Amos 6

Gussi (EBIBILIA ENCHENU) 2020

← Chapter 5 Jump to: Chapter 7 →

1Obobe nobwabo abwo bamenyete buya agwo Sayoni, na abwo batoererete ase ebitunwa bia Samaria, abwo bare abasike b’egesaku egetang’ani, eki Abaisraeli bagochiera.

2Genda goika Kaline, moyorore, naende mogende goika Hamati, oyio ore omochie omonene, naende motirimboke gochia Gati bw’Abafilisti. Inee! Barabwo nigo bare buya kobua abanto b’amaruoti aya are aiga? Gose chingongo chiabo nechinene kobua orogongo rwaino?

3Obobe nobwaino, inwe abamogoteba ng’a rituko ri’obobe ng’are rire, na mwanchera ogokora okobe kw’obotindi kobeera ase egati yaino.

4Obobe nobwaino inwe aba mokorarera amarere achabeire amaino e chinchogu, naende mwaba mokwerambora ase ebirogo biaino bigwotota. Nigo mokoba mokoria chimanwa chie ching’ondi chichorire, ne chimori chinoru korwa ase ameeri.

5Inwe nigo mogotera amatera ay’okwoga, na mweroiseria amakano ao ao, aya mokobugia, buna Daudi akorete.

6Nigo mokonywa edivai korwa ase ebitaabo ebinene, naende mweaka amaguta e rigori rinene, korende timoichanereti ogosirigwa kw’ororeria rwa Yusufu.

7Ase ayio, inwe mobe abe ritang’ani koirwa ase obosomba, na emegoko y’emeyega yaino neere.

8Omonene, Nyasae bw’Emeganda, nigo agoteba iga: “Inche Omonene netianirie ngoteba: Nigo ngechirie noboenenu bw’abanto ba Yakobo, na nigo ngechete chinyomba chiabo chinkong’u. Ase ayio nintige omochie osirigwe amo nebinto bionsi bireo.”

9Nebe ng’a onye abasacha ikomi batigaire ase enyomba eyemo, nabarabwo goika bakwe.

10Omoamate bw’omonto oyio okure nache kobogoria amauga amo noyo ogochia koyasamba. Omoamate oria narangerie onde bwensi otigarete ase enyomba eria ime, amoborie, “Onde nare aa motigarete komo?” Omonto oria nairanerie, akane, “Yaya.” Erio omoamate oria namotebie “Kira‐kiri! Twerende titobaisa gwatora erieta ri’Omonene.”

11Ase ayio rora, Omonene narue ogochika ng’a chinyomba chire chinene na echire chinke chiiyerigwe inse chisamunyokane.

12Inee! Chibarasi nchinyare kominyoka igoro ase egetare? Gose omonto nanyare korema egetare ne chiombe? Korende inwe mwaonchoire ayare ay’oboronge abeire obosongo, na okwama kw’oboronge kwabeire obororo buna chinkama.

13Inwe nigo mokogokera egento kere bosa, mogoteba, “Inee! Titwenyorerete chingunchara goetera ase chinguru chiaito abanyene?”

14Aya naro Omonene, Nyasae bw’Emeganda, agoteba: “Inwe Abaisraeli rora, nimbarentere abanto b’egesaku gete; barabwo mbabachande gochakera ase egesoero kia Hamati goikera ase akarooche g’Ekerubo Ekiomo.”

← Chapter 5 Jump to: Chapter 7 →