Micah 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Cháke, peñeñangarekóke, peẽ pejepy’amongetáva mba’evaíre pende rupápe ha ko’ẽmbávo pesẽ pejapo vai hag̃ua, ha peiporu vai pende pu’aka.

2Pe kokue oiporavova’ekue rehe oñemomba’e mbaretépe ha oipe’a rei pe óga oipotáva guive, upéicha omonda hikuái pe kokue ha umi óga ijarateégui.

3Upévare pende Ruete he’i: Che añemoĩse ko tetã rehe ajapo vai hag̃ua hesekuéra, napekañymo’ãvéi ha napeñakãrapu’ãmoãvéi, ivaietéta upe ára upévape peẽme g̃uarã.

4Upe árape oje’éta penderehe ko ñe’ẽnga ha ojepurahéita oñembohory hag̃ua penderehe, upéicha oje’éta: Roñehundipaite ha ore yvy oñeme’ẽma tetã ambueygua pópe, ha ore mba’e oñemboja’o tetã ambueyguápe g̃uarã.

5Upévare ndaiporimo’ãi omboja’óva pende yvy po’a jeporavo rupi Ñanderuete retãygua apytépe.

6Ani pemoherakuã peichagua profecía: Ndaorerupitymo’ãi umi mba’evai, he’i ramojepe hikuái oremotĩ hag̃ua.

7Jacóbo róga oñemoangapyhy ko’ã ñe’ẽ rupi: Opa piko Ñanderuete paciéncia térãpa peichagua tembiapo vai Ha’e ojapose. Ndoiko porãi nga’u piko Ha’e heko porãva ndive.

8Upe kuehe oikova’ekue che retã ramo, ko’ág̃a opu’ã opavavére, ha oipe’a rei hapicha ao py’aguapýpe oikóvagui, ou omonda hapicha mba’e ku ñorãirõhára oúva ñorãirõguasúgui ramoguáicha.

9Peẽ pemosẽ Israel kuñakuéra hogakuéragui, ovy’a haguépe ha ichuguikuéra peipe’a avei imembykuéra, imba’e hepyvéva.

10Upévare pepu’ã ha tapeho, ko’ápe ndaha’evéima pende pytu’uha renda, peñemongy’apa haguére peñehundipáta.

11Oime ramo oikóva aña japúpe ha he’íva: Che aprofetiza víno ha taguato resay reheve. Peichagua profétante ombovy’akuaa piko ko tetã kóvape.

12Añetehápe Che pombyatypa jevýta, nde Israel; Che ambyatýta Israel rembyremi, ha ambyatýta ichupekuéra ku Bósra ovechakuéra oñembyaty háicha korapy mbytépe ha hetaitereígui hyapu tuicháta hikuái.

13Ha oĩta peteĩ omyakãva Israelguakuérape, umía ou jevýta ha ohasáta hikuái táva rokẽguasu rupi, ha Ñanderuete voi ohóta henonderãme hetã ruvichaguasuetéva ramo.

← Chapter 1 Jump to: Chapter 3 →