2 Peter 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Korende ababani b’oborimo mbaorogete ase egati y’abanto, buna aborokia b’oborimo barache kooroka ase egati yaino. Abwo barache gosoyia amorokererio ’ogosareka bobisi, na bagokana Omonene oyo obagorete, bakwerentera ogosareka gotari gotebana.

2Abange nabatunyane ogokora kwabo kw’obonyaka, na ase engencho y’abwo enchera y’ekeene neramwe.

3Ase obwegimeria na amang’ana ’obong’ainereria nabenyorere abanyene ebitoki korwa asemore. Korende ekina kiabo, egiachikire korwa kare, tikegotebana, gose ogosira kwabo tigokorara.

4Naki Nyasae tabarorerete amabera abamalaika baria bakorete ebibe, korende akabaruta ase eoromomo y’omosunte aase barendire goika ekina geche.

5Tabarorerete amabera abanto b’ense eria ya kare, korende akarenda Nuhu, oyorenge omoraria bw’oboronge, amo nabanto bande batano na babere, ekere arentete etoigo igoro ase ense y’abanto abatamoirogete Nyasae.

6Ase ogosamba emechie eria yare korokwa Sodomu na Gomora ekaba ribu, akayegambia esarigwe, akayekora ekaba ekiorokererio ki’ogokurera abanto abatarengereretie komoiroka Nyasae.

7Korende agatooria Loti, omonyene oboronge, oyorenge goichanigwa ase orogendo rw’obonyaka rwa baria abasaria amachiko.

8Omonto oyo omonyene oboronge, oyomenyete ase egati yabo, nigo arenge gwechanda ase omoyo oye omoronge rituko ase rituko ase aya onsi arenge korora na koigwa ase ogokora kwabo kw’ogosaria amachiko.

9Omonene nanyare kobatooria abwo bamoirogete korwa ase ogoteemwa, na kogacha abatari noboronge inse y’egesusuro goika rituko ri’ekina,

10na kobua mono baria bakobwatia okogania okobe kw’omobere na gochaya okobua. Barabwo nigo bare abeanchi, bare noboremu, na tibari koiguswa ase okorama abwo b’obonene.

11Abamalaika, nonya bare abanene kobua ase chinguru na okobua, tibakorenta ekina gi’okorama barabwo ase obosio bw’Omonene.

12Korende abanto abwo nigo banga buna ching’iti chiatongetwe chitari nobong’aini, chiaiboretwe ase okobwatwa na gosirigwa. Barabwo nigo bakorama ase amang’ana batamanyeti. Ase ayio inabasirigwe ase ogosirigwa kwabo abanyene.

13Bakonyorwa nobobe buna eng’eria y’ogokora okobe. Barabwo nigo bagokaga ng’a ogotinda na okwegokia ekero kia mobaso nobwansu. Babeire ebimoa bi’obosooku na amamocho, bakwegokia ase obong’ainereria bwabo kobagokora emeyega amo nainwe.

14Amaiso abo nigo aichire nobotomani, na tibagotiga gokora ebibe. Nigo bakogenka abare nemioyo etari ne chinguru, na bare ne chinkoro chianarigwe ase obwegimeria. Barabwo nigo bare abanto baragereretigwe.

15Basirire ekiagera batigire enchera erambogete na kobwatia enchera ya Baalamu, mosinto o Beori, oyobwanchete eng’eria y’ogokora okobe.

16Ere nigo atogonyeretwe ase ogosaria kwaye omonyene, ekero etigere etari gokwana egakwana ase eriogi ria mwanyabanto, egatanga obobarimo bw’omobani oria.

17Abanto aba nechinsoko chitari namache na amare akoirwa nomwaga, bagacheirwe obomwamu bw’omosunte.

18Nigo bagokwana amang’ana ’oboenenu atari nengencho, na ase okogania okobe kw’omobere na obonyaka bakogenka abwo bachakire gotama baria bagendererete gochia gosira.

19Bakobariera eira y’obosibore, korende barabwo abanyene nigo bare abasomba b’ogosareka. Naki omonto kabuirwe nomonto onde nigo akoba omosomba bw’omonto oria.

20Naki baria baikire gotama ogotacheneka gw’ense ase okomomanya Omonene na Omotooria oito Yeso Kristo, korende kobakobwatwa naende na kobugwa nero, okoba kwabo kw’omoerio nkobe okobe kobua koria kwe ritang’ani.

21Naki anga nigo yabete buya onye tibamanyete enchera y’oboronge, kobua koyemanya naende koirana nyuma korwa ase ogochika ogochenu okwo baetwe.

22Barabwo omoreng’anio oria bw’ekeene obaikeire, oria ogoteba, “Esese yairaneire amaroki aye enyene,” na “Embeche eyasibigwe ekwegara‐garia ase etintira ime.”

← Chapter 1 Jump to: Chapter 3 →