúpe. Tokirirĩke henondépe opavave oikóva guive ko yvy apére.

← Chapter 1 Jump to: Chapter 3 →