Ruth 4

Guarani 2015 (Ñanderuete Ñe’ẽ Porã 2015)

← Chapter 3 Jump to:

1Ha Booz oho oguapy pe táva rokẽme, oñembyatyhápe tavayguakuéra ha ohasávo Rut menare pehẽngue ag̃uivéva, Booz imandu’a hague Rútpe, he’i ichupe: Nde, eju ko’ápe ha eguapy, ha ha’e ou ha oguapy.

2Upéramo Booz ogueru 10 karai anciánope ha he’i: Peguapy ko’ápe. Ha ha’ekuéra oguapy.

3Uperire Booz he’i ambue Rut menare pehẽnguépe: Noemi, pe ojevyva’ekue Moab retãgui, ovendese imenare Elimelec yvy.

4Ko’ã mba’e che romomararandu ndéve nde rejogua hag̃ua Elimelec yvykue, ko’ã kuimba’e ha umi karai anciáno renondépe, ha’ekuéra opytáta techahare ramo. Nde rejoguase ramo, ejogua, ha nahániri ramo, emombe’u chéve aikuaa porã hag̃ua; ndaipóri ningo ambue ikatúva ojogua, nde raẽ, ha che nderire. Ha ha’e he’i: Che ajoguáta.

5Upéramo Booz ombohovái ha he’i ichupe: Pe ojoguáva ko árape, Noemi pógui imenare yvy, omendava’erã avei Rut, pe Moabgua rehe, ha’e ningo Mahlon rembirekokue, Elimelec ra’yre, ha péicha pe omanova’ekue yvy opyta jevýta ijarakue rérape.

6Rut menare pehẽngue ag̃uivéva, upémaramo he’i. Che ndaikatumo’ãi, ani hag̃ua peichahágui ahundi che ra’ykuéra yvyrã. Ejoguána nde, che rendaguépe, che ndaikatumo’ãi ajogua.

7Yma guivéma Israelguakuéra ojoguáta ramo térã ome’ẽta ramo ojupe iñe’ẽ omoañete hag̃ua iñe’ẽ oipe’a peteĩ isapatu ha ome’ẽ iñirũme, ha pe jepokuaa he’ise oikóma hague jekupytýpe.

8Uperire Rut menare pehẽngue ag̃uivéva he’i Boózpe: Ejoguána nde, ha oipe’a isapatu ome’ẽ hag̃ua Boózpe.

9Upérõ Booz he’i umi karai anciánope ha mayma tavaygua oñembyatývape: Peẽ ningo ko árape peiko techahare ramo, che ajogua hague Noemi pógui, opaite Elimelec, Quilion ha Mahlon yvykue.

10Ha arekotaha che rembireko ramo, Mahlon rembirekokue Rut, peteĩ Moabgua, oñembohasakuaa jevy hag̃ua pe omanova’ekue réra, ani hag̃ua pe omanóva réra ojepe’a ityvyrakuéra apytégui ha itáva rendaguégui. Peẽ pehendúva guive, peiko ko árape techahare ramo.

11Ha opaite tavaygua oĩva pe táva rokẽme, imburuvichakuéra, ndive he’i: Ore rohendu ha roikuaa peichaha. Ñanderuete tohovasa pe kuñame oike guive nde rógape, ohovasa haguéicha Raquel ha Léape, omopu’ãvo ha’ekuéra rupi Israel retã, ha ndehegui toiko karaiguasuete Efrátape, ha tanererakuã porãite Belénpe.

12Ha nde rogaygua toñemboheta Fares rogaygua oñemboheta haguéicha, Tamar ningo imembyva’ekue ko Fares iména Judápe g̃uarã.

13Upéi Booz omenda Rut rehe. Ha oiko oñondive, ha Ñanderuete ohovasa ichupe ha hyeguasu ha’e, ha imemby peteĩ mitãkuimba’e.

14Ha umi táva pegua kuñakuéra he’i Noemíme: Toñemomba’eguasu Ñanderuete, ome’ẽgui ndéve peteĩ oiporútava ne membykuimba’ere réra, ha ko kuimba’e réra toñemoherakuã porã Israel retãme.

15Rut membykuimba’e tomyangapyhy ne ánga, ha neg̃uaig̃ui ramojepe toñangareko nderehe. Rut, nderayhu añetehápe, ha pe kuña péva ndéve g̃uarã iporãve 7 ne memby karia’ýgui.

16Ha Noemi ohupi pe mitãme ha omoĩ hapypa’ũme ha oiko pe mitã rerekua ramo.

17Ha Noemi rapichakuéra ombohéra ichupe: Obed, ha he’i hikuái ko mitã kóva Noemi memby, ko Obed ra’y ningo Isai, ha Isai ra’y David.

18Ãva ningo Fares ñemoñare: Fares ra’yre Hezron,

19Hezron ra’yre Ram, Ram ra’yre Aminadab,

20Aminadab ra’yre Naason, Naason ra’yre Salmon,

21Salmon ra’yre Booz, Booz ra’yre Obed,

22Obed ra’yre Isai, ha Isai ra’yre David.

← Chapter 3 Jump to: