Zephaniah 3

Guarani 2015 (Ñanderuete Ñe’ẽ Porã 2015)

← Chapter 2 Jump to:

1Angái, nde Jerusalen, táva oñemoĩva Ñanderuete rehe, oñemongy’apáva ha ojopy asýva hapichakuérape.

2Nohenduséi Ijára ñe’ẽ, naiñe’ẽrenduséigui, ndojeroviái Ñanderuete rehe, noñembojái Ijára rehe.

3Imburuvichakuéra oiko itavapýpe ku leõ okororõvaicha, ha umi ombojovakéva ojogua aguaraguasúpe osẽva pyharépe ha ndohejái so’o pehẽngue jepe, mymba kangue nandínte.

4Iprofetakuéra katu oñembotuicha ha oikónte pirapire rekávo, ipa’ikuéra omongy’a che rogaguasu ha omoambue pende Ruete rembiapoukapy.

5Pende Ruete oiko ijapytepekuéra ijustíciape, ndojapomo’ãi mba’e ivaíva, meme pyharevépe ohechauka ijustícia, ha araka’eve ndojavymo’ãi hembiapópe, pe iñaña rekóva katu notĩséi.

6Pende Ruete he’i: Ahundiukava’erã tetãnguérape, ikora itaguigua oñembyaipava’erã ha ambotapereva’erã itáva rapekuéra, avave ndohasaiva’erã upérupi, itavakuéra itaperepágui, ipype ndaiporiveiva’erã itavayguakuéra.

7Upéramo Che ha’e: Añetehápe, ko’ág̃a Jerusalen okyhyjéta chehegui, oñembyasýta ojapovai haguére, ani hag̃ua ahundiuka avei hogakuéra ha opaite ambue mba’e. Ha’ekuéra katu oñembopya’e pya’e oñemongy’ave ohóvo hembiapo vaieta rupi.

8Upévare, pende Ruete he’i: Peha’ãrõnte apu’ãha ára peve pombojovake hag̃ua, Che ningo ha’éma ambyatypataha tetãnguérape, ha tetã atyguasukuéra ári añohẽta che pochy, añohẽmbaitéta che pochy, ahundipáta ko yvy che ratápe.

9Upe ára upévape amoambuéta opaite tetãnguéra juru ohenói jevy hag̃ua Ángel Atykuéra Jára réra, ha oiko hag̃ua peteĩ ñe’ẽme che rembiguaikuéra ramo.

10Etiopía ysyry mboypýri che retãygua oñemosarambi haguépe ou jevýta chemomba’eguasu hag̃ua ikuave’ẽmbynguéra rupi.

11Upe ára upévape nde, Jerusalen, nereñemotĩmo’ãi mba’eveichagua ne rembiapokue rejapova’ekuégui ha reñemoĩvo cherehe, aipe’apáta nde apytégui opaite umi oñembotuichava’ekue, ha araka’eve nereñembotuichaveimava’erã che rogaguasúpe, oĩva che cérrope.

12Ha ahejáta ndepype peteĩ tetã rembyre oñemomirĩva, imboriahúva ha añetehápe ojeroviátava Israel Jára réra rehe.

13Israel rembyre ndojapomo’ãvéima mba’evai ha nde’imo’ãvéima japu, ijurupekuéra ndojejohumo’ãvéima juru ombotavyséva, okaru ha opytu’u aja ndaiporimo’ãvéima avave omongyhyjéva ichupekuéra.

14Epurahéi nde, Sion rajy; vy’apópe esapukái nde Israel; tandepy’arory ha evy’aitéke nde py’aite guive, Jerusalen rajy.

15Pende Ruete ndaipochyvéima nendive, omosẽmbáma okápe nderehe ija’e’ỹva, pende Ruete ningo Israel retã ruvicha guasu oikóva nde apytépe, araka’evéma nderehechamo’ãvéi mba’evai.

16Upe ára upévape oje’eva’erã Jerusalénpe: Ani rekyhyjétei nde Sion, aníke ikangýtei nde pokuéra.

17Ñanderuete oĩhína nde apytépe, ipu’aka nemo’ãta, Ha’e ovy’áta nendive, nderayhúgui okirirĩta, vy’apópe osapukáita nderehe.

18Pende Ruete he’i: Ambyatýta umi oñembyasýva ha ohasa asyva’ekuépe areteguasúpe.

19Péina ápe, upe ára upévape Che ajopy vaíta umi ndejopy asyva’ekuépe, ha aipytyvõta upe ikarẽvape ha agueru jevýta Israel retãme umi oñemosarambiva’ekuépe, ha Che ambotuicháta ha amoherakuã porãta che retã Israélpe, opaite ambue tetãnguéra ohecha hag̃ua ko’ã mba’e ha otĩ hag̃ua.

20Upe ára upévape Che pogueru jevýta, Che ambyatýta che retã Israel, Che pomoherakuã porãta ha Che pombotuicháta mayma tetã renondépe, oĩva guive ko yvy apére, ko’ã mba’e Che, pende Ruete, ajapóta. Che pomohenda porã jevýta Israel retãteépe, peẽ peiko haguépe.

← Chapter 2 Jump to: