1 Corinthians 13

Gussi (EBIBILIA ENCHENU) 2020

← Chapter 12 Jump to: Chapter 14 →

1Ninsa gokwana ase emenwa ya mwanyabanto na ey’abamalaika, onye tindi nobwanchani, nabeire buna etaai ekwoga gose endege ekobuga.

2Naende ninsa koba nekeegwa gi’okobana, na komanya obobisi bwonsi, ne chisemi chionsi; nimba nokwegena gwonsi oko koranyare kong’anyia ebitunwa, korende onye tindi nobwanchani, inche tindi gento.

3Naende ningabera abataka ebinto biane bionsi, naende nindua omobere one oyie ase omorero, onye tindi nobwanchani, ayio takongwenera gento.

4Obwanchani nigo bokoremereria, naende nigo bokoba nobwororo. Obwanchani tibori koba ne ribero, tibori koenena, tibori gwetogia,

5tibokomocha koba nogosika, tibokorigia ayare ayaye, tibori kobeeigwa, tibori kobara amabe;

6tibokogokera obobe, korende bogokera ekeene.

7Obwanchani nigo bokoremereria onsi, bwegena onsi, bosemeria onsi, bobogoria onsi.

8Obwanchani tibori nomoerio; korende koborabeo obobani, nabosire; kerabe emenwa, neere; gochirabe chisemi, nachisire.

9Naki okomanya gwaito tikori okw’oboikeranu, na obobani bwaito tibori obw’oboikeranu;

10korende ekero oboikeranu bogocha, egetaikeraneti nagesire.

11Ekero narenge omwana, nigo narenge gokwana buna omwana, nigo narenge korengereria buna omwana, naende nigo narenge komanya buna omwana; konabeire omonto omonene natigire amang’ana ’obwana.

12Naki ekero kia bono nigo tokorora buna ase ekerore buna orotutu; korende ekero keria ntorore obosio ase obosio. Ekero kia bono namanyire ase ensemo; ekero keria nimanye onsi, buna inche imanyekanete kegima.

13Gaki bono biatigaire okwegena, na ogosemeria, na obwanchani, aya atato; erire rinene ase aya nobwanchani.

← Chapter 12 Jump to: Chapter 14 →