Lamentations 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Mba’eichaitépa opyta ha’eño pe táva Jerusalen, hetãygua hetaite oĩva’ekue: Mba’eguasuete tetãnguéra apytépe, ha ko’ág̃a opyta ku imenave’ỹvaicha, oikova’ekue kuñakaraícha ambue tetãnguéra apytépe ha ko’ág̃a katu oiko ichugui ambue tetã rembiguái.

2Jerusalen ojahe’o asy pyhare pukukue aja, hesay hova rehe osyry, iñangirũ apytégui ndaiporivéima omoangapyhýva ichupe; oñemboykepa hikuái ichugui ha oiko hikuái ku hese ija’e’ỹva ramo.

3Juda ohókuri jepokuapýpe, oiko jepy’apýpe ha tembiguái reko pohyiete poguýpe; Judayguakuéra oiko ambue tetãnguéra apyte rupi, ha ndikatuvéima opytu’u, opaite imuñahára ohupitýgui ichupe ha ojopy vaive ohóvo ichupe.

4Jerusalen callekuéra inandi ha oñembyasy ndaipórigui oúva areteguasuhápe; mayma hokẽnguéra ojeitypa, ipyahẽ asy ipa’ikuéra, ikuñataĩ imarã’ỹva ojepy’apy joa, opaite Jerusalengua katu oñembyasyeterei.

5Hese ija’e’ỹvakuéragui oiko mburuvicha, ha umi oñemoĩva hese oiko porãmba, Ñanderuete oipy’apýgui Judayguakuérape oñemomombyrýgui ichugui oñemoangaipaitereígui, upévare Jerusalen membykuéra ohopa avei tembiguái ramo hese ija’e’ỹva retãme.

6Sion pu’aka opáma, imburuvichakuéra oiko ku guasu ojohu’ỹvaicha hembi’urã, ha ikane’õmbaite ramojepe oguatava’erã imuñahára renonderãme.

7Jerusalen ho’a ramoguare umi hese ija’e’ỹva pópe, ndaipóri avave oipytyvõva ichupe, upépe ae imandu’a umi ára oiko porã ramoguare ha opaite mba’eporã rehe oguerekova’ekue yma guive. Umi hese ija’e’ỹva oma’ẽ joa hese, ha oñembohory hikuái hese ho’a haguére.

8Jerusalen hembiapo vaieterei haguére ko’ág̃a oiko tĩndyhápe, opaite oguerekova’ekue ichupe mba’eguasuetéva ramo, ko’ág̃a ndoikuaasevéi mba’eve ichugui, ohechágui hikuái ijopivoha ha ha’e voi ipytuhẽ kangymi, ha oñembojere hapykue gotýo.

9Heko ky’a oja isái rehe, ha ndoikeiva’ekue iñakãme mba’épa ikatu ojehu henonderãme, péicharupi ha’e ho’a oimo’ã’ỹ hag̃uáicha, ha ndaipóri omoangapyhýva ichupe. Ema’ẽmína, Nde, che Ruete, che jepy’apy rehe, cherehe ija’e’ỹva oñembotuichaitereígui.

10Ha hese ija’e’ỹva oike Ñanderuete rogaguasúpe ha ipojái hikuái imba’erepýre. Nde ereva’ekue jepe araka’eve ndoikeiva’erãha nde rogaguasu ryepýpe.

11Opaite hetãygua oiko hembi’u rekávo pyahẽtépe, ome’ẽmba hikuái opaite imba’erepy hembi’urã rehe oikomive hag̃ua. Ema’ẽmína Nde, ore Ruete, ehecha mba’eichaitépa ha’ekuéra orejopy vaiete.

12Ha peẽ pehasáva umi tape rupi napeñandúi piko ore jepy’apy asy. Pema’ẽmína, oiménepa oñembyasýva ku che añembyasy háicha; Ñanderuete katu chembohasa asy ipochy rupi iñembojovakeha árape.

13Yvate guive Ha’e ombou tata ombokusugue hag̃ua che kanguekuéra; Ha’e omyasãikuri ñuhã che pykuérape g̃uarã, chereity che rapykue gotýo, ha chereja tapykuépe, ha upéicha aiko ñembyasy reheve pe ára pukukue aja.

14Ipo ojokua che rembiapo vai che retére, ku cangállaicha oñeñapytĩ hatãva che ati’ýre chemokangypa hag̃ua, Ñanderuete chemoĩ haguére umi cherehe ija’e’ỹva poguýpe, che ndaikatuvéima apu’ã hesekuéra.

15Ñanderuete ojukapa umi soldádo ipy’aguasúvape ore apytépe ku parral rakã’a ojehykue’o háicha, Ñanderuete opyrũmba Juda rajýre, pe kuñataĩ pyahu rehe.

16Ko’ã mba’e rupi cherasẽ, che reságui osyrymanteva’erã che resay, ojeígui che ypýgui chemoangapyhy ha chemokyre’ỹva; che ra’y ha che rajykuéra oñehundipa, ipu’akágui cherehe ija’e’ỹva.

17Sion ipojái ramojepe, ndaipóri omoangapyhýva ichupe, Ñanderuete ombyatýgui tetã ambueyguakuéra oñemoĩ hag̃ua hese. Jerusalen oiko hag̃ua mba’evai ramo ijapytepekuéra.

18Ñanderuete ombojovake porã, che voi apu’ã iñe’ẽ rehe. Opaite tetã pehendu ha pehecha che mba’embyasy, kuñataĩ ha karia’ykuéra ojeguerahapáma jepokuapýpe ambue tetãme.

19Asapukái che irũnguérape, chembotavy katu hikuái, che pa’ikuéra ha che karai ancianokuéra omanomba ohekahápe hembi’urã oikomive hag̃ua.

20Ema’ẽmína, Nde, che Ruete, mba’eichaitépa cheangekõi, opupu che py’apýpe. Che py’a itarova chepype, che añemoĩ haguére nderehe, pe kyse puku ojapo sarambiguasu, Jerusalen oka gotýo ha ikorapy ryepýpe oiko ñemano ndetuicháva.

21Ohendu hikuái mba’eichaitépa chepyahẽ asy, ha ndaipóri chemoangapyhýva; cherehe ija’e’ỹva guive ohendu mba’evai ojehúva chéve, ovy’a joa katu hikuái, Nde voi rejapo vai haguére cherehe. Toumína upe ára eremava’ekue remboutaha, ha tohasa asy hikuái che ahasa háicha ko’ág̃a avei.

22Toupa avei ne renondépe opaite hembiapo vai, ha ejapo hesekuéra cherehe rejapo haguéicha opaite che rembiapo vai rehe, hetaitémagui chepyahẽ asy, ha hasypáma chéve che py’a añeñandu asy hag̃ua.

Jump to: Chapter 2 →

Recommended Reading

Commentary Lamentations Commentaries → Devotional Lamentations Devotional Guide → Get This Bible Guarani (Ñanderuete Ñe’ẽ Porã ) Study Bible →