Haggai 1

Gussi (EBIBILIA ENCHENU) 2020

Jump to: Chapter 2 →

1Ase rituko rie ritang’ani, omotienyi o gatano na rimo, omwaka o kabere, ekero Dario arenge omoruoti, ring’ana ri’Omonene rigatomwa goetera ase Hagai omobani, rigacha ase Serubabeli mosinto o Sealitieli, oyorenge omogavuna bw’Abayuda, na ase Yoshua omokuani omonene, mosinto o Yehosadaki.

2Aya naro Omonene bw’Emeganda agoteba: “Abanto aba nigo bagokwana ng’a engaki teraika ekero enyomba y’Omonene egwenerete koagachwa naende.”

3Erio ring’ana ri’Omonene rigacha goetera ase Hagai omobani, rikaboria:

4“Inee! Eye nero engaki inwe mogwenerete komenya ase chinyomba chinyasi chiabo chitubire ne chibao chingiya, ekero enyomba eye egendererete koba ritombe?”

5Ase ayio bono, aya naro Omonene bw’Emeganda agoteba: “Inwe rengereria buna chinchera chiaino chiabeire.

6Nigo mokobusura chimbusuro chinyinge, korende mwagesa chinke; nigo mokoragera, korende timori koigota; nkonywa more, korende timori goisaneka; nigo mokobeka chianga, korende timori koigwa riberera; oyo okonyora eng’eria, nigo akoyenyora erinde oyebeka ase omobuko obochogete.

7Ase ayio, aya naro Omonene bw’Emeganda agoteba: Rengereria buna amang’ana aino abeire.

8Tiira gochia ase ebitunwa igoro, morente emete moagachere enyomba eye, erio nario ndagokigwe nero, naende inyeorokie ng’a inche ninde nobonene.” Nabo Omonene atebire.

9“Nigo mwasemeretie monyore ebinge, korende mokanyora ebike; na ekero mwabirentete inka, nkabirurukia bikagenda. Inche Omonene bw’Emeganda nigo nkobaboria: Nase ki yabete bo? Nekiagera enyomba yane yatigirwe egendererete koba ritombe, na kera oyomo oino nigo echanderete enyomba yaye omonyene.

10Ase engencho eyio, riime rikorwa igoro riatangirwe na ense tekwama endagera.

11Narentire eguru‐gura ase ense, na ase ebitunwa, na ase endagera, na ase emesabibu, na ase emezeituni, na ase kende gionsi kegokina ase riroba. Boigo nayerentire ase abanto, na ase emeremo yonsi abanto bagokora.”

12Erio Serubabeli, mosinto o Sealitieli, na Yoshua omokuani omonene, mosinto o Yehosadaki, amo nabatigari bonsi b’abanto bakaigwera eriogi ri’Omonene, Nyasae obo, na amang’ana ’omobani Hagai, oyio Omonene, Nyasae obo, atomete; abanto bakaba bakomoiroka Omonene.

13Erio Hagai, omotomwa bw’Omonene, agakwana nabanto amang’ana ’Omonene, akabatebia, “Omonene nigo agoteba iga: Inche nigo inde amo nainwe.”

14Erio Omonene agasukia omoika o Serubabeli mosinto o Sealitieli, oyorenge omogavuna bw’Abayuda, na oyo o Yoshua omokuani omonene, mosinto o Yehosadaki, na oyo bw’abatigari bonsi b’abanto. Bonsi amo bagacha bagakora emeremo ase enyomba y’Omonene bw’Emeganda, Nyasae obo.

15Ayio nigo akorekanete ase rituko ri’emerongo ebere na kane, omotienyi o gatano na rimo, omwaka o kabere bw’okogamba kw’omoruoti Dario.

Jump to: Chapter 2 →