Lamentations 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Mba’éichapa pe óro hũmba, mba’eichaitépa pe óro porãite ndoveravéi: Umi Ñanderuete rogaguasu pegua ita oñemosarambi opaite umi tape ojuasaha rupi.

2Umi Sion ra’ykuéra ojehayhuveva’ekue óro potĩgui, mba’éichapa ojeguereko ko’ág̃a ichupekuéra, ko’ág̃a ojogua mba’yru ñay’ũguiguápe, ku ñay’ũ rehe omba’apokuaávaicha pópe.

3Umi aguaraguasu jepe ome’ẽ ikáma omokambu hag̃ua imembykuérape; che retã rajy katu ipy’a hatã ku ñanduguasúicha oikóva desiértope.

4Pe mitã kũ oja iñapekũ rehe ijy’uhéigui, umi mitãmimi ojeruréva pan, avave katu nome’ẽi ichupekuéra.

5Umi okaruva’ekue tembi’u hepýva rehe ho’apa joa umi tape rupi, umi okakuaava’ekue ao pytã hepýva apytépe ko’ág̃a oñeno umi tepoti oñemomboha rupi.

6Che retã rajy reko ñaña oñemboheta hetave Sodóma rembiapo vaígui, sapy’aitépe, peteĩ tesapirĩme pe táva oñehundi, yvyariguakuéra ndopokóirõ jepe hese.

7Umi nazaréo ipotĩve ama rayvi rypy’a ku’ígui, imorotĩve kambýgui, hete ipytãve ita vera pytãgui, hete omimbipava’ekue ita verágui.

8Ko’ág̃a katu hova hũve mba’e hũgui, ndojekuaavéima ichupekuéra tape rupi, ipire oja ikangue rehe ha ikã yvyráicha.

9Ovy’aiteve umi kyse pukúpe ojejukava’ekue, umi ñembyahýigui omanova’ekuégui, ko’ãva omano mbeguekatu ndaiporivéigui koga’a.

10Umi kuña ipy’a porãva jepe, ipotee rupi ombojy imembykuérape, imembykueratee oiko hembi’u ramo che retã rajykuéra jepy’apy vaietereiha árape.

11Ñanderuete ndojokovéi ipy’aro, oñohẽmba uvei, Sion rehe omyendy tata ombokusugue hag̃ua hóga rapo peve.

12Tetã ruvicha ha Jerusalenguakuéra ndogueroviái araka’eve umi hese ija’e’ỹvakuéra oiketaha Jerusalen rokẽ rupi.

13Ko’ã mba’e ojehu proféta rembiapo vai rupi ha ipa’ikuéra oñohẽ reiva’ekuégui umi heko potĩva ruguy.

14Ha’ekuéra hesatũvaicha oiko tape rehe, oñemongy’a hapicha ruguýpe, ha avave ndopokosevéi ijao rehe.

15Peñemboyke, iky’áva ouhína, ojesapukái henonderãme: Peñemboyke, peñemboyke, ani pepokótei. Ha okañy ramojepe ambue tetãme, hetãyguakuéra he’i ichupekuéra: Ko’ápe araka’eve ndapepytamo’ãi.

16Ñanderuete py’aro omosarambi ichupekuéra ha pévare nomomba’esevéi ipa’ikuéra ni ikarai ancianokuérape.

17Ore resakuéra jepeve ikangypáma roha’ãrõ reígui ore pytyvõhararãme; ore roha’ãrõ are peteĩ tetã oresalvátavape, ha avave nog̃uahẽi.

18Omoñuhã hikuái ore guataha ani hag̃ua roikótei ore rape rupi; oñemoag̃uíma ore ára paha, og̃uahẽma voi ore ára paha.

19Oremuña pya’eve umi ñapykani yvate ovevévagui, cérro rupi oremuña, ha pe desiérto rupi omoĩ oréve iñuhã.

20Ore retã ruvicha, Ñanderuete rembiporavopyre, ho’a avei iñuhãme, máva ro’emiva’ekue rehe: Ikuarahy’ãme roikove tetãnguéra apytépe.

21Evy’aitéke ha nderoryetéke, Edom retã, nde reikóva Uz retãme (Job 1,1), ne rendápe katuete og̃uahẽta avei pe váso iróva reka’u hag̃ua ha opívo repytáta.

22Rejehavirapáma nde, Jerusalen, araka’evéma nandeguerahaukamo’ãvéi jepokuapyhápe ambue tetãme. Nde katu, Edom retã, ne rembiapo vaikue oñemyengoviáta gueteri ndéve.

← Chapter 3 Jump to: Chapter 5 →