Lamentations 2

Gussi (EBIBILIA ENCHENU) 2020

← Chapter 1 Jump to: Chapter 3 →

1Naki Omonene atubire omochie o Sayoni nomosunte, ekero arenge nendamwamu! Otugutire obonene bokomeka‐meka bw’Abaisraeli korwa igoro gocha inse aa. Ere tainyoreti egeteni ki’amagoro aye, ase rituko ri’endamwamu yaye.

2Omonene oiyeirie inse obomenyo bwonsi bw’abanto ba Yakobo atari namabera, otagoire chiburi chi’ense y’Abayuda, ekero arenge nendamwamu; osiririe oboruoti, na ourire abanene baye amasikani.

3Obutoire chingunchara chionsi chi’Abaisraeli ore nendamwamu yaye entindi, orusirie okoboko kwaye gw’okorio korwa asebare ase amasio ’ababisa babo: ere osambire abanto ba Yakobo buna omorero ekebemberi ogosamba ase chinsemo chionsi.

4Ere otingire obota bwaye buna omobisa agotinga, otenenire na kobong’usa nokoboko kwaye gw’okorio buna omochandi; agaita bonsi aba twetogeretie. Igoro y’obomenyo bw’abanto ba Sayoni, oumoire ekeririanda kiaye kere buna omorero.

5Omonene obeire buna omobisa, osiririe Abaisraeli; osiririe chinyomba chiaye chionsi chi’oboruoti, otagoire chiburi chiaye chinkong’u; naende omenteire abanto ba Yuda okorera na okweumia.

6Ere oiyeirie inse orobago rwaye rore buna orw’omogondo, ee, osaririe aase emesangererekano y’ogosasima ekobeera. Omonene otigire abanto bebire Amatuko Amanene ne Chisabato agwo Sayoni, na ase okogechigwa kwaye okonene bwangire omoruoti na omokuani.

7Omonene bwangire egesasimero kiaye, otigire Aase aye Aachenu asarigwe; otigire chindwaki chiaye ase amaboko ’ababisa. Abanto bakuurire ime ase enyomba y’Omonene, buna nase rituko ri’omosangererekano bw’ogosasima.

8Omonene onachire ase ebirengererio biaye gosaria chindwaki chi’omochie o Sayoni, oramboire engori y’okorengera. Tagotanga okoboko kwaye tayosaria; otigire chiburi ne chindwaki chikweumia, chionsi amo nigo chiumatete.

9Ebiita biaye biarimeire ase riroba, emekorogoto yaye yabunirwe na gosarigwa. Omoruoti oye, na abagambi baye, nigo bamenyete ase egati y’abanto b’ebisaku bitabwati amachiko, na ababani baye tibari konyora amaroro korwa ase Omonene.

10Abagaaka b’omochie o Sayoni nigo baikaransete inse bakirete‐kiri, besiarerete ebuse ase emetwe yabo na kweboyia chigunia, abaiseke abekungi ba Yerusalemu nigo baturegete emetwe yabo gochia inse.

11Amaiso aane arosire ase okoiyeria amariga, omoyo one oonchokanire, na enkoro yane yachandekire ase engencho y’ogosaria kw’omochie bw’abanto baane, ekiagera abana, nonya nabakogonka, nigo bakona‐kogireka ase chinchera chi’omochie.

12Barabwo nigo bakoboria abang’ina: “Ng’ai endagera ere, na edivai?” Nigo bakona‐kogireka na korara ase chinchera chi’omochie buna abaakirwe chingoma, batweka mo ase amaboko ’abang’ina.

13Aye omochie o Yerusalemu, ninki ndagotebie? Ninki ndakoreng’anie? Mang’ana ki anga buna ayao ndagotebie, erinde nkoremie, aye Sayoni ore buna omoiseke omwekungi? Ogosarigwa kwao nokonene buna enyancha ere enene, ning’o oranyare gokogwenia?

14Ababani bao nigo bakobarorera amaroro ’obong’ainereria are bosa, tibakoorokeretie obobe bwao, erinde nario orairanerigwe amaya ao; korende aya amaroro abo ayakworogetie, nigo arenge ay’oborimo, agerete ogatantanigwa.

15Abanto bonsi abagoeta inchera nigo bagoaka chinkobi ase okogochaya, nigo bakobugia emeroria na gosingiseria omochie o Yerusalemu emetwe, bakobora: “Inee! Omochie oyio noro orenge korokwa omoikeranu bw’obosiani, na omogoko bw’ense yonsi?”

16Ababisa bao bonsi baasamirie emenwa yabo gokobugeria emeroria na gokoriananeria amaino, bakobora: “Twayosaririe! Ee, rituko eri nario twaganetie, bono twariikeire, twarirorire!”

17Omonene okorire aya achigete ng’a ayakore, oikeranirie ring’ana riaye aroberetie agwo kare, otagoire atari namabera, otigire ababisa bao bagochenga igoro yao, ere okinirie chingunchara chi’ababisa bao.

18Chinkoro chiabo nigo chikorera ase Omonene. Ee, aye orwaki rw’omochie o Sayoni, tiga amariga ao aiteke buna orooche, omobaso na obotuko! Tobaisa korosa, gose gotimokia amaiso ao.

19Imoka, orere botuko bokie! Ekero oborendi bw’obotuko bogochaka, oumore ayare ase enkoro yao ime ase obosio bw’Omonene, buna okoumora amache! Rambora amaboko ao asare osabere obogima bw’abana bao, abwo bagoyire nenchara ase amatabekania e chinchera chionsi.

20Aye Omonene, rigereria orore! Ning’o gwakorerete buna ayio? Inee! Abakungu mbarie oroiboro rwabo, abana abwo barerete ase amaboko abo? Inee! Abakuani na ababani mbaiterwe agwo Aase Aachenu ay’Omonene?

21Abamura na abagaaka nigo baraire ase chinchera inse, abaiseke baane, na abamura baane, baitirwe nemioro; ase rituko ri’endamwamu yao kwabaitire otari namabera.

22Buna ase rituko ri’omoyega omonene okarangeria ababisa baane bakanyoboyia korwa chinsemo chionsi; ase rituko ri’endamwamu y’Omonene onde tatooregete, gose gotigara, ase abwo nabogoretie na kobarera. Ababisa baane babasiririe.

← Chapter 1 Jump to: Chapter 3 →

Recommended Reading

Commentary Lamentations Commentaries → Devotional Lamentations Devotional Guide → Get This Bible Gussi (EBIBILIA ENCHENU) Study Bible →