2 Corinthians 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Inee! Ntwachakire naende gwetogia intwe abanyene? Gose intwe ntogwenerete, buna abande, konyora amarube are nogotogigwa gocha asemore, gose ayakorwa asemore?

2Inwe abanyene nerirube riaito ririkire ase chinkoro chiaito, rimanyekanete na gosomwa nabanto bonsi.

3Igo momanyekanete buya ng’a mwabeire rirube ria Kristo, erire emeremo y’ogokora gwaito, ririkire tari ase ewino, korende nase Omoika o Nyasae ore moyo; tari ase chibao chi’amagena, korende ase chibao chie chinkoro chia mwanyabanto.

4Na ogosemeria okwo tore nakwo ase obosio bwa Nyasae ase Kristo;

5tari ng’a ntweisanerete intwe abanyene korengereria ring’ana rinde rionsi rikorwa asetore abanyene, korende ogoisanera gwaito nigo gokorwa ase Nyasae,

6oyotoisaneirie koba abasomba b’okobwatana okoyia; tari ase ririko, korende ase Omoika. Naki ririko nigo rigoita, korende Omoika orua obogima.

7Bono onye ogokora kw’amakweri kore ase amariko, ayarikire chinuguta na komang’erwa ase amagena, gwachete ase obonene, goika Abaisraeli tibanyara korigereria obosio bwa Musa, ase engencho y’obonene bw’obosio bwaye; na obonene obwo bogaeta,

8Inee, ogokora kw’Omoika tigokoba nobonene goetania boria?

9Naki onye ogokora gw’ekina kwarenge nobonene, igo ogokora kw’oboronge nkore nobonene kobua mono.

10Naki keria kiarenge nobonene tikegwatorwa bono ng’a nkere nobonene ase engencho y’obonene boria bore obonene kobua.

11Ekiagera onye boria bwaetete bwarenge nobonene bwaye, boria boreo botambe mbore nobonene kobua mono.

12Gaki, ekiagera tore nogosemeria kore buna oko, iga tore noboremu obonge gatogokwana.

13Titogokora buna Musa oyotubete obosio bwaye, erinde Abaisraeli tibanyara korigereria mono omoerio bw’obonene boria bwarenge goeta.

14Korende ebirengererio biabo bigakong’igwa. Naki nonya ngoika rituko ria rero, ekero amariko ’okobwatana ogokoro agosomwa, egietubo ekio ekio keba tigekorusigwa, ekiagera ase Kristo bweka kiarusigwe.

15Nonya ndero ekero amachiko a Musa agosomwa, egietubo keria ngetubete ase chinkoro chiabo.

16Korende ekero omonto akoonchokera Omonene egietubo keria nigo gekorusigwa.

17Bono Omonene nere Omoika; na aase Omoika bw’Omonene ore, agwo nao obosibore bore.

18Korende intwe twensi abatokorigereria obonene bw’Omonene namaiso atatubiri, nigo tokorora buna ase ekerore obonene obwo. Nigo tokoonchorwa koba buna omogwekano oye, na kogenda korwa ase obonene goika ase obonene. Aya nigo agokorwa n’Omonene oyore Omoika.

← Chapter 2 Jump to: Chapter 4 →