James 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Abaminto, tegwenereti abange asemore babe aborokia, ekiagera momanyete ng’a intwe aborokia inatogambigwe ekina egekong’u kobua.

2Naki intwe twensi nigo tokomocha ase chinchera chinyinge. Onye omonto takomocha ase ogokwana, oyio nomonto omoikeranu, oranyare kogambera omobere oye bwonsi boigo.

3Onye tokobekera chibarasi ebinto emenwa, ebi’ogochiraa, erinde chitoigwere, nigo tokoraa emebere yabo yonsi.

4Morigererie chimeeri boigo, nonya chire chinene mono, na chikoirwa nomwaga omotindi, nigo chikoonchorwa nekeonchori egeke mono, aande onsi omogendia aganetie kogenda.

5Naboigo na oromeme nekiimo egeke, na rororwo nigo rokweenenia ase amang’ana amanene. Rigereria buna ensase enke egosamba rinani rinene mono.

6Oromeme narwo omorero, na ense y’obobe. Ase ebiimo biaito bionsi oromeme narwo rokobeka omobere bwonsi ebimoa, na gotongia omorero egesingo ki’obogima bwaito, na orwo oronyene nigo rwatongetwe nomorero o kare na kare.

7Naki kera egesaku gie ching’iti, ne chinyoni, ne ching’iti chigwekurura, na ebitongwa ebire amache ime, nigo bitugire, na birobio nigo biatugire na mwanyabanto.

8Korende oromeme, onde tari ase mwanyabanto oranyare korotuga. Rororwo nobobe, rotari kogamberwa, roichire nobosongo bokorenta amakweri.

9Ase orwo twatogia Omonene Tata, na ase orwo twaragereria mwanyabanto abatongetwe ase omogwekano o Nyasae.

10Omonwa oria oria orua ogosesenia na okoragereria. Abaminto, amang’ana aya tagwenereti koba bo.

11Inee! Ensoko nenyare ase entuboka eyemo korenta amache amaya, na amache amaroro?

12Abaminto, Inee, omoko nonyare kwama amazeituni, gose omosabibu bwame amako? Naboigo nensoko y’amache are nomonyo tekonyara korenta amache atari nomonyo.

13Ning’o asemore ore omong’aini na omomanyi? Ere aorokie ogokora kwaye ase orogendo rwaye oruya, ase obwororo bokorwa ase obong’aini.

14Korende onye more ne ribero rire nobororo, na okweancha ase chinkoro chiaino ime, timwetogia na gokwana oborimo igoro y’ekeene.

15Obong’aini obo tari boria bogocha korwa igoro, korende nobw’ense, na obwe chingencho chia mwanyabanto, na echi’ebirecha,

16ekiagera agwo ase ribero rire, na okweancha, agwo moroberio toiyo, korende kera ogokora okobe.

17Korende obong’aini bokorwa igoro ritang’ani nigo bore obochenu, naende obw’omorembe, na obwororo, na obokanyeku. Igo boichire namabera na okwama okuya, botari na gosiereria gose na bong’ainereria.

18Okwama kw’oboronge nigo kogosimekwa ase omorembe na baria bagokora omorembe.

← Chapter 2 Jump to: Chapter 4 →