Micah 7

Guarani 2015 (Ñanderuete Ñe’ẽ Porã 2015)

← Chapter 6 Jump to:

1Angái, che ningo, aime ku oheka rei reívaicha pe parral’a ha higo’a oñemono’õmba rire ha ndajohuvéi mba’evete ha’u hag̃ua, che ánga ho’useiterei ramojepe.

2Ndaiporivéima heko porãva che retãme, umi heko potĩva che retãyguakuéra apytépe omanombáma, maymáva oheka oporojuka hag̃uánte, maymáva oporomoñuhãsénte.

3Ipokuéra oñembopya’e ojapo vai hag̃ua. Pe mba’e heta oguerekóva ojogua ipirapire rehe pe mburuvicha ha pe mbojovakehára ojapo hag̃ua hembipota vai.

4Pe iporãvéva ijapytepekuéra ojogua ñuatĩme, ha pe heko potĩvéva ojogua ñuatĩndyguasúpe. Pe jehavira ára katuete oúta nde proféta omombe’u haguéicha, upéramo ae oikóta ñemondyiguasu.

5Anive hag̃ua rerovia nde rapicha he’íva ha anive hag̃ua pejerovia pene mburuvicha rehe. Eñangarekóke ne rembireko rehe oñenóva nde ykére, ha emboty nde juru henondépe.

6Pe ta’ýra omongy’a itúva réra, pe membykuña oñemoĩta isýre, pe kuña omendáva oñemoĩta iména sýre, ha umi oñemoĩva hapicháre, hogayguakuéra voi.

7Che katu, ama’ẽta Ñanderuete rehe, che ajeroviáta che Jára, che pytyvõhára rehe, Ha’émante cherendúta.

8Nde, reñemoĩva cherehe, ani repukátei. Ha’a ramojepe apu’ã jevýta, aiko ramo jepe pytũmbýpe Ñanderuete che resape.

9Ñanderuete pochy agueropu’akáta añemoangaipa haguére henondépe, Ha’e chembojovakéta ha ojapóta chéve pe hekoite peguáva, Ha’e cherenohẽta hesakãháme ha ahecháta ijustícia.

10Ha pe cherehe ija’e’ỹva ohecháta umi mba’e ha tuicha oñemotĩta he’i haguére chéve: Mamo piko oime nde Jára, nde Ruete. Upéramo che, ama’ẽta vy’apópe hese oñepyrũmba ramo ha ytýicha oñemombo ramo tapére.

11Jerusalénpe g̃uarã katuete oúta pe ára oñemopu’ã jevy hag̃ua nde táva korakuéra, ha oñembotuicha jevytaha ne retã rembe’y avei.

12Upe ára upévape oñeg̃uahẽta ne rendápe Asíria guive Egípto peve, ha Egípto guive ysyry Éufrates peve, ha peteĩ yguasu guive ambue yguasu peve, ha peteĩ cérro guive ambue cérro peve.

13Pe yvy ape oñemoperõve ohóvo kuimba’e ha kuñakuéra rembiapo vai rupi.

14Eñangarekomína Nde, ore Jára, ne retã rehe nde yvyra po’ípe, ore ningo ne rymba aty, ne mba’e oikóva ka’aguy mbytépe, orereraha jevýna ymaguaréicha Basan ha Galaad ñu porãme.

15Ehechauka chéve ne mba’e techapyrãva (milágro), Nde oreguenohẽ ramoguaréicha Egípto retãgui.

16Ambue tetãnguéra ohechapáta ha okyhyjeitereíta ohechávo nde pu’aka ha omoĩta ipo ijuru ári ha ijapysakuéra topyta ohendu’ỹvaicha.

17Oheréita hikuái yvy timbo ku yvyja ha sevo’i oheréi háicha, ryryipópe osẽta hikuái hogaguasúgui ha kyhyjepópe oñembojáta Ñanderuete rendápe.

18Moõ piko oĩ ndeichagua Jára, operdonáva mba’evai ha hesaráiva hetãyguakuéra rembyre rembiapo vaígui. Naimandu’áiva tapia g̃uarã umi mba’e ombopochýva rehe, ovy’a uvei Ha’e oiporiahuvereko ramo.

19Ha’e ñandeporiahuvereko jevýta, oñotỹta ñane rembiapo vaikue ha omombóta yguasu ruguápe ñane angaipakuéra.

20Nde remoañete pe ñe’ẽ reme’ẽva’ekue ymaguare ore rukuérape, Abraham ha Jacóbope, ha rehechauka jevýta ne mborayhu ha nde jeporiahuvereko.

← Chapter 6 Jump to: