2 Corinthians 1

Gussi (EBIBILIA ENCHENU) 2020

Jump to: Chapter 2 →

1Inche Paulo, omotomwa o Kristo Yeso ase ogwancha kwa Nyasae, amo noyominto Timotheo nkobarikera tore inwe ab’ekanisa ya Nyasae ere ase Korinto amo nabachenu bonsi abare ase ense yonsi y’Akaya.

2Obuya bobe asemore na omorembe bikorwa ase Nyasae Tata oito na ase Omonene Yeso Kristo.

3Nyasae, Tata bw’Omonene oito Yeso Kristo, Tata bw’amabera, Nyasae bw’okoremia gwonsi, atogigwe.

4Ere nigo agotoremia ase emechando yaito yonsi, erinde naintwe tonyare koremia baria bare ase emechando ende yonsi, ase okoremia okwo twaremigwe intwe abanyene na Nyasae.

5Naki buna emechando ya Kristo yatobucheire, naboigo okoremigwa gwaito gwatobucheire ase enchera ya Kristo.

6Korende onye intwe tore ase emechando, nigo ere ase okobanyorera inwe okoremigwa na ogotooreka, na onye intwe tokoremigwa, nigo ere ase okobanyorera inwe okoremigwa, erinde monyore chinguru na okoremereria gw’okobogoria emechando eria eria tobogoretie intwe.

7Na ogosemeria gwaito ase engencho yaino nigo goteneine bokong’u, ekiagera twamanyire ng’a buna more ababwatani b’emechando eria, naboigo morabe ababwatani ase okoremigwa koria.

8Naki baminto, nigo twanchete momanye amang’ana ’emechando eria yatonyorete Asia. Chigurube chiria nigo chiaetanetie chinguru chiaito, goika tokerusia moyo koba moyo.

9Ee, intwe abanyene nigo twarenge nekina ki’amakweri ase emioyo yaito, erinde titwesemeria intwe abanyene, korende tosemerie Nyasae oyokobokia abakure;

10oyototooretie korwa ase amakweri amanene buna aria, naende natotoorie ase ekero kegochi‐gocha. Ere ntomosemeretie ng’a nagenderere gototooria,

11ekero inwe boigo mogotokonya amo ase ogotosabera. Ase igo, abanto abange baakere Nyasae ng’a mbuya mono ase engencho yaito, ase obuya obo twaeirwe, ekiagera abange bagotosabera.

12Naki ogwetogia gwaito nakwo oko, ng’a chinkoro chiaito ime nigo chigotworokia, ng’a ase obogima bwaito ase ense eye na mono kobua ase egati yaino, nigo tware kogamberwa nobochenu na oborabu bw’omoyo bokorwa ase Nyasae, tari ase obong’aini bwa mwanyabanto, korende ase obuya bwa Nyasae.

13Naki titobarikereti inwe kende, otatiga ring’ana eri rioka moranyare gosoma na komanya. Na inche nasemeirie ng’a omoerio namonyare korimanya,

14buna motomanyete ensemo, ng’a intwe nigo tore ogwetogia kwaino, buna inwe more asetore ase rituko riria ri’Omonene Yeso.

15Ekiagera narenge nobomaene obo nkarigia gocha asemore agwo ritang’ani, erinde monyore ogosesenigwa ara kabere.

16Ninganetie goetera seino ekero nkogenda Makedonia, naende nkorwa Makedonia ning’iranere seino, erinde monkoobe ase orogendo rwane gochia Boyahudi.

17Inee! Ekero narengereretie gokora aya, inarenge ne chitang’u‐tang’u koroisia emeroberio yane? Gose nigo nayeroisetie buna omonto bw’ense ore ang’e goteba, “Ee, ee”, na, “Taibo, taibo”?

18Korende buna Nyasae are omwegenwa, ring’ana riaito asemore tiriarenge “Ee” na “Taibo.”

19Naki Omwana o Nyasae, Yeso Kristo, oyo inche na Silivano, na Timotheo, twarandetie ase egati yaino tabete “Ee” na “Taibo”, korende asare “Ee” nero ereo botambe.

20Naki chiira chionsi chia Nyasae nigo chire “Ee” ime asare; nakio gekogera togokwana “Amina” asare, ase okoa Nyasae obonene.

21Gaki Nyasae oyotokong’irie amo nainwe ase Kristo; nere otochorete,

22naende agatobeka ekemanyererio kiaye, agatoa Omoika oye ase chinkoro chiaito okaba intenenera.

23Korende inche nigo nkorigia Nyasae ambere kirori, ng’a ase okobarorera inwe amabera tindagenda Korinto.

24Tari ng’a nkogambera tore okwegena kwaino; korende nigo togokora emeremo amo nainwe ase omogoko oino, ekiagera moteneine bokong’u ase okwegena.

Jump to: Chapter 2 →