Titus 3

Guarani 2015 (Ñanderuete Ñe’ẽ Porã 2015)

← Chapter 2 Jump to:

1Emomandu’a Hesu Crísto reheguakuérape oiko hag̃ua tetã ruvicha ha mburuvichakuéra poguýpe, ta’iñe’ẽrendu ha ta’ikyre’ỹ opaichagua tembiapo porãme,

2ani hag̃ua oñe’ẽvai avave rehe térã oñorãirõ, ta’ipy’a porã uvei opavave ndive ñemomirĩ reheve.

3Ñande voi yma ñandevyrova’ekue, nañaneñe’ẽrendúimi, ñande japiava’ekue avei tape porãgui jaiko hag̃ua opaichagua mba’evai rembiguáirõ, jaiko aña rekópe, envídiape, py’arópe, ha upévare ambuekuéra oiko ñanderehe ija’e’ỹva ramo.

4Ñanderuete ñandesalvava’ekue ipy’aporã ha imborayhu rupi,

5ndaha’éi yvyarigua rembiapo porã rupi, iporiahuvereko rupi uvei Ha’e ñandesalva pe ára ñande jajebautiza ha ñanemonace pyahu jevy ramoguare pe Pytu Porãmbáva rupi,

6péva Ha’e oñohẽ ñande ári hemby hag̃uáicha Hesu Crísto rupi,

7ñanemopotĩ ha ñanemoĩ porã hag̃ua Ñanderuete ndive imborayhu rupi ha jahupity hag̃ua pe tekove tapia g̃uarã ñaha’ãrõva.

8Ko Ñanderuete ñe’ẽ kóva iporã jarovia hag̃ua ha upévare che aipota nde rehekombo’e kyre’ỹme umi ojeroviávape Ñanderuete rehe, ha’ekuéra toñeha’ãmba ojapo hag̃ua heta tembiapo porã.

9Nde, Títo, eñemomombyry ñe’ẽ joapi reígui ha ñande ypykuéra réra aty ñemongeta reígui, ha eñemboyke avei umi ñe’ẽ joavy ha ñe’ẽ joapígui Moises rembiapoukapy rehe. Ko’ã ñe’ẽ ko’ãva naiporãi mba’eve ramo ha výro rei voi.

10Eñe’ẽ pohýi upe hermáno gua’úpe omboja’oséva Hesu Crísto iglesiayguakuérape, peteĩ térã mokõi jevy, ha nohenduséi ramo emosẽ ichupe iglésiagui.

11Eikuaa porãke, ha’e heko vai ha oñemohembiapo vaiha; ha noñembyasýigui ojapo vai haguére, ha’e voi oñecondenáma (heko vai rupi).

12Che ajokuái ramo Artémas térã Tíquicope ne rendápe, eñeha’ãmba ha eju che rendápe Nicópolispe, upépe apytase pe araro’y aja.

13Eipytyvõkena Zénas, pe abogádope, ha Apólospe opaite hemikotevẽme, oho jevy ramo hikuái omyasãi hag̃ua Ñanderuete ñe’ẽ ambue távape.

14Ñande reheguakuéra tojepokuaa avei hembiapo porã rupi oipytyvõ hag̃ua ichupekuéra hemikotevẽme, ani hag̃ua opyta hikuái hi’a’ỹre.

15Opaite oĩva guive chendive nemomaiteiuka. Emomaitei opaite hermanokuérape orerayhúvape ha ojeroviáva guive Hesu Crístore. Ñanderuete poriahuvereko toĩ opavave penendive.

← Chapter 2 Jump to: