Zephaniah 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Ñanderuete ñe’ẽ ouva’ekue Sofonías, Cusi ra’ýpe, kóa Gedalías ra’y, kóa Amarías ra’y, kóa Ezequías ra’y, ha ko’ã mba’e ojehu Josías, Juda retã ruvicha árape; Josías ningo Amon ra’y.

2Ñandruete he’i: Ahundíta opaite mba’e yvy ape árigui.

3Ahundíta tetãyguakuérape ha tymbakuérape, guyra yvate ovevéva ha pirakuéra yguasu pegua, ahundipáta umi iñañávape yvy ape árigui, he’i Ñanderuete.

4Aipysóta che po ahavira hag̃ua Judayguakuérape ha mayma Jerusalenguápe, ahundipáta umi oñemomba’eguasuhápe Baálpe ipa’ikuéra ndive, ha noñemomandu’aveiva’erã Baal réra rehe.

5Ha upéicha ahundíta avei umi óga apére omomba’eguasúva mbyjakuéra ára peguápe, ha umi oñesũva ha ome’ẽva oñondive iñe’ẽ pende Ruete ha ambue jára gua’úpe, oñembohérava Milcom.

6Ahundíta umi oñemboykéva Yvága Jára rapégui, ha umi ndohekáiva ha nomba’eporandúiva ichupe.

7Ekirirĩetéke pende jara pu’akapáva renondépe, hi’ag̃uietéma pende Ruete ára, pende Ruete voi ombosako’íma pe kuave’ẽmby, ha omopotĩma umi ohenóivape ikaruguasuhápe.

8Pende Ruete he’i: Che kuave’ẽmbyha árape ahaviráta mburuvichakuérape, umi tetã ruvicha ra’ykuérape ha mayma oñemondévape guive tetã ambueygua aópe.

9Ha upe ára upévape ahaviráta avei umi opóvape okẽ rembe’y ári ha umi omyenyhẽva ijára gua’u róga mondágui ha ñembotavýgui.

10Ha upe árape, he’i pende Ruete, oikóta sapukaiguasu Jerusalen pira rokẽ guasu guive, ha jahe’o asy pe táva pyahu rokẽguasúre, ha angekõi vai oúta umi cérrogui.

11Pejahe’o joaitéke peẽ peikóva pe angu’a aty oĩháme, umi ñemuhára oñehundipaitégui, oñehundipaite avei umi ocambiáva tetãnguéra pláta.

12Ha ojehuva’erã upe ára upévape, Che ahyvykóita Jerusalen tataindýpe, ha ahaviráta umi kuimba’e opytu’úva py’aguapýpe ku víno oguapypyréicha, ha he’íva ipy’apýpe: Ñanderuete ndojapomo’ãi iporãva ni ivaíva.

13Upévare oñemondapáta imba’erepyeta ha hogakuéra oñembotaperéta. Omopu’ãta hogarã, ndoikomo’ãvéita katu ipype, ha oñotỹva’erã iparraltykuéra, ndo’umo’ãvéi katu ivíno.

14Hi’ag̃uíma Ñanderuete araguasu, hi’ag̃uietéma ha oupotaitéma; upérõ, kyhyjepópe osapukáita pe ipy’aguasuvéva jepeve.

15Upe ára upévape, Ñanderuete pochyha ára, oikova’erã angekõi ha jejopy, py’a tarova ha jepy’apy vai, tatatĩna ha ypytũ, arai ha ypytũ vai.

16Ha pe árape oñembopúta pe turu ha oñehendúta ñorãirõ ryapu ha oñemoĩta hikuái pe táva oñemombaretéva ha umi óga yvatéva rehe.

17Pende Ruete he’i: Che amongyhyjéta tetãyguakuérape, ha’ekuéra oguatáta ku ohecha’ỹvaicha, oñemohembiapo vaígui hikuái chendive g̃uarã, ha huguykuéra oñeñohẽta yvy timbóicha ha ho’okuéra oñemombóta tepotícha.

18Ipláta ha hi’óro jepeve noipytyvõmo’ãvéima ichupekuéra pende Ruete pochyha árape, ipochy rata ohundipáta ko yvy tuichakue, añetehápe sapy’aitépe oñehundíta, opáta tetãyguakuéra oikóva guive ko yvy apére.

Jump to: Chapter 2 →