John 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Ñepyrũmbýpe oikomava’ekue pe Ñe’ẽ ha pe Ñe’ẽ oĩ Ñanderuete ndive, ha pe Ñe’ẽ ningo Ñandejára Hesu Crísto voi.

2Ko Ñe’ẽ kóva oĩva’ekue ñepyrũme Ñanderuete ndive.

3Opaite mba’e oikova’ekue ko Ñe’ẽ kóva rupivénte, hese’ỹ ndoikói mba’eve, opaite mba’e oĩva guive.

4Ipype oĩva’ekue pe Tekove, ha pe Tekove ningo umi kuimba’e ha kuñakuéra Resapehára.

5Ha pe Tesape ningo ohesape pytũmbýpe, ha pe pytũ ndaipu’akái hese.

6Oikova’ekue peteĩ kuimba’e, Ñanderuete remimbou, hérava Juan.

7Ko kuimba’e ou oikuaauka hag̃ua outaha yvy ári pe Tesapehára, opavave ojerovia hag̃ua Ñanderuete rehe Ha’érupi.

8Juan ndaha’éi pe Tesape, ha’e oúnte ohechauka hag̃ua pe Tesape oútava.

9Pe Ñe’ẽ ningo pe Tesape añeteguáva, ouva’ekue ko yvy ape ári ohesape hag̃ua opavave kuimba’e ha kuñáme.

10Pe Tesape ou ko yvy apére ha Ha’érupi ojejapova’ekue ko yvy ha jasytatakuéra (mbyjakuéra); ha tetãyguakuéra katu ndohechakuaái ichupe Ijaraha.

11Pe Tesape ouva’ekue hetãteépe, hetãyguakuéra katu nomog̃uahẽiva’ekue ichupe.

12Umi omog̃uahẽva’ekue (orecibiva’ekue) ichupe hekovépe, Ha’e ome’ẽ ichupekuéra pu’aka oiko hag̃ua ichuguikuéra Ñanderuete ra’ykuéra ha itajyrakuéra, ojeroviáva guive Héra rehe.

13Kóva nonacéi yvyarigua ruguy rupi, ni yvyarigua ro’o rupi, ni kuimba’e rembipota rupi, Ñanderuete rembipota rupínte uvei onace.

14Ha pe Ñe’ẽ oñemboho’o ha oikóma ñande apytépe kuimba’e ramo, ha ore rohecha heko jajaipa, Ñanderuete Ra’y peteĩetéva reko jajaipa, henyhẽva jeporiahuvereko (mborayhu) ha añeteguágui.

15Ha Juan oikuaauka ichupe, ha sapukaihápe he’i: Kóva ningo pe che ha’emava’ekue: Pe che rapykuéri ouvahína, Ha’e ituichave chehegui, Ha’e oikógui che anace mboyve.

16Ha’e henyhẽte opaite mba’égui, ha imba’égui ome’ẽ opavave ñandéve, iporiahuvereko ha imborayhu jo’a jo’a.

17Umi tembiapoukapykuéra oñeme’ẽva’ekue Moises rupi, pe jeporiahuvereko ha pe añetegua katu oñeme’ẽ Hesu Crísto rupi.

18Avave ndohechái máramo Ñanderuetépe, Ita’ýra peteĩeténte, pe Jára oĩva Ñanderuetepype, Ha’e (Hesu) mante oikuaauka ñandéve Itúvape.

19Ko Juan ningo pe techahare he’imava’ekue pa’i ha Leviguakuérape, ouva’ekue hendápe Jerusaléngui, oporandu hag̃ua ichupe: Máva piko nde.

20Ha Juan omombe’u porã, ha’e ndaijapúi, ha he’i: Che ndaha’éi pe Crísto.

21Ha oporandu jevývo hikuái ichupe: Máva piko aipórõ nde. Nde piko Elías. Ha Juan ombohovái: Che ndaha’éi. Upéi oporandu hikuái: Nde piko peteĩ proféta. Ha Juan he’i: Che ndaha’éi.

22Upémaramo oporandu hikuái: Máva piko nde, emombe’u porãna oréve, ore rombohovái hag̃ua umi orembouva’ekuépe ne rendápe, mba’épa nde voi ere ndejehe.

23Ha Juan he’i: Che ningo peteĩ amombe’úva desiértope ko ñe’ẽ kóva: Pembosako’i porã Ñanderuete raperã, pe proféta Isaías he’i haguéicha, (Isaías 40,3)

24Umi fariséo ningo omondova’ekue hembiguaikuérape Juan rendápe oporandu hag̃ua umi mba’e rehe.

25Upéramo umi fariséo rembiguaikuéra oporandu Juánpe: Nde ndaha’éi ramo pe Crísto, ni Elías, ni peteĩ proféta, mba’érehepa nde reporobautiza.

26Juan ombohovái: Che aporobautiza ýpente. Pende apytépe katu oĩma pe ouva’erãva ha peẽ ndapeikuaáiva.

27Ha’e voi ningo pe oúva che rapykuéri, ndaijái katu chéve ajora hag̃ua isapatu sãnte jepe.

28Ko’ã mba’e ojehu Betániape, ysyry Jordan mboypýri, Juan oporobautizahápe.

29Ambue árape ha’e ohecha Hesu Crístope, ouvahína hendápe, ha Juan he’i: Pema’ẽ porãke, péva ningo Ñanderuete Ovecha Ra’y oipe’áva tetãyguakuéra angaipa.

30Ã mba’e ningo ha’eva’ekue hese: Che rire oúta peteĩ kuimba’e, ituichavéva chehegui, Ha’e oikóguima che anace mboyve.

31Ni che ndaikuaái ichupe, ojekuaa hag̃ua ichupe katu, che ag̃uahẽ Israel retãme, abautiza hag̃ua ýpe.

32Ha Juan he’ive: Che ahecháma pe Pytu Porãmbávapeoguejy ramoguare pykasúicha yvágagui ha opyta hi’ári.

33Che ndaikuaái ichupe, upe chembouva’ekue aporobautiza hag̃ua ýpe, katu he’i chéve: Nde rehecha ramo peteĩ kuimba’e ári oguejy ramo pe Pytu Porãmbáva ha opytáva hi’ári, péva ningo pe oporobautizátava Pytu Porãmbávape.

34Ha che ajesareko porã hese, ha upévare apyta avei hechahare ramo, amombe’u hag̃ua ha’eha Ñanderuete Ra’y.

35Ambue árape Juan ha mokõi hemimbo’ekuéra og̃uahẽ jevy upépe,

36ha ohechávo hikuái, Hesu Crísto ohasaha upérupi Juan he’i: Pema’ẽ porãke, péva ningo Ñanderuete Ovecha Ra’y.

37Ha Juan remimbo’ekuéra ohendúvo péva, oho Hesu Crísto rapykuéri.

38Hesu Crísto ojerévo ohecha ichupekuéra ohoha hapykuéri, ha oporandu ichupekuéra: Mba’épa peheka. Ha’ekuéra ombohovái ichupe: Mbo’ehára, moõ piko reiko.

39Ha Hesu he’i ichupekuéra: Peju ha pehecháta. Upéramo oho hikuái hendive ha ohecha pe óga Hesu oikohápe ha opyta hendive upe árape, ka’aru 4 hóra rupi.

40Andres, Simon Pédro ryvy, peteĩ umi mokõivéva apytégui ohendupa Juan he’íva Hesu Crísto rehe oho hapykuéri omoirũ hag̃ua Hesúpe.

41Andres ojoúvo ityke’ýra Simon Pédrope, he’i ichupe: Ore rojohúma pe Mesíaspe, he’iséva pe Crísto, ñande ñaha’ãrõva, Ha’e ningo Ñanderuete poravopyre.

42Ha Andres ogueru Pédrope Hesu Crísto rendápe. Ha Hesu Crísto oma’ẽvo hese he’i: Nde ningo Simon, Juan ra’y, nderérata Pédro, he’iséva itaguasu.

43Ára ambuépe Hesu Crísto ohokuévo Galiléape ojohu Felípepe ha he’i ichupe: Eju che rapykuéri, chemoirũ hag̃ua.

44Ko Felípe, oiko avei Betsáidape, Andres ha Pédro oikohápe.

45Ha Felípe ojohu Natanaélpe ha he’i ichupe: Rojohu ningo pe kuimba’épe, Moises ha profetakuéra he’imava’ekue outaha: Hesu, Jose ra’y, Nazaret pegua.

46Ha Natanael oporandu Felípepe: Osẽnepa Nazarétgui mba’eporã. Ha Felípe he’i ichupe: Ejumína ha ndete voi, ehecha ichupe.

47Ha Hesu ohechávo Natanael ouha hendápe, he’i: Kóva ningo Israelgua añeteguáva, ipype ndaipóri tova mokõi.

48Ha Natanael oporandu Hesúpe: Mba’éicharõ piko Nde chekuaa. Hesu ombohovái ichupe ha he’i: Felípe nerenói mboyve, reime ramoguare pe hígo máta guýpe che rohechámakuri.

49Upéramo Natanael he’i Hesúpe: Mbo’ehára, Nde ningo Ñanderuete Ra’y, Nde ningo Israel retã ruvichaguasu voi.

50Hesu katu he’i ichupe: Che ha’e haguére ndéve, rohecha hague pe hígo máta guýpe piko, rejerovia. Mba’e tuichavéva ko’ã mba’égui ningo rehecháta gueteri.

51Ha Hesu he’i jevy: Añete, añete ha’e peẽme pehecháta yvága ojepe’arõ ha angelkuéra ojupi ha oguejy ramo yvyarigua Ra’y ári.

Jump to: Chapter 2 →