Titus 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Che, Páblo, Ñanderuete rembiguái ha Hesu Crísto apóstol, Ha’e cheporavo ajerovia hag̃ua hese ha ahupity hag̃ua ikuaapy añeteguáva, ojehechaukáva tekopotĩ rupi.

2Ñaha’ãrõñaína pe tekove tapia g̃uarãva, Ñanderuete ndaikatúi ijapu, oprometeva’ekuégui umi ára atyguasu mboyve.

3Hi’araitépe Ha’e ohechauka iñe’ẽ añetegua ha he’iva’ekue chéve amyasãi hag̃ua pe evangélio tetãyguakuérape ojesalva hag̃ua Ñandejára Hesu Crísto rupi.

4Ko kuatiañe’ẽ kóva che ahai nde, Títo, che ra’yetévape, jajeroviágui (Hesu Crísto rehe). Ñandejára Ñanderuete ha Hesu Crísto ñandesalva iporiahuvereko ha ipy’aguapy toĩ nendive.

5Che rohejava’ekue Crétape remoĩ porãmba ha reiporavo hag̃ua umi omyakãvape pe iglésia rembiapo (karai anciáno) opaite itávape, che ha’e haguéicha ndéve.

6Pe karai anciáno heko potĩva’erã, hembireko peteĩeteva’erã, ita’ýra ha itajýra ojeroviava’erã, ani hag̃ua oiko rei, ha iñe’ẽrendu porãva’erã avei.

7Pe karai anciáno oikova’erã iglesiaygua rerekua añetegua ha heko peguáva ramo, anítei ha’e ojapo ha’e voi oipota háichante, anítei ipochy, anítei oka’u, anítei oporonupã ha anítei ipirapire rayhu,

8imbohupa rayhuva’erã, ha ohayhuva’erã mba’eporã, iñakãguapyva’erã, hekojojava’erã, iñe’ẽrenduva’erã, ojejokokuaava’erã,

9ha’e oikova’erã hekópe Ñanderuete ñe’ẽ ñanerekombo’e háicha, ha’e oporohekombo’ekuaa ha oavisa hag̃ua umi iñe’ẽrendu’ỹvape.

10Heta ningo umi oñemoĩva iglésia rerekua (karai anciáno) rehe, omyasãivo ipensamientokuéra oporombotavy hag̃ua; ha umi oñemoĩvéva ou Israel retãgui ha omyasãi pe pire’i ñekytĩ’o.

11Umívape ojejurumbotyva’erã, ha’ekuéra ombyai heta hogayguakuérape ha oporombo’e mba’e výro rei oipotágui ipirapire.

12Peteĩ Cretaygua, iproféta voi, he’íma: Cretayguakuéra tapia ijapu, ipochy rei mymba iñarõvaicha ha oiko reisénte.

13Ko ñe’ẽ oje’éva ningo añete, upévare eñe’ẽ pohýi ichupekuéra hi’añete porã hag̃ua ijeroviapekuéra,

14ani hag̃ua ha’ekuéra ojapysaka Judaygua ñe’ẽ výro rei rehe térã yvyarigua rembiapoukapy rehe, oñemomombyrýva pe añeteguágui.

15Opaite mba’e ningo ipotĩ umi ipotĩvape g̃uarã, umi oñemongy’áva ha umi ndojeroviaséivape katu mba’eve voi naipotĩri, ipensamientokuéra ha ipy’apyñe’ẽ voi iky’águi avei.

16He’i ningo hikuái oikuaaha Ñanderuetépe, hembiapo vai rupi katu ombotove ichupe, tekove mbojeguarupy, naiñe’ẽrendúiva ha ndojaposéiva mba’eve iporãva.

Jump to: Chapter 2 →

Recommended Reading

Commentary Titus Commentaries → Devotional Titus Devotional Guide → Get This Bible Guarani (Ñanderuete Ñe’ẽ Porã ) Study Bible →