1 Corinthians 12

Gussi (EBIBILIA ENCHENU) 2020

← Chapter 11 Jump to: Chapter 13 →

1Ase amang’ana ’ebiegwa ebikorwa ase Omoika, baminto, tindigeti momoche komanya.

2Mwamanyire ng’a ekero mwarenge ab’Ebisaku nigo mware koirwa ase emegwekano y’ogosasimwa, eyio etarenge gokwana, buna mware gotang’anwa.

3Ase ayio nindigetie kobamanyia, ng’a monto onde tari oyogokwana ase Omoika o Nyasae ogoteba ng’a, “Yeso oragererigwe!” Gose onde takonyara goteba, “Yeso n’Omonene”, otatiga ase Omoika Omochenu.

4Bono mbireo ebiegwa ao ao, korende Omoika noro oria oyomo.

5Naboigo nkore ogokora ao ao, korende Omonene nere oria oyomo.

6Naende nkore ogokora kw’emeremo ase chinchera ao ao, korende Nyasae nere oria oria ogokora emeremo yonsi ase bonsi.

7Korende kera oyomo oeirwe okomaanorerwa kw’Omoika, erinde bonsi bakonywe.

8Naki omonto oyomo ase Omoika aegwa ogokwana kw’obong’aini, na oyonde ring’ana ri’okomanya ase Omoika oria oyomo.

9Oyonde aegwa okwegena ase Omoika oria oria, na oyonde aegwa ekeegwa gi’okogwenia ase Omoika oria oria.

10Oyonde aegwa gokora emeremo y’ebikone bie chinguru, na oyonde obobani, na oyonde okomanya kw’ogwatanana emeika, na oyonde ogokwana kw’emenwa ao ao, na oyonde okoonchora emenwa.

11Korende ebiegwa ebi bionsi nigo bikorwa ase Omoika oyo oyomo, oria oria okogabera kera oyomo buna bwanchete.

12Naki buna omobere ore oyomo, oro nore nebiimo ebinge, na ebiimo bionsi bi’omobere oria, nonya bire ebinge, nigo bire omobere oyomo; naboigo na Kristo are.

13Naki ase Omoika oyomo intwe twensi tokabatiswa, tokaba omobere oyomo, nonya tore Abayahudi, gose tore Abagiriki, onye tore abasomba, gose tore abasibore; intwe twensi nigo twanyoisetigwe Omoika oyomo.

14Naki omobere tori nekiimo ekemo, korende nebinge.

15Onye okogoro kogoteba, “Ekiagera inche tindi okoboko, tindi oyo bw’omobere”, Inee, igo tikori okw’omobere ase engencho eyio?

16Na onye ogoto kogoteba, “Ekiagera inche tindi eriso, inche tindi oyo bw’omobere”, Inee, igo tikori okw’omobere ase engencho eyio?

17Onye omobere bwonsi oba eriso, anga okoigwa ng’ai kore? Onye bwonsi nogoto, anga okonyonka ng’ai kore?

18Korende bono Nyasae obekire ebiimo, kera ekemo ase omobere buna arigetie.

19Korende onye bionsi biba ekiimo ekemo, anga omobere ng’ai ore?

20Bono ebiimo nebinge bire, korende omobere noyomo.

21Eriso tirikonyara gotebia okoboko, “Tinkoganeti”, gose omotwe tokonyara gotebia amagoro, “Timbaganeti.”

22Korende kobua mono, ebiimo biria bi’omobere bigokagerwa ng’a tibiri ne chinguru, nigo biganeirie kobua.

23Na ebiimo biria bi’omobere bigokagerwa ng’a tibiri nogosika twabieire ogosika kobua; na ebiimo biaito bitari nobuya, nigo tokobiboyia buya kobua,

24naki ebiimo biaito bire nobuya tibiganeti ayio. Korende Nyasae obwatanirie omobere, na ekiimo keria keremeire ogosika okeire ogosika kobua,

25erinde tikoba ogwatananekana ase omobere, korende ebiimo birendane.

26Onye ekiimo ekemo gechandegete, ebiimo bionsi nigo bichandegete nabirobio; onye ekiimo ekemo kegotogigwa, ebiimo bionsi nigo bikogoka amo.

27Inwe nigo more omobere o Kristo na ebiimo bi’omobere oyio, kera ekemo aase aye.

28Na Nyasae obekire ase ekanisa ritang’ani abatomwa, eria kabere ababani, eria gatato aborokia. Naende akabeka abakori emeremo y’ebikone bie chinguru, abanyorire ebiegwa bi’okogwenia amarwaire, abakonyi, abagambi, naende abagokwana emenwa ao ao.

29Inee! Bonsi nabatomwa? Bonsi nababani? Bonsi naborokia? Bonsi ngokora bare ebikone bie chinguru?

30Bonsi mbare nebiegwa bi’okogwenia abarwaire? Bonsi ngokwana bare emenwa ao ao? Bonsi nkoonchora bare?

31Rigia mono ebiegwa ebiya kobua. Naende nimborokie enchera ere engiya mono.

← Chapter 11 Jump to: Chapter 13 →