Joel 3

Gussi (EBIBILIA ENCHENU) 2020

← Chapter 2 Jump to:

1“Rora, ase amatuko ayio, na ase engaki eyio, inche Omonene ning’iranerie Abayuda, na abanto ba Yerusalemu, bare ase obosomba, amaya abo.

2Ninsangererie abanto b’ebisaku bionsi, mbatirimbokie gochia ase Rikura ria Yehosafati; aroro agwo nimbanachere ekina, ekiagera mbasiarerete Abaisraeli, abwo bare omwando one, gochia ase egati y’abanto b’ebisaku, naende baatananire ense yane.

3Baakeire abanto baane obomera, baoonirie abana abamura, erinde banyore abakungu abatayayi, na baoonirie abana abaiseke, erinde banyore edivai bakonywa.

4“Inwe Turo na Sidoni, ne chingongo chionsi chi’Abafilisti, ngento ki mogonkorera? Inee! Nigo moganetie kong’iraneria egento? Moise korusia egesiomba igoro yane, nimbairanerie ogokora kwaino kobe igoro yaino bwango mono.

5Inwe mwaimokirie chifeta ne chitahabu chiane, na mwairire ebinto biane ebiya bingwenerete gochia ase chihekalu chiaino.

6Mwarusirie Abayuda na abanto ba Yerusalemu korwa ase chingongo chiabo, mwabaoonirie ase Abagiriki.

7Korende bono nimbarangerie barue aase aria mwabaoonetie gochia, erinde mbairanerie inwe ogokora kwaino kobe igoro yaino.

8Inche Omonene, ning’oonie abana baino, abamura na abaiseke, ase Abayuda, na barabwo babaoonie ase abanto ba Seba, abwo bamenyete aare mono. Ninche Omonene nakwanire ayio.”

9Raria amang’ana aya ase egati y’abanto b’ebisaku: Ebeke ang’e ase esegi! Seegeta abarwani chituoni! Tiga abarwani bonsi bachiche ang’e bachake esegi.

10Tura amakombe aino abe emioro, na emeyio yaino chinkuro ebe amatimo! Tiga oyore omworo atebe, “Nainche nigo inde etuoni.”

11Inwe abanto b’ebisaku momenyete ase chinsemo chionsi, ayerera bwango mooche, sangererekana amo. Aye Omonene, renta abarwani bao b’esegi bare chituoni!

12“Tiga abanto b’ebisaku baseegetane, bache ase Rikura ria Yehosafati. “Aroro agwo nao ndanachere abanto b’ebisaku bionsi babaetanaine ekina.

13Soyia emeyio chinkuro mogondo, mogese, ekiagera rigesa riaikire. Soa ime motindache, ekiagera ekemitero ki’edivai kiaichoire. Chinyongo chiaichoire na goiteka, ekiagera obobe bwabo bwabeire obonene.”

14Emeganda na emeganda nigo ere ase Rikura ri’Ekina, ekiagera rituko ri’Omonene ng’ang’e rire agwo ase Rikura ri’Ekina.

15Erioba na omotienyi mbibekwe omosunte, ne ching’enang’eni tichikobara.

16Omonene narume korwa Sayoni, aake eriogi riaye korwa Yerusalemu; igoro na ense nchitengechigwe. Korende Omonene nabe obotamero bw’abanto baye, na eburi enkong’u y’Abaisraeli.

17“Erio namomanye ng’a inche ninche Omonene, Nyasae oino, imenyete Sayoni, egetunwa kiane egechenu. Yerusalemu nobe omochie omochenu, na abanto b’ebisaku ebigeni tibagosoa aroro nonya ng’ake.

18“Ase rituko erio ebitunwa mbitonyie edivai enyansu, na ebigoro mbiichore amabeere, ne chindooche chionsi chi’Abayuda nachiichorwe namache. Ensoko netuboke korwa ase enyomba y’Omonene, enyiyie ense omweya ya Sitimu.

19“Ense ya Misiri nesarigwe ebe bosa, na Edomu nero nebe erooro ere bosa, ekiagera abanto b’aroro mbakorerete Abayuda amabe; nigo baiterete ase ense yabo amanyinga ’abanto batarenge na komocha.

20Korende ense y’Abayuda nemenywe kare na kare, na Yerusalemu boigo, ekiaare ase ekiaare.

21Ninsibie okomocha kwabo kw’ogoitera amanyinga, okwo ntasibetie ritang’ani. Inche Omonene nigo ngendererete komenya Sayoni.”

← Chapter 2 Jump to: