Haggai 2

Gussi (EBIBILIA ENCHENU) 2020

← Chapter 1 Jump to:

1Ase rituko ri’emerongo ebere na rimo, omotienyi o gatano na kabere, ring’ana ri’Omonene rigacha goetera ase Hagai omobani, rigateba:

2“Kwana na Serubabeli mosinto o Sealitieli, omogavuna bw’Abayuda, na Yoshua omokuani omonene, mosinto o Yehosadaki, na abatigari bonsi b’abanto, obaborie:

3Ning’o otigarete ase egati yaino oyo oroche obonene bw’enyomba eria entang’ani? Moise koreng’ania eye neria ya kare, naki eye ekororekana ase amaiso aino? Inee! Teri kororekana asemore ng’a negento bosa?

4Omonene nigo agoteba iga: Aye Serubabeli, obe omokong’u na aye Yoshua omokuani omonene, mosinto o Yehosadaki, obe omokong’u, nainwe abanto bonsi abamore ase ense eye, mobe abakong’u ase ogokora emeremo, ekiagera inche Omonene bw’Emeganda nigo inde amo nainwe.

5Ekero mwaruete ase ense ya Misiri nigo nabarierete eira ng’a botambe nigo ndabe amo nainwe; ase ayio Omoika one nigo ogendererete komenya ase egati yaino; timoiroka.

6“Aya naro Omonene bw’Emeganda agoteba: Ara rimo naende, engaki enke yatigaire nintengechie igoro chionsi, na ense, na enyancha, amo nense enyomo.

7Naende Omonene bw’Emeganda nigo agoteba iga: Boigo nintengechie ebisaku bionsi, erinde ayaganeirie nabanto b’ebisaku bionsi aoroke, na inche ing’ichorie enyomba yane nobonene.

8Chifeta nechiane, ne chitahabu nechiane. Nabo Omonene bw’Emeganda atebire.

9Omonene bw’Emeganda nigo agoteba ng’a obonene bw’enyomba eye ya bono nabobe obonene goetania obw’eria ya kare. Aase aiga nindete omorembe obe okogambao. Nabo Omonene bw’Emeganda atebire.”

10Ase rituko ri’emerongo ebere na kane, omotienyi o kianda, omwaka o kabere, bw’okogamba kw’omoruoti Dario, ring’ana ri’Omonene rigacha ase Hagai omobani, rikamotebia:

11“Aya naro Omonene bw’Emeganda agoteba: Boria abakuani naki amachiko agoteba.

12Omonto aise kobogoria enyama enchenu ase omogo bw’eanga yaye akwambara, na akune nomogo bw’eanga eria omogati, gose endagera eiyekire, gose edivai, gose amaguta ’amazeituni, gose endagera ende yonsi, Inee, ekio giakunwa nkebe egechenu?” Abakuani bakairaneria, “Yaya.”

13Naende Hagai akaboria, “Onye omonto obeire oyotachenegeti ase ogokuna egetondo karakune ekemo ase ebinto ebio, Inee, ekio nakebe egetachenegeti?” Abakuani bakairaneria, bagateba, “Ee, nkebe egetachenegeti.”

14“Erio Hagai akairaneria, agateba,” “Omonene nigo agoteba iga: Naboigo nabanto aba, na egesaku eke, bare ase obosio bwane, na kera omoremo bagokora namaboko abo nabo ore, na kende gionsi eke bakorua aroro nigo kere egetachenegeti.

15“Ase ayio nigo nkobaboria ng’a korwa rituko ria rero mobe mokorengereria buna yarenge ekero keria rigena konya ritarabekwa igoro ase rigena rinde, ase okoagacha Hekalu y’Omonene.

16Ninki kiabete ase amatuko aria? Ekero omonto arenge kogenda ase etui y’emesaima ng’a anyore emesaima emerongo ebere, onyora ikomi yoka, na ekero arenge kogenda ase amasabibu akomiterwa ng’a anyore ebibekerero emerongo etano biichire edivai, onyora emerongo ebere bioka.

17Nigo nabaagete ase okobarentera oborwaire enyagetabo, na obw’okorigisia, na embura y’amagena ase chindagera chiaino mwakorerete emeremo. Nonya naboigo timwang’iranerete. Nabo Omonene atebire.

18Korwa rituko ria rero, rituko ri’emerongo ebere na kane, omotienyi o kianda, ekero oboroso bwe Hekalu y’Omonene bwabegetwe, na kogenderera, morengererie buna arabe!

19Inee! Chimbusuro nchire ase ebiage? Inee! Emesabibu, na emeko, na emekomomanga, na emezeituni tiyangeti kwama? Korende korwa rituko ria rero nimbasesenie.”

20Ase rituko riria ri’emerongo ebere na kane, omotienyi oria o kianda, ring’ana ri’Omonene rigacha ase Hagai naende, rikamotebia,

21“Kwana na Serubabeli, omogavuna bw’Abayuda, omotebie ng’a inche nintengechie igoro chionsi amo nense.

22Ning’onchorane ebirogo bi’obonene bw’abaruoti, ninsirie chinguru chi’amaruoti ’abanto b’ebisaku. Ning’onchorane chigari na abachiriini; chibarasi nchigwe amo nabachiriinete, kera omonto naite oyomwabo nomoro.

23Omonene bw’Emeganda nigo agoteba iga: Ase rituko riria ninkoire aye Serubabeli omosomba one, mosinto o Sealitieli. Naende Omonene nigo agoteba iga: Ningokore obe buna ebonyi ere nekemanyererio kiane, ekiagera nagochorire. Nabo Omonene bw’Emeganda agoteba.”

← Chapter 1 Jump to: