Ezekiel 43

Gussi (EBIBILIA ENCHENU) 2020

← Chapter 42 Jump to: Chapter 44 →

1Nyuma y’ayio akang’ira goika ase egeita kiarochie moocha.

2Nkarora obonene bwa Nyasae bw’Abaisraeli bogocha korwa moocha; eriogi ri’ogocha kwaye nigo riarenge koeera buna eri’amache amange, na ense ekamorekwa nobonene bwaye.

3Obonene obwo naroche ase okorora nigo bwarenge buna boria naroche ekero nachete gosaria omochie o Yerusalemu, na buna okorora koria konya narorire agwo ase orooche rwa Kebari. Erio ngatung’ama inse nkaumama.

4Obonene bw’Omonene bogasoa Hekalu goetera ase egeita kia moocha.

5Aroro agwo Omoika okany’imokereria igoro, okang’ira ase eraaro ya ime, na nkarora obonene bw’Omonene bwaichoire ase Hekalu eria yonsi.

6Erio omonto agatenena mbarabare asende, na nkaigwa omonto onde ogokwana nainche korwa ime ye Hekalu eria,

7agantebia, “Aye mwanyabanto, aase aiga nao ekerogo kiane ki’obonene kere, naende nao amagoro aane agotacha. Aiga nimenye ase egati y’Abaisraeli kogenderera botambe. Na Abaisraeli gose abaruoti babo tibakogenderera gokora erieta riane richenu ribe eritachenegeti, goetera ase obonyaka bwabo bw’ogosasima emegwekano, na emebere ekwete y’abaruoti babo, na aase abo aimokererete igoro.

8Ekero barabwo babekire emeriibo yabo ya inse ang’e neyane, na emetobwa yabo ang’e neyane, batigire orwaki rwabo ase egati yabo na inche, nigo bakorire erieta riane richenu riabeire eritachenegeti, ekiagera bakorire ay’okogechia. Ase ayio nabasiririe inde nendamwamu.

9Tiga barusie korwa asende obonyaka bwabo bw’ogosasima emegwekano, na emebere ekwete y’abaruoti babo, erio nario ndamenye ase egati yabo kogenderera botambe.

10“Aye mwanyabanto, tebia Abaisraeli amang’ana ayio igoro y’enyomba eyio, erinde basookigwe ase engencho y’amabe abo. Tiga barenge oboagacho obwo obuya.

11Onye bakoba nobosooku ase engencho y’amabe onsi bakorire, rirorio oborokie omogwekano bw’enyomba eyio buna erobeirie, na aase aye agosoerwa na aase agosokerwa, na okororekana kwaye, amo nemeroberio yaye yonsi, na amachiko aye. Oyarikere agwo ase amasio abo, erinde babwate emeroberio yaye yonsi na koyekora.

12Oko nakwo ogochika gwe Hekalu: Igoro y’egetunwa, na aase onsi areo, nabe aachenu mono; ee, okwo nakwo ogochika gwe Hekalu.

13“Ebi nabio ebirengo bi’egesasimero, ase ekerengo ki’amaboko amo neki’obogare bw’egesanyi: Enterekerero yaye nigo yarenge ey’ekerengo gi’okoboko okomo korwa inse gochia igoro, na obogare gochia ase egesasimero ekenyene okoboko okomo. Orosingo roetanaine omogo bw’enterekerero eria nigo rwarenge orw’ekerengo gi’ekeng’ese gi’okoboko okomo gochia igoro. Eyio nigo yarenge enterekerero yaye.

14Korwa enterekerero inse goika egetambokero kie ritang’ani ki’egesasimero ekenyene nigo kiarenge obotambe bw’ekerengo ki’amaboko abere gochia igoro, na obogare gochia ime okoboko okomo; na korwa ase egetambokero keria egeke gochia ase ekere ekenene, nigo bwarenge obotambe bw’ekerengo ki’amaboko ane, na obogare bwaye okoboko okomo.

15Aase bagoutera omorero na gosambera ebing’wanso igoro y’egesasimero nigo arenge ay’ekerengo ki’amaboko ane gochia igoro, na korwa aroro emegwekano ene ye chingunchara yaroisirie yarochie igoro.

16Na eriko riria nigo riarenge eri’ekerengo ki’amaboko ikomi na abere, obotambe na obogare nigo biareng’aine.

17Egetumo ki’egesasimero nigo kiarenge egi’ekerengo ki’amaboko ikomi na ane, obotambe na obogare nigo biareng’aine. Orosingo rwaetanaine omogo oye nigo rwarenge nobogare bw’ekerengo gi’ekerengo gi’ekeng’ese gi’okoboko okomo. Enterekerero y’egesasimero nigo yarenge ey’ekerengo gi’okoboko okomo ase chinsemo chionsi na ekeriinero kiaye nigo kiarenge ensemo ya moocha.”

18Naende omonto oria agantebia, “Aye mwanyabanto, aya naro Omonene Nyasae agoteba: Eye nero emeroberio echikire erakorwe ase egesasimero ase rituko erio kerabe kiaagachirwe, erinde ebing’wanso bi’ogosambwa biruerwe aroro, na amanyinga nabe akonyororokerigwa igoro yaye.

19Ase rituko erio oe abakuani Abalawi b’ororeria rwa Zadoki eeri ensae ebe ekeng’wanso ki’ebibe. Abwo nabwo baeirwe ribaga ri’okong’ika ang’e ase ogonkorera. Nabo Omonene Nyasae atebire.

20Erio oimokie amanyinga make ay’ekeng’wanso ekio, oyagindie ase emegwekano eria ene ye chingunchara ere ase egesasimero, na ase chikoona inye chi’egesasimero, na igoro ase orosingo rw’egesasimero chinsemo chionsi. Ase enchera eyio nochene egesasimero na kogekorera okobwatanigwa.

21Naende oire eeri eria oyerue ebe ekeng’wanso ki’ebibe, oyesambere aase achikire, isiko y’Aase Aachenu.

22Rituko ria kabere orue egoree ensae, etari na kemocho ase omobere oye, ebe ekeng’wanso ki’ebibe; na egesasimero gechenwe buna giachenetwe nekeng’wanso ki’eeri eria.

23Ekero gwakoorire kogechena igo, orente eeri ensae na emingichi korwa ase riicho, chionsi ibere chibe chitari na kemocho ase emebere yabo.

24Erio ochirente ase obosio bw’Omonene, na abakuani bachinyororokerie omonyo na gochirua chibe ekeng’wanso ki’ogosambwa ase Omonene.

25Kera rituko ase engaki y’amatuko atano na abere mobe mokorua egoree eyemo ebe ekeng’wanso ki’ebibe; boigo mobe mokorua eeri ensae na emingichi korwa ase riicho, chionsi chibe chitari na kemocho ase emebere yabo.

26Ase enchera eyio, ase engaki y’amatuko atano na abere, mobe mogokorera egesasimero okobwatanigwa na kogechena, mogiatanane kebe egechenu.

27Ekero amatuko ayio atano na abere aerire, rituko ria gatano na gatato na kogenderera abakuani mbabe bakorua igoro ase egesasimero ekio ebing’wanso biaino bi’ogosambwa, na ebi’omorembe; erio nario inche ndabanchere. Nabo Omonene Nyasae atebire.”

← Chapter 42 Jump to: Chapter 44 →