Joel 1

Gussi (EBIBILIA ENCHENU) 2020

Jump to: Chapter 2 →

1Eri nario ring’ana ri’Omonene riachete ase Yoeli, mosinto o Petueli.

2Inwe abagaaka, igwa amang’ana aya! Inwe abanto bonsi abamomenyete ase ense eye, tegerera moigwe! Inee! Amang’ana buna aya anagokorekana ase amatuko aino, gose ase amatuko e chisokoro chiaino?

3Yatebie abana baino, na abana baino bayatebie abana babo, na abana babo bayatebie ekegori kende.

4Endagera chinyanchaba chiatigaretie, chingige chikayeria, na eye chingige chiatigaretie, ebisase bikayeria, na eye ebisase biatigaretie, chingeeti chikayeria.

5Inwe abamwatindire nebinyugwa ebiroro, boka morere! Inwe mwensi aba mokonywa edivai, bokia amagombo, ase engencho y’edivai enyia, ekiagera yarusigwe korwa ase emenwa yaino.

6Egesaku kere ne chinguru getari kobareka kiaumokeire ense yane nigo kebwate amaino anga buna ay’endo, na amagegu aye nigo anga buna ay’endo eaberi.

7Giasaririe emesabibu yane, kiabunire emeko yane; kiayesaboire, na gotuguta amasabo inse, ne chinsagia chi’emete eyio chiarabire se.

8Rera na kobokia amagombo buna omoiseke omwekungi obegete chianga chie chigunia, okwereirwe nomosacha bw’oboke bwaye.

9Okoruegwa kw’endagera na ogw’ekenyugwa biatangirwe, tibirentwa ase enyomba y’Omonene. Abakuani abare abakoreri b’Omonene nigo bakorera.

10Emegondo yatigaire bosa; riroba nigo rikorera ekiagera endagera yasirigwe, edivai enyia tekobao na amaguta ’emezeituni akeeire kegima.

11Inwe abaremi ichana na gosooka, nainwe abaroiseria b’emesabibu, rera, ekiagera engano na esairi biasirigwe amo nokwama gwonsi kw’emegondo.

12Emesabibu yomire, na emeko boigo. Emekomomanga, na emekendo, na emete y’amapera, ee, emete ende yonsi y’emegondo yomire. Omogoko bw’abanto oerire.

13Inwe abakuani, eboyie chigunia, morere, nainwe abakoreri b’egesasimero, bokia amagombo! Inwe abakoreri ba Nyasae one, eboyie chigunia, morere ase Hekalu ime ase obotuko bwonsi, ekiagera okoruegwa kw’endagera na ogw’ekenyugwa biatangirwe, tibirentwa ase enyomba ya Nyasae oino.

14Raria engaki y’okweng’ata ogochenu; rangeria omosangererekano bw’ogosasima! Sangereria abagaaka na abanto bonsi b’ense eye, bache ase enyomba y’Omonene, Nyasae oino, erinde morere ase Omonene.

15Obobe nobwaito, ekiagera rituko ri’Omonene nigo rire ang’e, rirarente ogosirigwa korwa ase Omonguru.

16Inee! Endagera tesiriri korwa ase amaiso aito na omogoko na omochengo korwa ase enyomba ya Nyasae oito?

17Chimbusuro chiomeire ase riroba ime; ebiage biatigaire bosa na ebigancha biasarekire, ekiagera endagera yaborire.

18Chitugo chirochio nigo chikonakwana, amaicho e chiombe achandekire, ekiagera obonyansi bwaborire chikorisia, nonya namaicho e ching’ondi achandekire.

19Aye Omonene, inche nigo nkorera asore, ekiagera eguru‐gura enga buna omorero yomirie amarisio ’erooro, na eyio enga buna chimeme chi’omorero yasambire emete yonsi y’orosana.

20Nonya ne ching’iti chi’orosana nigo chikorera asore, ekiagera chindooche chiakamire, amache taiyo, ee, omorero oria osambire amarisio ’erooro.

Jump to: Chapter 2 →