2 Peter 3

Gussi (EBIBILIA ENCHENU) 2020

← Chapter 2 Jump to:

1Abanchani, rirube eri neria kabere nabarikeire inwe. Ase onsi abere nabokirie ebirengererio biaino ebiya ase okobainyoria,

2monyare koinyora amang’ana aria akwanetwe kare nababani abachenu, na ogochika oko Omonene na Omotooria abarenterete goetera ase abatomwa baino.

3Ritang’ani momanye ring’ana eri, ng’a ase amatuko ’omoerio abanto abanyacheche b’ogosekereria inabache, baria bagotunyana okogania kwabo abanyene,

4bagoteba, “Ng’ai bore oboikeranu bw’eira eria y’ogocha kwaye? Naki korwa agwo chisokoro chiaito chiararete ebinto bionsi nabo bigendererete engencho eyio eyio, buna biarenge korwa omochakano bw’ogotongwa.”

5Naki nigo bamiametie amaiso abo tibarora ng’a igoro nao yarenge korwa kare, na ense egatongwa korwa ase amache, na goetera ase amache, ase chinguru chie ring’ana ria Nyasae.

6Ase ayio, ense eria y’ekero keria egasira ase etoigo ime.

7Korende igoro ya bono amo na ense eye biagacheirwe omorero ase ring’ana erio erio, birendwe goika rituko ri’ogosirigwa kw’abanto abatamoirogeti Nyasae.

8Korende abanchani, timweba ring’ana eri, ng’a ase Omonene rituko erimo nigo rire buna emiaka elifu, na emiaka elifu buna rituko erimo.

9Omonene tagotebana goikerania, eira yaye, buna abande bakagete ng’a otebanire, korende nigo aremereretie ase engencho yaino, tancheti monto onde bwensi asire, korende bonsi baikere okoonchoka.

10Korende rituko ri’Omonene nigo rirache buna omoibi agocha. Ase rituko erio igoro neruo negeturi ekenene, na ebitongwa bia igoro inabisire nomorero ogotetenya, na ense na ebinto ebire aroro inabiyie.

11Naboigo, ekiagera ebinto ebi bionsi nabisire, nebagwenerete inwe mobe abanto b’orogendo orochenu na abe chingencho chi’obonyasae.

12Nebagwenerete gotengera na koayereria rituko ria Nyasae riche bwango. Ase rituko riria igoro nesirigwe na koyia, na ebitongwa bia igoro inabinyititoke nomorero omonene.

13Korende buna atorierete eira ntotengerete igoro enyia na ense enyia, ase ebio oboronge mboreo ime yabo.

14Ase ayio abanchani, ekiagera motengerete ebio, kora omokia, erio moche kororekana asare more nomorembe, motari na kemoa gose na komocha.

15Na bara okoremereria kw’Omonene oito ng’a nogotooreka. Naboigo noyominto omwanchwa, Paulo, abarikerete koreng’ana nobong’aini aetwe.

16Igoro y’amang’ana ayio arikire ase amarube aye onsi. Imeo nare amang’ana ande ayare amakong’u koyamanya, ayio abanto batorokereretigwe buya na batateneini bokong’u bakoonchorana, buna bakoonchorana amariko ande, na igo bakwerentera ogosira.

17Gaki, abanchani, komwatang’anire komanya aya, erende timobaisa gotantanigwa nogosira kw’abwo bagosaria amachiko, na igo mobaise kogwa korwa ase ogwetenenera kwaino.

18Korende mokine ase obuya na ase okomomanya Omonene na Omotooria oito Yeso Kristo. Obonene nobwaye bono na goika kare na kare. Amina.

← Chapter 2 Jump to: