Ruth 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Upépe oiko peteĩ Noemi menare, Eli melec génteva, karai ipirapire hetáva, hérava Booz.

2Ha Rut, pe Moabgua, he’i Noemíme: Cherejamína taha kokue rupi ha cheporiahuverekóva rapykuéri tamono’õ umi espíga rembyre. Ha Noemi he’i ichupe: Tereho che memby.

3Upéramo oho ha oñepyrũ omono’õ umi mono’õhára rapykuéri, ha pe kokue Booz mba’e, ha’e ningo Elimelec génteva voi.

4Ha péina Booz ou Beléngui ha he’i imono’õharakuérape: Ñanderuete tapenepytyvõ (tapenderovasa).

5Ha Booz he’i hembiguáipe oñangarekóva imono’õhárare: Máva mba’épa ko kuñataĩ.

6Ha pe tembiguái oñangarekóva imono’õhárare he’i: Péva ningo peteĩ kuña Moab pegua, ouva’ekue Noemi ndive Moab retãgui.

7Ha’e he’íkuri chéve: Aipotamínte chereja amono’õ ha ambyaty umi mono’õhára rapykuéri. Péicha omba’apo pohýi pyhareve guive ko’ág̃a peve, ha opytu’u sapy’amínte.

8Upéramo Booz he’i Rútpe: Ehendumi che rajy, aníke reho remono’õ ambue kokuépe, térã rehasa ko’águi, epyta ko’ápe umi kuña, che rembiguái ypýpe.

9Ema’ẽ porã yvýre, ha tereho ñemono’õhára rapykuéri, che ningo ha’éma ichupekuéra ani hag̃ua nemyangekõi. Ág̃a ndey’uhéi vove, tereho kambuchi oĩháme ha hey’u umi tembiguái mba’évagui.

10Upérõ Rut ojeity yvýre ha he’i ichupe: Mba’érehepa nde cheporiahuvereko ha chepytyvõ, che ningo peteĩ tetã ambueyguáva.

11Ha Booz ombohovái ichupe ha he’i: Aikuaapáma rejapova’ekue ne ména sy ndive, ne ména omano rire, nde ningo repoi nde rúgui, nde sýgui ha ne retãgui, renace haguépe, reju hag̃ua peteĩ tetã reikuaa’ỹvape.

12Ñanderuete tohechakuaapa ndéve ne rembiapo ha tomyengoviave ndéve, rejúgui ipepo guýpe Ha’e nemo’ã hag̃ua.

13Ha Rut he’i ichupe: Che roagradece nde chepytyvõ ha chemoangapyhy haguére, ndaha’éirõ jepe peteĩ kuña ne rembiguaikuéra apytepeguáva.

14Upéi okaru jave hikuái, Booz he’i Rútpe: Eju ko’ápe ha he’u pan orendive ha emyakỹ vinágrepe. Ha Rut oguapy umi mono’õhára ypýpe, ha Booz ome’ẽ ichupe avei trígo ra’ỹi maimbepyre, ha ho’u hyvatã meve, ha hemby ichupe.

15Upéi opu’ã omono’õve hag̃ua umi espíga rembyre. Ha Booz he’i hembiguaikuérape: Tomono’õ ha’e avei umi espíga ho’ava’ekue umi cebáda háse apytégui, ha aníke pemotĩ ichupe.

16Ha pepoimimi avei oĩmava pende pógui ichupe g̃uarã, ha pehejáta tomono’õ ha’e, ha ani pemongavaju ichupe.

17Péicha Rut omono’õ ikogatýpe pyhare peve umi espíga rembyre ha ohekýi pe omono’õva’ekue ha ohupity 22 kílo rupi.

18Ohupi oguerahapa hag̃ua imenare sy rendápe, ha ome’ẽ avei ichupe pe cebáda ra’ỹi maimbepyre hembyva’ekue ichupe, ha’e hyvatã rire.

19Ha’e oporandu ichupe: Moõpa remono’õra’e ko árape umi espíga rembyre, ha moõpa remba’apóra’e. Ñanderuete tohovasa upe ndeporiahuverekova’ekuépe. Ha’e omombe’u imenare sýpe omba’apo hague Booz kokuépe.

20Ha Noemi he’i imembyre rembirekokuépe: Ñanderuete tohovasa ichupe, ndoipe’ái haguére ipy’aporã oikovévagui ha omanova’ekuégui. Upéi Noemi he’i Rútpe. Pe karai ningo ñane pehẽngue ha ha’e avei peteĩ umi ikatúva ojogua ore yvy (lotekue).

21Ha Rut, pe Moabguáva, he’i: Pe karai he’i voi kuri chéve: Epyta che kuña rembiguaikuéra ndive opa peve che kóga’a ñemono’õ.

22Ha Noemi he’i, imembyre rembirekokue, Rútpe: Iporãve ningo, che memby, repyta ramo hembiguaikuéra ndive, rehasa asy rãngue ambue kokuépe.

23Upéicha Rut omono’õ jepi umi Booz rembiguái kuñakuéra ndive, opa peve pe cebáda ha trígo ñemono’õ, ha oiko imenare sy ndive.

← Chapter 1 Jump to: Chapter 3 →