Nahum 1

Gussi (EBIBILIA ENCHENU) 2020

Jump to: Chapter 2 →

1Aya naro amang’ana amakong’u igoro ya Nineva arikire ase ebuku y’okorora kwa Nahumu Omoelikosi.

2Omonene nigo are Nyasae bwe risemi, ere nigo akweruseria egesiomba na koba nendamwamu enene. Omonene nigo akweruseria egesiomba ase abwo bakoamererania nere; nigo akobagachera ababisa baye ekeririanda.

3Omonene tari omwango bw’okoba nendamwamu, korende nigo are nokobua okonene; tari gotiga koa abamochi egesusuro. Enchera y’Omonene nigo ere ase omwaga na ekembugu‐mbugu; na amare nigo are orotu rw’amagoro aye.

4Ere nigo agotogonyera enyancha, amache asira, nigo agosiria amache e chindooche chionsi. Ense ya Basani nigo egosusana, na egetunwa gia Karimeli boigo; oboseera bwa Lebanoni nigo bokogoyana.

5Ebitunwa nigo bigotengechigwa ase obosio bw’Omonene, ebigoro nigo bikonyititoka. Ense nigo ekonyegerigwa ase obosio bwaye, ee, ense amo nebitongwa bionsi bireo.

6Ning’o oranyare gotenena ase ekeririanda kiaye tikemosiria? Gose ning’o oranyare koremereria obotindi bw’endamwamu yaye? Ekeririanda kiaye nigo kiaumoirwe buna omorero, na ebitare nigo bigotandoka ase obosio bwaye.

7Omonene nomuya; ere neburi enkong’u ase engaki y’emechando, nigo abamanyete abwo bakomotamera.

8Korende nasirie kegima aase omochie oria ore, narente eooro enene mono, nabwatie ababisa baye gochia ase omosunte.

9Inki mokoroberia igoro y’Omonene? Ere nabasirie kegima, takorenta egesusuro eria kabere.

10Nabaisa kobwatana buna amagwa akweringania, na gotinda nekenyugwa kegotindia, goika bayie baere buna obonyansi obwomo.

11Omonto oyomo naruete asore, akaroberia amabe igoro y’Omonene, akarua ogosemia okobe kw’ogosiria.

12Aya naro Omonene agoteba: “Nabaisa koba abange bare ne chinguru, goika basirigwe tibabao naende. Nonya nabeire nkobachanda inwe, bono tinkogenderera kobachanda naende nonya ng’ake.

13Bono nimbutore amakorogoto aria ababisa bababekerete, naende mbutorane chingataare babasiberete.”

14Aya naro Omonene achikire igoro yao: “Ororeria tirogotoka roratorwe ase erieta riao. Ninsirie korwa ase enyomba ye chinyasae chiao emegwekano yao ogosasima, eyio ebaachire na eyio ebombire. Ninkoroiserie oboina bwao, ekiagera aye nigo ore omokayayu.”

15Rigereria ase ebitunwa, orore amagoro ay’oyio okorenta amang’ana amaya ay’omogoko na koraria amang’ana ’omorembe! Inwe Abayuda, renda Amatuko aino Amanene, moikeranie chiira chiria mwariete. Abakori amabe tibagocha kobarwania naende, ekiagera basirigwe kegima.

Jump to: Chapter 2 →