Lamentations 1

Gussi (EBIBILIA ENCHENU) 2020

Jump to: Chapter 2 →

1Naki omochie oyo otigaire bosa, oyio orenge oichire nabanto! Naki otigaire buna omoboraka, oyio orenge omonene ase egati y’ebisaku! Oyio orenge buna eting’ana ase egati y’emechie, bono obeire omosomba.

2Nigo okorera nobororo botuko bokia, na amariga nigo agoiteka ase chimboto chiaye; ase abanchi baye bonsi onde tari okomoremia; abasani baye bamong’ainire, babeire ababisa baye.

3Abayuda bairirwe ase obosomba, babeire nemechando na obokong’u batari gotimoka. Nigo bamenyete ase egati y’abanto b’ebisaku; abakobabwatia babaikereire kobare nemechando.

4Chinchera chikogenda Sayoni nigo chiichanete, ekiagera onde tari ogocha ase Amatuko Amanene achikire; ebiita biaye bionsi nigo bitigarete bosa, na abakuani baye bonsi nigo baichanete. Abaiseke baye abekungi nigo baumatete, na omochie omonyene nigo ore nobororo obonge.

5Ababisa baye babeire abanene baye, ee, ababisa baye nigo bagendererete goseseneka. Omonene oyotomeire emechando ase engencho y’ogosaria kwaye okonge, na ababisa baye bairire abana baye ase obosomba.

6Ogosikwa gwonsi kwarure ase abanto ba Sayoni; abagambi baye babeire buna chingabi chitabwati ase chikorisia; batamire korwa ase abakobabwatia, tibari ne chinguru.

7Ekero abanto ba Yerusalemu barenge nemechando na obokong’u, bakaba bakoinyora ebinto ebiya mono barenge nabio ase amatuko a kare. Agwo ekero bagwete ase amaboko ’abachandi, onde tarenge ore kobakonya, abachandi babo bakobachecheria ase engencho y’okogwa kwabo.

8Abanto ba Yerusalemu bakorire ebibe ebinene; ase ayio babeire okogechia, bonsi ababasigete babachayire, ekiagera barorire obogetirianda bwabo. Ee, omochie omonyene nkweumia ore, bweonchoire gochia nyuma.

9Riko riaye nigo riarenge ase chianga chiaye, torengereretie igoro y’omoerio oye. Ase ayio okogwa kwaye gokaba ogw’okoondokia, torenge nonde okoyoremia. “Aye Omonene, rigereria emechando yane, ekiagera omobisa one ngwetogia are!”

10Omobisa oyio oramboire amaboko aye gochia gosakora ebinto bionsi bie rigori rinene bire ase omochie ime; ee, omochie oyio ororire abanto b’ebisaku bagosoa Aase aye Aachenu, agwo aye Omonene gwakanete ng’a tibasoa ase omosangererekano oo.

11Abanto bonsi b’omochie nigo baumatete, ekero barigereretie endagera; barabwo baoonirie chinibo chiabo bagore endagera barie, erinde banyore chinguru. “Aye Omonene, koranche ondigererie, ekiagera nachayirwe.”

12“Inee! Inwe mwensi aba mogoeta inchera aa, aya nigo are amang’ana a bosa asemore? Rigereria morore gose emechando ende ere buna eyane, eyio yarentetwe asende, eyio Omonene andeterete, ekero arenge nendamwamu egwoka.

13“Otomire omorero korwa igoro osambire amauga aane oyabuire, otegire oboreba ase amagoro aane; ong’iranirie nyuma; ontigire inde bosa, ntari ne chinguru omobaso boira.

14“Ogosaria kwane okonge nigo gwasiberanetigwe nokoboko kwaye, gokaba rikorogoto gokabekwa ase rigoti riane; na ase enchera eyio akang’ura chinguru. Omonene nigo ambegete ase amaboko ay’abwo ntanyare kobua.

15“Omonene bwangire abanto bonsi chituoni, abamenyete ime yane, orangeirie omosangererekano bw’abanto, erinde osenyente abamura baane. Abayuda abwo banga buna omoiseke omwekungi, Omonene obatiringeire inse, babeire buna amasabibu agotiringwa ase ekemitero.

16“Ase engencho y’amang’ana aya nigo nkorera, amaiso aane nigo akoiyeria amariga, oyio okondemia nigo are aare korwa asende, oyio okong’a chinguru chinyia; abana baane batigaire bare boka, ekiagera ababisa baane bambuire.”

17Abanto ba Sayoni basamunsire amaboko abo, korende onde tari okobaremia. Omonene ochikire igoro y’abanto ba Yakobo ng’a abanto abwo babaetananire babe ababisa babo; Yerusalemu obeire okogechia asebare.

18“Omonene nomonyene oboronge, nonya naboigo inche tinyigwereti amachiko aye. Inwe abanto bonsi, tegerera moigwe, morigererie emechando yane, abaiseke baane abekungi, na abamura baane, boosirwe na koirwa ase obosomba.”

19“Inche nkarangeria abanchi baane ng’a bankonye, korende bakang’aina; abakuani baane na abagaaka bagakwera ase omochie ime, ekero barenge korigia endagera barie banyore chinguru chinyia.

20“Aye Omonene, rigereria buna inde ase emechando, omoyo one oonchokanire, na enkoro yane yaonchoranirwe, ekiagera nabeire oyo otari omoigweri. Abana baane baitirwe nemioro ase chinchera, na amakweri abeire ase enka yane,

21“Abanto baigure buna ng’umatete, na onde tari nonya noyomo okondemia. Ababisa baane bonsi baigure igoro y’emechando yane, bagokire ng’a naye gwakorire aya. Renta rituko riria gwatebete ng’a orarente, na barabwo babe buna inche.

22“Tiga obobe bwabo bwonsi bororekane ase obosio bwao, obae egesusuro; buna kwang’ete inche ase engencho y’ogosaria kwane, ekiagera nigo ng’umatete mono, na enkoro yane yanyarekire.”

Jump to: Chapter 2 →