James 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Abaminto, komorabe mwegenete Omonene oito Yeso Kristo, Omonene bw’obonene, timoba mogwanchereria abanto.

2Naki karasoe ase omosangererekano oino omonto obegete ebonyi y’etahabu ase ekiara kiaye, na bweboetie chianga chingiya, naende omonto onde asoe, oyore omotaka na bweboetie chianga chire ne riko,

3na inwe mwasika oria bweboetie chianga chingiya, na komotebia, “Ikaransa aye aiga aase aagiya”, na gotebia oria omotaka, “Tenena aaria”, gose, “Ikaransa inse aa ase amagoro aane”,

4Inee, timokoreti ogwatananeka ase egati yaino inwe abanyene, na mwabeire abagambi, more nebirengererio ebibe?

5Abaminto abanchani, tegerera! Inee! Nyasae tachorete abataka b’ense eye babe abanda ase okwegena, naende babe abanyamwando b’oboruoti obo abarierete eira, abwo bamwanchete?

6Korende inwe mwachayire oria omotaka. Inee! Baria abanda, tari barabwo babaregete inwe, na kobakurura gochia ase ebigambero?

7Tari barabwo abwo bakorama erieta erio rigiya mwarokirwe inwe?

8Komoraikeranie ogochika gokorwa ase oboruoti buna korikire ase amariko, “Ancha omogisangio oo buna bweanchete”, namokore buya.

9Korende onye more mogwanchereria abanto, mwakorire ebibe, na mwaenekigwe namachiko ng’a nabasaria more.

10Naki monto onde bwensi obwatete amachiko onsi, korende asarie erimo rioka, obeire omomochi ase onsi.

11Naki ere oyotebete, “Totomana”, nere boigo agateba, “Toita”. Gaki, onye totomaneti, korende gwaitire, igo kwabeire omosaria amachiko.

12Kwana bo, na kora boigo, buna abanto barache kogambigwa ase amachiko ’obosibore.

13Naki ekina tikeri namabera asere oyotari namabera. Amabera nigo agochenga igoro y’ekina.

14Abaminto, ngokonywa ki omonto aranyore onye ogoteba ng’a nare nokwegena, na ere tari nogokora? Inee! Okwegena koria nkonyare komotooria?

15Onye oyomino, omosacha gose omokungu, ore bosa, na oremeire endagera ya kera rituko,

16na omonto onde oino amotebie, “Genda nomorembe, bwote omorero, oigote”, korende tamoa ebiaganetie ase omobere oye, naki aramokonye?

17Naboigo nokwegena gwoka gotari nogokora, nigo gokwete.

18Aande gose omonto natebe, “Aye nore nokwegena, na inche ninde nogokora.” Nimoiranerie, “Nyorokia okwegena kwao gotari nogokora, na inche nkworokie okwegena kwane ase ogokora kwane.”

19Aye mbwegenete ng’a Nyasae noyomo; gwakorire buya. Nonya nebirecha mbiegenete boigo na koiguswa.

20Korende aye, omonto otaisaini gento, norigetie komanya ng’a okwegena gotari nogokora nokogomba?

21Inee! Sokoro yaito Ibrahimu taetwe oboronge ase ogokora, ekero aruete Isaka, omwana oye, igoro ase egesasimero?

22Kwarorire ng’a okwegena kwaye amo nogokora mbiakorete emeremo, na okwegena koria kogaikeranigwa ase ogokora.

23Amariko agaikeranigwa, aria agoteba, “Ibrahimu nigo amwegenete Nyasae, na ase engencho eyio akabarwa koba omonyene oboronge.” Igo akarokwa omosani o Nyasae.

24Mwarorire ng’a mwanyabanto nigo akoegwa oboronge ase ogokora, gose tari ase okwegena gwoka.

25Naboigo na Rahabu, oria omotayayi, Inee, taetwe oboronge ase ogokora, ekero aroisetie baria batometwe, akabasokia isiko ase enchera ende eng’ao?

26Naki buna omobere otari nomoika nigo okwete, naboigo nokwegena gotari nogokora nigo gokwete.

← Chapter 1 Jump to: Chapter 3 →