bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
Matthew 24
Matthew 24
Gussi (EBIBILIA ENCHENU) 2020
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 25 →
1
Yeso agatiga Hekalu, akaba nkogenda are, na aborokigwa baye bakamochiera komworokia amaagacho e Hekalu.
2
Korende akabairaneria, “Inee! Mwarorire aya onsi? Nekeene nabatebirie: Aiga tirigotigara rigena erimo igoro ase erinde, eritatagorwe.”
3
Gaikaransire ase egetunwa ki’Emezeituni, aborokigwa baye bakamochiera bobisi, bakamoboria, “Totebie, aya indi arabe? Naende ninki ekemanyererio ki’ogocha kwao, na ay’omoerio bw’ense?”
4
Yeso akabairaneria, “Mwerende, monto onde tabang’aina.
5
Naki abange nabache ase erieta riane, babore: Inche ninche Kristo; baraae abange na kobasiria.
6
Na inwe inamoigwe esegi, na ebirage, bi’esegi; rigereria timoichanigwa, ekiagera bori, aya onsi nabe; korende omoerio toracha.
7
Naki egesaku nakeimoke korwana negesaku kende, na oboruoti naborwane noboruoti bonde; enchara na emetengecho y’ense nabibe ase chinsemo ne chinsemo.
8
Ayio onsi naro omochakano bw’obororo.
9
“Erio inababarue monyare gochandwa na goitwa, na inwe inamogechwe nebisaku bionsi ase engencho y’erieta riane.
10
Na ekero ekio abanto abange inabagwe korwa ase okwegena kwabo, inabasigaanane na kobekana ase ababisa babo, naende nabagechane,
11
na ababani b’oborimo abange mbaimoke, baraae abange na kobasiria.
12
Nase engencho y’okomenteka kw’ebibe, obwanchani bw’abange nabokende.
13
Korende oyoraremererie goika omoerio, oyio natooreke.
14
Naende, amang’ana aya amaya ay’oboruoti narandigwe ase ense yonsi koba kirori ase ebisaku bionsi; erio omoerio ochiche.
15
“Gaki, naboigo kamogocha korora okogechia kw’ogosaria gwatebetwe nomobani Danieli, kogotenena aase aachenu (oyogosoma amanye),
16
erio abare Boyahudi batame gochia ase ebitunwa.
17
Ere oyore kerama igoro taika kogenda kobogoria gento ekere nyomba mwaye,
18
na ere oyore mogondo tairana nyomba kobogoria eanga yaye.
19
Korende nabe aakong’u ase abare barito na abakogonkia ase amatuko aria.
20
Korende saba ng’a ogotama kwaino tikoba ekero ki’obokendu, gose ase rituko ri’Esabato,
21
ekiagera agwo nebe emechando emenene, etana koba korwa omochakano bw’ense goika bono, gose tekoba bo naende nonya ng’ake.
22
Naende onye amatuko ayio atanachetwe, anga monto onde bwensi tatooregete; korende ase engencho y’abachore amatuko ayio nanachwe.
23
Na ekero ekio omonto karabatebie: Rora, Kristo naa are! Gose: Naaria! Timwancha.
24
Naki nabaoroke amakristo ’oborimo, na ababani b’oborimo, nabaorokie ebikone ebinene na amakumia, goika keranyarekane, nabang’aine nonya nabachore.
25
Rora, nabatebirie aya ritang’ani.
26
Gaki, kobarabatebie: Rora, oyo ore ase erooro, timosoka isiko; kobarabatebie: Oyo ore ebinunchi bia bobisi, timwancha.
27
Naki buna okomesa gokorwa moocha kwabara gochia bosongo, naboigo ogocha kw’Omwana‐o‐mwanyabanto korache koba.
28
Naki aase ribego rire, nao chinsoti chigosangererekana.
29
“Korende bwango nyuma y’emechando y’amatuko aria, erioba narionchoke ribe omosunte, na omotienyi tokobara, ne ching’enang’eni nachigwe korwa igoro, ne chinguru chia igoro nachitengechigwe.
30
Erio nario ekemanyererio ki’Omwana‐o‐mwanyabanto kerache kororekana igoro, na ebisaku bionsi bi’ense nario birarere; naende nabarore mwana‐o‐mwanyabanto ogocha ase amare a igoro ne chinguru, na obonene obonge.
31
Erio natome abamalaika baye na egeturi ekenene ki’egetureri, na barabwo mbasangererie abachore baye korwa ase chinsinyo inye, korwa ensinyo eyemo ya igoro goika eyende.
32
“Korwa ase omoko eorokererie omoreng’anio oyo: Orosagia rwaye korwachakire koorokia amato aye, mwamanyire ng’a nekero ki’ogoseboka, etoigo ng’ang’e ere.
33
Naboigo nainwe komokorora aya aorokire, momanye ng’a omoerio obeire ang’e na gesieri.
34
Nekeene nabatebirie: Ekegori eke tikegoeta nonya ng’ake goika aya onsi anyare koba.
35
Igoro na ense nabiete, korende amang’ana aane takonyara goeta nonya ng’ake.
36
“Korende amang’ana e rituko riria, na ensa eria onde tari omanyete, nonya nabamalaika ba igoro, nonya n’Omwana, otatiga Tata bweka.
37
Korende buna amatuko aria a Nuhu abete, naboigo ogocha kw’Omwana‐o‐mwanyabanto korache koba.
38
Naki buna barenge ase amatuko aria etoigo etaracha, baare koria, bakonywa, bakonyuoma, bakonyuomerigwa, goika rituko riria Nuhu asoete ase obwato,
39
na barabwo tibamanya goika etoigo egacha, egasiria bonsi; naboigo ogocha kw’Omwana‐o‐mwanyabanto korache koba.
40
Engaki eyio abanto babere nababe mogondo; oyomo nairwe, na oyomo natigwe.
41
Abakungu babere nababe bagosera orogena oromo; oyomo nairwe, na oyomo natigwe.
42
Ase ayio, renda, ekiagera timomanyeti ituko ki Omonene oino agocha.
43
Korende manya aya, onye omonyene enyomba namanyete nkero ki ase obotuko omoibi agocha, anga narendete taiberwa.
44
Ase ayio nainwe, kabe ang’e; naki nase ensa motakagereti nero Omwana‐o‐mwanyabanto arache.
45
“Ning’o rende ore omosomba omwegenwa, naende ore omong’aini, obegetwe nomonene oye igoro ase enyomba yaye, ae abanto endagera ase ekero ekeronge?
46
Nasesenirie omosomba oria, ekero omonene oye arache amonyore ogokora bo.
47
Nekeene nabatebirie ng’a namobeke igoro ase ebi abwate bionsi.
48
Korende omosomba oria omobe, karatebe ase omoyo oye ime: Omonene one otebanire gocha,
49
achake goaka abasomba b’omonene oye, na koria na konywa amo nabagotinda,
50
omonene bw’omosomba oria nigo arache rituko atakagereti, na ensa atamanyeti;
51
ere namonachane abe ebing’ese namobeke amo nabang’ainereria. Aroro abanto mbabe nekerero na okoriania amaino.
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 25 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28