Amos 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Inwe Abaisraeli, tegerera moigwe amang’ana aya Omonene akwanire igoro yaino, ee, igoro y’egesaku eke gionsi narusetie korwa ase ense ya Misiri:

2“Ninwe mweka imanyete ase chiamate chionsi chi’ense. Ase ayio nimbae egesusuro ase engencho y’ebibe biaino bionsi.”

3Inee! Abanto babere mbataarere amo onye tibabwataini?

4Inee! Endo nerume ase rinani, onye teraita eke yare gotwara? Gose endo ensae nkoruma ere, onye terabwata kende ekoria?

5Inee! Enyoni nebwatwe onye tetegeiri obosugunia? Gose omoeto notegoke onye tobwateti gento?

6Inee! Egetureri gi’esegi nkebugigwe ase omochie, na abanto tibaba nobwoba? Amang’ana amabe nabe ase omochie, Omonene atayatometi?

7Ekeene, Omonene Nyasae tagokora ring’ana rinde rionsi ritang’ani ataramaanora obobisi bwaye ase abasomba baye ababani.

8Endo koyarumire, monto ki otari kwoboa? Omonene Nyasae gakwanire, ning’o otari koraria obobani obwo?

9Raria amang’ana ayio ase chinyomba chinkong’u chi’Asidodi, na echi’ense ya Misiri, motebie abanto bare aroro: “Inchuo, mosangererekane amo igoro ase ebitunwa bia Samaria, morore eburu‐buru ere aroro, na buna abanto bachandire.”

10Omonene nigo agoteba iga: “Abanto abwo tibamanyeti gokora ayare amaya. Nigo bagachete ebinto bi’obouri na ebi’oboibi ase chinyomba chiabo chinkong’u.”

11Ase ayio, aya naro Omonene Nyasae agoteba: “Ababisa mbanaarie ense eye, baiyerie chindwaki chiaino inse, echio mwekengerete, ne chinyomba chiaino chinkong’u chisakorwe.”

12Aya naro Omonene agoteba: “Buna koreng’ana omorisia agotaboria korwa ase omonwa bw’endo amauga ’amagoro abere, gose egetabo ki’ogoto, naboigo n’Abaisraeli barataborigwe, abwo bamenyete Samaria baikaransete ase ebirogo ebiororo na ase emeito etubire nebitambaa bi’ariri.”

13Omonene Nyasae, oyore Nyasae bw’Emeganda, nigo agoteba iga: “Tegerera moigwe amang’ana aya, erio moyararie ase ororeria rwa Yakobo.

14Ase rituko erio ndarue egesusuro ase Abaisraeli ase engencho y’ebibe biabo, ninsarie na gotagora ebisasimero bia Beteli; nintagore na koiyeria inse emegwekano ye chingunchara ere ase ebisasimero biria.

15Nintagore chinyomba ase mokobeera ekero ki’obokendu amo nechio mokobeera ekero ki’egurugura; boigo ninsarie chinyomba chichabeire amaino e chinchogu, ne chinyomba chinene nchisirigwe kegima.” Nabo Omonene atebire.

← Chapter 2 Jump to: Chapter 4 →